Hanyima yakushakama mafuku ayedi muSamariya, Yesu nayi kumukala wawu. Wadiña nakushimwina nankashi muYudeya, ilaña hanafunti muÑaliliya nakunookaku. Ilaña natachiki mudimu weneni mwituña mwakuliliyi. Hanakuhweleli kumutambwila chiwahi kwenikuku, muloña Yesu nahoshi nindi, “kaprofwetu hiyamulemeshaña mumukala wawuku.” (Yowanu 4:44) Chatela atumbanji twindi ekali nindi hamu, ilaña wena anafunti kumatala awu nikunyidimu yawu yazatileñawu.

Nsañwinyi yinatachiki kushimwinayi Yesu? Yinakuhosha nawu: “Wanta waNzambi wunaswini dehi kwakwihi. Dichi balumukenu munyichima nawa kuhwelelenu nsañu yayiwahi.” (Maku 1:15) Antu aneli ñahi naniyi nsañu? Kafwampi, antu amavulu anamutambwili Yesu chiwahi nakumulemesha. Bayi hamuloña wansañu yindiku. Antu amakwawu muÑaliliya adiña haChipandakenu muYerusalema tukweji tunahitihu nawa amweni yinjikijilu yakuhayamisha yeliliyi Yesu.—Yowanu 2:23.

Kudihi kwatachikiliyi Yesu mudimu wakushimwina muÑaliliya? Hadaha muKana, mwabalumwiniyi menji kwikala vinyu hachawija chawulu. Hepampa damuchiyedi hadiñayi muKana, natiyi nawu kudi mukwenzi wakata nankashi wunakukeña kufwa. Himwana kachilolu waHerodi Antipasi, mwanta wamujahili Yowanu Mpapatishi. Iwu chilolu natiyi nawu Yesu nenzi nakufuma kuYudeya nakwinza muKana. Dichi nafumi kumukala windi kuKaperinamu nakwinza kuKana kulonda amuwani Yesu. Iwu chilolu wunaneñi namuleji Yesu nindi: “Mwanta, tuyi henohu mwanami kanda afwi.”—Yowanu 4:49.

Yesu namwakuli munjila yinamuhayamishi nindi: “Yaña; mwaneyi nakoli dehi.” (Yowanu 4:50) Iwu chilolu waHerodi namukuhweleli Yesu, nawa natachiki kufunta kumukala wawu. Hanakufuntayi nabulakani añamba jindi anenzi nakumuleja nsañu yayiwahi. Eña, mwanindi wamumi nawa nakoli! Namwihuli nindi, ‘Mpinjinyi yakolayi?’ kulonda eluki yuma yamwekana.

Anamwakuli nawu: “Mashika amumana haloshi haora yamu 7.”—Yowanu 4:52.

Chilolu naanuki nindi iyi diyi mpinji yahoshayi Yesu nindi, “Mwaneyi nakoli.” Hanyima yachumichi, iwu iyala waheta nankashi wudi nawa ñamba nichisaka chindi chejima anekali atumbanji twaKristu.

MuKana dimunakoñiyi Yesu yihayamisha kapampa kamuchiyedi, nabalumuni menji kwikala vinyu nikuuka kansi weyala hahalehi hadi makilomita 26. Iyi bayi neyi, diyi yihayamisha yindi hohuku. Ilaña iku kuuka kwalema muloña kunamuleteshi afunti kuÑaliliya. Hikaprofwetu etejawu kudi Nzambi, ilaña komana ‘antu amumukala windi akumulemesha ñahi’?

Chumichi chikumwekana chikufuntayi kumukala wawu kuNazareta. Yumanyi yikuwanayi kweniku?