Chipandakenu cha 32 C.E. chichinakuswina kwakwihi, Yesu nakutañisha muÑaliliya. Kuhiñahu watela nayi kuYerusalema kuChipandakenu, kwesekeja nachashimuna Nshimbi yaNzambi. Hela chochu, Yesu nakuya mukuswamujoka muloña aYudeya anakukeña kumujaha. (Yowanu 7:1) Nafunti kuÑaliliya hanyima yaChipandakenu.

Hadaha Yesu wudi muKaperinamu hanenziwu aFwarisi niansoneki kudi yena kufuma kuYerusalema. Muloñadi chinenjiliwu kudi yena? Anakukeña hakumwinkela Yesu muloña wakubula kulondela yuma yamunsakililu. Anehuli nawu: “Muloñadi atumbanji tweyi chamotokelañawu kashidikilu kawantu akushankulu? Chakutalilahu, adaña chakadi kwisuka.” (Matewu 15:2) Nzambi washimwini wanyi nindi antu jindi “esukeña kumakasa awu nakushika munkokola.” (Maku 7:3) Ilaña aFwarisi ahoshaña nawu neyi wisuka chakadi kushika munkokola himuloña.

Chatela ashikeni dakuyileja chalala kutalisha haniyi nsañu, Yesu nayileji chafumpañawu Nshimbi yaNzambi mumushikila. Nayihuli nindi: “Muloñadi chimwamotokelaña nshimbi jaNzambi hamuloña wachisemwa chenu? Chakutalilahu, Nzambi wahosheli nindi, ‘Lemeshaku tata yeyi nimama yeyi,’ nawa, ‘Muntu wejima wukumuhosha chatama tata yindi hela mama yindi, amujahi.’ Ilaña enu mwahoshaña nenu, ‘Muntu wejima wukuleja tata yindi hela mama yindi nindi: “Chuma chejima chinikweti chinateli kukukwasha eyi hichawaana chakumwinka Nzambi,” hatelela kumulemesha tata yindiku.’”—Matewu 15:3-6; Kwidika 20:12; 21:17.

Afwarisi ahoshaña nawu mali, maheta, hela chuma chidi chejima chinahaniwu nawu hichawana chaNzambi chamutembeli, kwila achizatisha kuyuma yikwawu nehi. Hela chochu, muntu wunahani diyi wukutwalekahu kuchihemba. Chakutalilahu, mwana weyala nateli kuhosha nindi mali indi hela iheta dindi “hikorabani,” chawana chakumwinka Nzambi hela kuhana kutembeli, neyi kwiji nakukeña ochu chawana. Hela chochu, mwana wuchidi kuzatisha awa mali hela iheta hela chakwila nakuhosha nindi kwila achizatisha nehi kulonda akwashi nachu anvwali jindi anashinakaji hela anakankili. Dichi hanakusha maana kukuhemba anvwali jindiku.—Maku 7:11.

Yesu nahili chikupu chinakuhimpawu Nshimbi yaNzambi nawa nahoshi nindi: “Munakojeji izu daNzambi kwikala damukunkulwayi muloña watushidikilu twenu. Enu anfwikiji, Isaya waprofweteli chachiwahi hadi enu hahosheliyi nindi: ‘Awa antu anlemeshaña hohu nanyivumbu yawu, ilaña nyichima yawu yidi kwakulehi nanami. Kudifukula kwadifukulañawu kudi ami kwamukunkulwayi, muloña ntañishilu yawu yashindamena hanshimbi jawantu.’” Afwarisi anakañanyi kumwakula Yesu chinayihosholiyi. Dichi natambiki izaza kulonda diswini kwakwihi. Nayileji nindi: “Tiyililenu kulonda mwiluki munatalishi awa mazu: Yuma yeñilaña mukanwa kamuntu bayi neyi diyamutamishañaku, ilaña yuma yafumaña mukanwa kindi diyamutamishaña.”—Matewu 15:6-11; Isaya 29:13.

Kuhiñahu hadiwu mwitala, atumbanji anamwihuli Yesu nawu: “Wuneluki ntahi neyi aFwarisi ahila chatiyawu mazu iwahosha?” Yena nayakuli nindi: “Mutondu wejima wabulili kutumbawu kudi Tata yami wekala mwiwulu akawubwita. Yilekenu ahili. Hiyanlomboli aputa mesu. Muloña neyi mputamesu alombola mukwawu mputamesu, wejima wawu akuholokela mwibuku.”—Matewu 15:12-14.

Dichi chinamwekani neyi Yesu nahayami, chineli Petulu yehuliku atumbanji, hachuma chamutamishaña muntu. Yesu nakuli nindi: “Komana enu mweluka wanyi nenu chuma chejima cheñilaña mukanwa chahitaña muchipumba, kuhiñahu hichikuya mumusalanyiku? Hela chochu, yuma yejima yedikaña mukanwa yafumaña mumuchima nawa yumoyu diyamutamishaña muntu. Chakutalilahu, mumuchima dimwafumaña yitoñojoka yatama,  kujahañana, wujila, wuvumbi, wukombi, wunsahu wakutwamba nimatuka. Iyi diyuma yatamishaña muntu; ilaña kuda chakadi kwisuka kumakasa hikwatamishaña muntuku.”—Matewu 15:17-20.

Yesu hanakukaanisha antu kwikala nawunyonjiku, hela hanakuhosha nindi muntu hatela kwisuka kumakasa henohu kanda atachiku kuloñesha yakudaku. Ilaña nakuhosha hawunfwikiji wawakulumpi jakwitiya adiwulaña Nshimbi jaNzambi jaloña nakuleta tushidikilu twawantu. Chalala chidi nawu, yuma yatama yafumaña mumuchima diyamutamishaña muntu.