Musinagogi yamuKaperinamu, Yesu nakutañisha nindi yena diyi yakuda yalala yafuma mwiwulu. Mazu anahoshiyi chakadi nikujina nabombeli hamazu alejeliyi antu afumi kumusela waKaluñalwiji kaÑaliliya, ana adiili mankendi niinshi jayinkeliyi.

Yesu natwalekihu nanawa mazu, nindi: “Ankakulula jenu adiili manina mwisaña, ilaña afwili.” Kwambukaku, nalumbululi nindi: “Ami yami yakuda yayumi yafumini mwiwulu. Neyi muntu ada iyi yakuda wakashakama haya nyaaka; nawa yakuda yinakahana, himujimba wami wunakahana kukoola mawumi awantu kulonda akahandi.”—Yowanu 6:48-51.

Mumpinji yachishika mu 30 C.E., Yesu walejeli Nikodemu nindi Nzambi wakeñeli nankashi kaayi chakwila wahanini Mwanindi kulonda ekali Chamwinu. Yesu wahosheli nankashi hansañu yakuda mujimba windi kuhitila mukukuhwelela mulambu wukuhanayi. Diyi njila hohu yakutambwilamu wumi wahaya nyaaka.

Hela chochu, antu anakaani munahoshiyi Yesu. Anadihuli nawu: “Indi iwu muntu nateli kutwinka ñahi mujimba windi nindi tudii?” (Yowanu 6:52) Yesu nakukeña eluki nawu nakutena chuma chacheñi bayi mujimba windi yomweniku. Mazu anabombelihu Yesu analumbululi munatalishiyi.

“Inakuyileja chikupu nami, neyi enu kuda mujimba waMwana kamuntu hela kunwa mashi indi nehi, himwakekala nawumiku. Muntu wejima wadaña mujimba wami nikunwa mashi ami wukweti wumi wahaya nyaaka, . . . muloña mujimba wami hiyakuda yalala, nimashi ami hiyakunwa yalala. Muntu wejima wadaña mujimba wami nikunwa mashi ami, watwalekañahu kudikunda nanami, ninami nawa nadikunda nayena.”—Yowanu 6:53-56.

Toñojokenu chatiyiliwu aYudeya atiyilileña! Atela atoñojokeleña nawu Yesu nakuhosha nindi chachiwahi kuda antu hela kufumpa nshimbi yaNzambi yakaanisha kuda mashi. (Kutachika 9:4; ALevi 17:10, 11) Ilaña Yesu nakutena wanyi kuda mujimba hela kunwa mashi itweluka. Nakumwekesha nindi antu ejima anakukeña kwikala nawumi wahaya nyaaka atela kukuhwelela mumulambu wunakukeña kuhanayi neyi nahani dehi mujimba windi wawanina nakuhuñununa mashi indi awumi. Hela chochu, niatumbanji twindi kanda elukishi iyi ntañishilu. Amakwawu anahoshi nawu: “Awa mazu akala nankashi; hinyi wukuyitiya?”—Yowanu 6:60.

Chineli Yesu neluki nindi atumbanji twindi amakwawu anakutooba, nehuli nindi: “Awa mazu anayihukeshi tahindi? Hanu dinu, chakekala ñahi chimwakamona Mwana kamuntu hakufunta kwafuminiyi? . . . Mazu innayileji aspiritu nawa ahanaña wumi. Ilaña mukachi kenu mudi amakwawu abulaña kukuhwelela.” Muloña wachumichi, atumbanji amavulu anamushiyi nawa hiyanakumulondelaku.—Yowanu 6:61-64.

Dichi Yesu nayihuli apostolu indi 12 ilu lwihu nindi: “Komana ninenu munakukeña kuya tahindi?” Petulu namwakuli nindi: “Mwanta, tukuya kudinyi? Eyi yeyi wukweti mazu awumi wahaya nyaaka. Tunakuhweleli nawa tuneluki netu yeyi Wajila Wambala waNzambi.” (Yowanu 6:67-69) Wamwekesheli nindi wadiña nachikuhwelelu chikupu, hela chakwila haniyi mpinji Petulu niapostolu amakwawu hiyatiyishishili mwatalishili Yesu haniyi nsañuku!

Iku natiyi kuwaha nachinakuliyi Petulu, Yesu nahoshi nindi: “Komana yami nayitondeli enu apostolu 12 wanyi? Ilaña mukwenu wumu hakachi kenu himukakutwamba.” (Yowanu 6:70) Yesu nakutena Yudasi Isakaroti. Chinekali chaswayi Yesu kwiluka haniyi mpinji nindi Yudasi natachiki kutoñojoka hayuma yatama.

Hela chochu, Yesu natiyi kuwaha hakwiluka nindi Petulu niamakwawu hiyanaleki kumulondela nikuzataku mudimu wakupulwisha mawumi awantu wunakuzatayiku.