Antu akumaluña amavulu nawa akwakulehi anamutiyi Yesu. Amavulu anafumi kumaluña amalehi kulonda atiyi yuma yinakutañishayi nikumona nyidimu yindi yañovu. Hela chochu, chimunahiti mafuku nafunti kuKaperinamu, kwazatilañayi nankashi. Antu chinatiyiwu nawu nafunti anatiyi kwejima mumusumba wakuKaluñalwiji kaÑaliliya. Chinafumimu, antu amavulu anenzi kwitala kudiyi. Amakwawu, aFwarisi niantañishi jaNshimbi anenzi kufuma muÑaliliya nimuYudeya, kushilahu niYerusalema.

‘Antu amavulu anapompi mwitala chakwila munenzali kushika nimuchiisu nawa natachi kuyileja izu.’ (Maku 2:2) Chumichi chikumwekesha chuma chakuhayamisha. Hichuma chikutukwasha kwiluka netu Yesu wukweti ñovu yakufumishahu yuma yaleteshaña antu akabakaneña nikuuka antu ejima atondañayi.

Hampinji yinakutañishayi Yesu mukapeka munenzali antu, amayala awana analeti iyala wakata kalepa hachileyi. Anakukeña Yesu ayuukili ibwambu dawu. Hela chochu, muloña wezaza dawantu, anakañanyi “hakuhitila hakwila nawu amuleti kudi Yesu.” (Maku 2:4) Chumichi chinayitiyishi kutama. Anakandami hewulu detala nakulamunahu. Kuhiñahu, anazenzumwini mwitala chileyi hanakaami muntu wakata kalepa.

Yesu nahili nachinamuluwañeshiwu? Inehi! Nazañalali nachikuhwelelu chinamwekeshiwu nawa namuleji iyala wakata nindi: “Anakwanakeni nshidi jeyi.” (Matewu 9:2) Komana Yesu nateli kwanakena nshidi? Ansoneki niaFwarisi anakudihujola nawu: “Muloñadi iwu muntu chinakuhoshelayi ñana? Nakuhosha kasawuntu. Kufumishaku Nzambi, hinyi mukwawu wunateli kwanakena nshidi?”—Maku 2:7.

Chinelukiyi yitoñojoka yawu, Yesu nayileji nindi: “Munakutoñojokeladi yuma yamuchidiwu munyichima yenu? Chaswayi chidihi, kuleja muntu wakata kalepa nami, ‘Anakwanakeni nshidi jeyi,’ tahindi kuhosha nami, ‘Nyamukaku, nonaku chileyi cheyi wendi’?” (Maku 2:8, 9) Eñañi, kushindamena hamulambu wakahanayi Yesu, nateli kwanakena nshidi yamuntu.

Kuhiñahu, Yesu namwekeshi kudi izaza, kushilahu niantu anakumudimbulula nawu wukweti wuswa wakwanakena nshidi hamaseki. Nabalumukili kudi muntu wakata kalepa nakumuleja nindi: “Inakukuleja nami, Nyamukaku, sendaku chileyi cheyi wuyi kwitala.” Hohenohu iyala neli mwenimu, natachiki kwenda iku nasendi chileyi nawa antu anakutalaku. Antu anahayami nankashi! Anamuhameki Nzambi nawa anahoshi nawu: “Kanda tumoneñahu dehi chuma chamuchidiwuku.”—Maku 2:11, 12.

Twatela kwiluka netu Yesu nateni nshidi hamu nayikatu nawa nindi kwanakena nshidi kudi neyi kuuka yikatu. Bayibolu yatañishaña nawu nvwali yetu watachi, Adama, wavulumwini nawa wejima wetu twaswana yuma yafuma munshidi, yikatu nikufwa. Ilaña muchiyuulu chaWanta waNzambi, Yesu wakanakena nshidi yawantu ejima amukeña nawa amukalakelaña Nzambi. Kuhiñahu yikatu akayifumishahu lwejima.—ARoma 5:12, 18, 19.