Iku atumbanji twaYesu anakushimwina muÑaliliya, ilaña muntu wayilejeli nindi iwu diyi Yesu wudana iwu wuswa. Yowanu Mpapatishi wuchidi mukaleya kwakwihi nayaaka yiyedi.

Yowanu washimwini hatooka nindi chatama Mwanta Herodi Antipasi kusenda Herodiya, ñoda manakwindi Fwilipu, ekali ñodindi. Herodi waseñeli ñodindi watachi nakusumbula Herodiya. Kwesekeja naNshimbi jaMosi, yinakutwambayi Herodi nindi wajilondelaña, iwu wulu wawujila nawa wetejewa munshimbi wanyi. Herodi natiyi kutama namazu aYowanu, dichi namunatili mukaleya, hadaha anamukanjikiji kudi Herodiya.

Herodi neluki wanyi chatela kumwilayi Yowanu, muloña antu ‘amumonaña nawu hikaprofwetu.’ (Matewu 14:5) Hela chochu, Herodiya yena dichamumonañayi wanyi. “[Wamuhembela] Yowanu nkunyi,” kafwampi, wafwilaña nindi amujahi. (Maku 6:19) Nkumininaku, mpinji yinashiki.

Henohu Chipandakenu chamu 32 C.E., chidi mukamwihi, Herodi naloñeshi chidika cheneni chakwanuka ifuku dindi dakuvwalika. Ayilolu jaHerodi ejima niamashidika kushilahu niakulumpi atalaña antu muÑaliliya, anenzi kuchidika. Hampinji yinakwanukawu ichi chidika, Salomi, mwana kaHerodiya naFwilipu wadiña nfumwindi watachi, nakuhañena antu ejima anapompi. Amayala anazañalali chinakuhañanayi.

Chinatiyiyi kuwaha nachinahañaneñayi mwanindi, Herodi namwili nindi: “Nlombi chuma chejima chiwukukeña, nukukwinkachu.” Nasanyiki nikusanyika nindi: “Chuma chejima chiwukunlomba, nukukwinkachu kushika tuhu nikuchibalu chawanta wami.” Henohu kanda akuuli, Salomi nayi nakwihula mama yindi nindi: “Nilombi chumanyi?”—Maku 6:22-24.

Iyi diyi mpinji yadiña nakukeñayi Herodiya. Nashikeni dakwakula nindi “Lombaku mutu waYowanu Mpapatishi.” Hohenohu, Salomi nafunti kudi Herodi nakulomba nindi: “Inakukeña wunyinki katatakichi mutu waYowanu Mpapatishi hacheña.”—Maku 6:24, 25.

Chumichi chinamwakamishi nankashi Herodi muloña antu anenzi anatiyeña chasanyikañayi kudi Salomi. Wukusawuka neyi chakwila wukumwinka wanyi, hela chakwila chumichi munadibombeli kujaha muntu wakadi muloña. Dichi, Herodi natemeshi kalama kukaleya kulonda eli munamulejiyi. Hanashimbuli wanyi kalama nenzi namutu waYowanu hacheña. Namwinkiwu Salomi, niyena namutwalili mama yindi.

Dichi atumbanji twaYowanu chinatiyiwu chuma chinamwekani, anenzi nakusenda mujimba windi nawa anawujiiki. Nkumininaku anamuleji Yesu iyi nsañu.

Kufumahu, Herodi natiyi nawu Yesu nakuuka antu nikufumisha ndemoni, dichi naluwankani. Neluki wanyi neyi iwu muntu wunakwila yumiyi hiYesu, indi kwiji hiYowanu Mpapatishi ichi “anamusañuli mudi afu.” (Luka 9:7) Dichi Herodi Antipasi nakufwila chikupu kumumona Yesu. Bayi neyi nakukeña nindi atiyi yuma yinakushimwina Yesuku. Ilaña, Herodi nakukeña kumumona Yesu kulonda eluki neyi diyi Yesu hela nehi.