Yesu nafumi tuhu nakuzata nyidimu yayivulu muÑaliliya. Hela chochu, chinahoshiyi nindi, “Natela cheñi kushimwina nsañu yayiwahi yaWanta waNzambi kunyisumba yikwawu,” Yesu nakutena maluña amakwawu bayi Ñaliliya hohuku. Dichi, nayi “[na]kushimwina mumasinagogi amuYudeya.” (Luka 4:43, 44) Chumichi chinateleli muloña himpinji yachishika nawa chawija muYerusalema keña chishiki.

Kwesekeja nachitwataña hamudimu waYesu muÑaliliya, Nsañu Yayiwahi hiyashimuna nyidimu yayivulu yazatiliyi muYudeyaku. Hela chakwila hiyanamutambwili namuzañalu muYudeyaku, chumichi hichinamukañeshi kushimwina nikuzata nyidimu yayiwahi kwejima kudiyiku.

Katataka Yesu ayi mumusumba weneni waYudeya, muYerusalema kuChipandakenu cha 31 C.E. Mwiluña mwahitaña antu amavulu kwakwihi naChiisu chaNyikoku, kudi ijiya deneni datenañawu nawu Betezeta. Antu amavulu akata, ayifwayi niamputamesu enzaña kunidi ijiya. Muloñadi? Muloña antu amavulu akuhwelela nawu anateli kuyuuka neyi enza nakujimina munidi ijiya neyi menji anayivunduli.

Idi hifuku daSabata, nawa Yesu namoni muntu kunidi ijiya wunakati hadi yaaka 38. Yesu namwihuli nindi: “Wunakukeña kukola?” Iwu iyala namwakuli nindi: “Mwanta, hinikweti muntu wakunjimika mwijiya neyi menji anayivundañeshiku, nelaña neyi hinukukeña nami niyimu, mukwetu wacheñi wanyakalaña kuyamu.”—Yowanu 5:6, 7.

Yesu nahoshi chuma chinamuhayamishi niejima anakutiyaku, nindi: “Nyamukaku! Nonaku kadidi keyi wendi.” (Yowanu 5:8) Nawa dichuma chineliyi. Nashikeni dakukola, nawa nanoni kadidi kindi nakutachika kwenda!

AYudeya chatela azañalali hachuma chinamwekani, wena anamumoni iwu iyala nawa anakumusompesha nawu: “Lelu hiSabata, nawa kwesekeja nanshimbi hiwatela kusenda kadidi keyiku.” Ilaña yena nayakuli nindi: “Muntu wañuuka diyi wanleja nindi, ‘Nonaku kadidi keyi wendi.’” (Yowanu 5:10, 11) Awa aYudeya akeña wanyi muntu wookaña haSabata.

Anamwihuli nawu: “Indi owu wakuleja nindi, ‘Nonaku kadidi keyi wendi,’ hinyi?” Muloñadi chinamwihwiliwu iwu iyala? Anakukeña kwiluka. Muloña Yesu neñili “mwizaza dawantu,” nawa iyala anookiwu neluki wanyi ijina daYesu. (Yowanu 5:12, 13) Dichi, iwu iyala wukudimona cheñi naYesu. Chimunahiti mpinji nadiwani naYesu mutembeli nawa namwiluki nindi diyona wamuuka kwijiya.

Iwu iyala okawu nayiwani aYudeya amwihula hadi muntu wamuuka. Nayileji nindi Yesu diyi. Chinelukiwu chumichi, aYudeya anayi kudi Yesu. Komana anayi kudi yena kulonda eluki kunakufumishayi ñovu yakwila yuma yamuchidiwu? Inehi. Ilaña anakukena kumuwana Yesu namuloña wakwila yuma yayiwahi haSabata. Nawa anatachiki nikumukabisha!