Yesu nazati nankashi ifuku damukuma. Hanyima yalwendu lunendiyi muDekapoli, nooki mumbanda wapwekeleña mashi nikusañula mwana kaJayirusa wamumbanda. Ilaña kanda kwiyili. Yesu chinafumiyi mwitala daJayirusa, amputamesu anamulondeli anakumubidika nawu: “Mwana kaDavidi, tutiyili luwi.”—Matewu 9:27.

Chinamuteniwu Yesu nawu “Mwana kaDavidi,” awa amayala anamwekeshi nawu Yesu diyi wukaswana hetanda daDavidi nawa diyi Mesiya. Yesu natwambi kuyidiwula kulonda amoni neyi akutwalekahu kumudilila. Yesu chineñiliyi mwitala anamulondeli. Yesu nayihuli nindi: “Komana mukweti chikuhwelelu nenu nateli kwila chumichi?” Anamwakuli nawu: “Eña, Mwanta.” Dichi Yesu nayikwati hamesu nakuyileja nindi: “Kwesekeja nachikuhwelelu chenu, chiikali mwomwenomu.”—Matewu 9:28, 29.

Hohenohu anatachiki nikumona! Neyi chochalejayi antu amakwawu, Yesu nayili nindi bayi ashimuna chuma chineliyiku. Ilaña chineli anazañalali chikupu, anatachiki kulejaku antu amakwawu kumaluña acheñi.

Awa amayala chinakuyawu, analeti muntu mukwawu wabulaña kuhosha muloña wukweti ndemoni. Yesu namufumishi ndemoni iwu iyala natachiki kuhosha hohenohu. Mazaza anatiyi kuwaha nawa anahoshi nawu: “Chuma chamuchidiwu kanda chimwekaneñahu dehi muIsarela.” AFwarisi niwena adi hohu. Anamoni yihayamisha yinakoñiyi, dichi anatwalekihu kumutwika nyiloña kunakufumishayi ñovu, nakuhosha nawu: “Wafumishaña andemoni nañovu yanyuuli wawandemoni.”—Matewu 9:33, 34.

Hanashimbuli wanyi, Yesu nayi kumukala wawu kuNazareta, haniyi mpinji wudi nawatumbanji twindi. Kwakwihi nachaaka chinahitihu, watañishili musinagogi muniwu mukala. Antu hakusambila ahayamini nayuma yahosheleñayi, ilaña, kuhiñahu atiyili kutama nayuma yatañishiliyi nawa akeñeleña kumujaha. Ichi Yesu nakukeña cheñi kukwasha antuñi nindi.

Nafunti musinagogi nakutañisha haSabata. Amavulu anahayami nawa anakwihula nawu: “Indi iwu muntu awa maana wayifumishili kudihi niniyi nyidimu yañovu?” Anakuhosha nawu: “Komana iwu hidiyi mwana kamukakusoñaku? Mama yindi hidiyi Mariyaku, nawa anakwindi hidiwu aYakoba niYosefu niShimona niYudaku? Nawa ahelindi, hitwashakamaña nawu ejima kunuku? Hanu dinu, yuma yejimiyi wayifumishili kudihi?”—Matewu 13:54-56.

Antu anakumona nawu Yesu himuntu hohu elukawu. Anakutoñojoka nawu, ‘Tunakumona chakulañayi, nateli kwikala ñahi Mesiya?’ Chawushona, hela chakwila anamoni yuma yayivulu, kubombelahu nimaana indi asweja ninyidimu yañovu yinazatiyi, wena anamukaani. Muloña wakwila anamwiluki nankashi, nawa antaña jindi anakuhukana muloña wayena, chinamuleteshi kuhosha nindi: “Kaprofwetu amulemeshaña kwejima, kufumishaku hohu mumukala windi nimwitala dindi.”—Matewu 13:57.

Yesu nahayami muloña akweti wanyi chikuhwelelu. Dichi, hanakoñihu chihayamisha chidi chejimaku chiña hohu kunañikila “makasa antu antesha hohu adiña akata nakuyuuka.”—Maku 6:5, 6.