Yesu niatumbanji ichi anakuya kuchimunswa kuÑaliliya. Himpinji yachishika, nawa tidiku mumaha yinameni dehi. Atumbanji anatiyi nzala dichi anakuketujola nyitu yatidiku nakuda. Idi hifuku hiSabata nawa aFwarisi anakumona chinakwilawu.

Anukenu katataka aYudeya muYerusalema akeñaña kumujaha Yesu, nawu nakufumpa Nshimbi yaSabata. Ichi aFwarisi anakumwinka muloña hachuma chineliwu atumbanji. “Talaña! Atumbanji tweyi anakwila chuma chakaanishawu munshimbi kwila haSabata.”—Matewu 12:2.

AFwarisi anakuhosha nawu kuketula mbutu nakuyishiita mumakasa nakutachika kuda chochimu nakumuna nikuhula. (Kwidika 34:21) Yuma yatoñojokeleñawu aFwarisi haSabata nawu hinyidimu, yakolesheleña hohu yuma, henohu adishiliku nawu hiifuku damuzañalu nikukoleshelamu wubwambu naNzambi. Yesu nayakuli haniyi yitoñojoka yawu yatama nayakutalilahu yinakumwekesha nawu Yehova Nzambi hashiliku Nshimbi yaSabata nawu ayilondeleña muniyi njilaku.

Chakutalilahu nayileji hadi Davidi nawantu jindi. Chatiyiliwu nzala, emeni hatabanaka nakuda mankendi akutenteka kumesu aNzambi. Ana mankendi, afumishileñawu kumesu aYehova nakunsisishahu mankendi amaha, ayitentekeleleña atupristu nawu adii. Hela chochu, Davidi niantu jindi hiyayinkelihu muloña nachuma cheliliwuku.—ALevi 24:5-9; 1 Samweli 21:1-6.

Muchakutalilahu chamuchiyedi, Yesu nahoshi nindi: “Kanda mutañeñahu dehi muNshimbi nawu hajiSabata atupristu mutembeli ajilolaña  Sabata, ilaña hiyayinkaña muloñaku?” Natalishi mukwila nindi nihaSabata atupristu, ajahileña anyama anyilambu nikuzata nyidimu yikwawu hatembeli. Yesu nahoshi nindi: “Ilaña inakuyileja nami muntu wabadika chikupu tembeli wudi hanu.”—Matewu 12:5, 6; Kuchinda 28:9.

Yesu nazatishi cheñi Nsona kulonda akoleshi chikuma, nindi: “Neyi mwelukili mwatalisha awa mazu akwila nawu, ‘Nakeñi luwi, bayi mulambuku,’ himwadi kufwisha namuloña antu akadi muloñaku.” Nakunkululi nindi: “Mwana kamuntu diyi Mwanta waSabata.” Yesu nakutena chiyuulu chaWanta windi chayaaka ikombakaji.—Matewu 12:7, 8; Hoseya 6:6.

Antu anakabakani hayaaka yayivulu muwuduñu waSatana, namadombu nimajita anatwalekihu. Hakekala chaambu chikupu muSabata yeneni muchiyuulu chaKristu, mwakekala mpinji yeneni yakunooka nawa yitunakukeña!