Hanashimbuli wanyi kufuma hanamukiyi ñamba yamukulumpi wawamashidika, Yesu nayi kuKaperinamu muNena, musumba wekala hadi makilomita 32, musumba wekala kukabeta chidilu namujika. Hadi nkawindiku. Atumbanji twindi niizaza deneni dawantu didi hamu nindi. Chidi neyi anashiki mpinji yamelela muNena. Anawani aYudeya amavulu adi hachipenji. Antu anasendi mufu, wadiña kansi weyala anakuya nakumujiika.

Muntu wunasweji kuneña nankashi himama yaniwu mukwenzi weyala. Himumbanda ntuluwa nawa mwanindi wumu hohu nafwi. Chafwiliyi nfumwindi washalili hohu naniwu mwana weyala. Fwikijenu chadikundiliyi nindi wamushindameneni nindi diyi wukamukwasha nawa nindi diyi wukamukiña. Ilaña ichi nafwi. Hinyi wukumukundejaña nikumukwashaña?

Yesu chinamumoniyi iwu mumbanda, namutiyili luwi nanochu chinaneñiyi. Iku namutiyili wushona nawa munjila yakumukolesha, namuleji nindi: “Lekaku kudila.” Ilaña, neli cheñi chuma chikwawu. Naswini kwakwihi nakukwata kumutembu hanasendeliwu mujimba. (Luka 7:13, 14) Chuma chineliyi chinaleteshi antu anakudiila kushikena dakwimana hohenohu. Hadaha amavulu anakudihula nawu, ‘Natalishi mudihi nawa chumanyi chinakukeña kwilayi?’

Indochu awa anakwenda naYesu anamoni nakukoña nyidimu yañovu chidi neyi, kuuka yikatu yayivulu? Hadaha kanda amumoneñahu dehi Yesu nakusañula muntu. Hela chakwila kunyima asañwileñahu antu, komana Yesu nateli kusañula? (1 Anyanta 17:17-23; 2 Anyanta 4:32-37) Yesu namwili mwana weyala nindi: “Eyi kansi weyala, inakukuleja nami, hindukaku!” (Luka 7:14) Nawa dichuma chinamwekani. Nahinduki nawa natachiki kuhosha! Yesu namwinkiyi mama yindi wunahayami nawa wunazañalali chikupu. Ichi hadi cheñi nkawindiku.

Antu chinamoniwu nawu iwu mukwenzi weyala nekali cheñi wamumi, anamushimeki Yehova Mukakuhana Wumi, nawu: “Kaprofwetu muneni namwekani  mukachi ketu.” Amakwawu aneluki kulema kwanyidimu yinakwilayi Yesu, anahoshi nawa: “Nzambi naanuki antu jindi.” (Luka 7:16) Iyi nsañu yanichi chuma chakuhayamisha chinamwekani yinataandi mwahita ituña dejima, hadaha mumukala waYesu, muNazareta hadi makilomita 10. Nawa iyi nsañu yinataandi cheñi nikukabeta kakuchidilu kuYudeya.

Yowanu Mpapatishi wuchidi mukaleya nawa nakutiya kuwaha nanyidimu yinakukoñayi Yesu. Atumbanji twaYowanu anamuleji haniyi yihayamisha. Chumanyi chineliyi hakutiya iyi nsañu?