Yesu chinelukiyi nindi aFwarisi niakakumulondela Herodi anakukeña kumujaha, nafumiku nawatumbanji twindi anayi kuKaluñalwiji kaÑaliliya. Mazaza awantu anamupompeli kufuma kumaluña ejima, kuÑaliliya, kunyisumba yakuchikumu chaTira niSidoni, kukabadi kakumusela waKaloña Yodani, kuYerusalema nikuIdumiya. Yesu nooki antu amavulu. Chinafumimu, antu adi nayikatu yasweja anenzi kumbidi. Chatela ahembeleli yena ayikwati, wena anakufwila chikupu kwinza kulonda amukunki.—Maku 3:9, 10.

Antu anavuli nankashi, dichi Yesu naleji atumbanji twindi kumukeñela watu wanyanya kulonda afumi kuchikumu muloña nakuchina antu kumukunkakunka. Cheñi, nateli kutañishila muwatu hela kuya kwiluña dacheñi nakukwasha antu amavulu.

Kambanji Matewu nashimuni nindi nyidimu yaYesu yinashikiji “mazu ahosheleliwu mudi kaprofwetu Isaya.” (Matewu 12:17) Wuprofwetwinyi wunakushikijayi Yesu?

“Talenu! Kambuñami inatondeli, inakeña, inatiyaña kuwaha! Nakasha spiritu yami hadi yena nawa wakaleja nyuza mwaya wuñanji walala. Hamba kabobola hela kubilela chikupuku, nawa kwosi muntu wakatiya izu dindi munyikwakwa yamaneniku. Hamba kakotola iteti dachikekaku, nawa hamba kajima wanda wunakufwinda wishiku, sampu naleti wuñanji kwejima. Chalala, nyuza yakachiñeja mwijina dindi.”—Matewu 12:18-21; Isaya 42:1-4.

Eñañi, Yesu diyi kambuña Nzambi akeñayi, atiyañayi kuwaha. Yesu nashimuni wuñanji walala, wunakuheñeshawu natushidikilu twakudifukula kwakutwamba. AFwarisi azatishileña Nshimbi jaNzambi chatama, chakwila akaanineña nikukwasha muntu wakata haSabata. Hakwila amwekeshi nindi Nzambi hiNzambi wawuñanji nawa spiritu yaNzambi yidi hadi yena, Yesu nayamuni antu yisenda yayisemwa. Dimuloña wunakukeña kumujahilawu kudi akulumpi jakudifukula. Aluwañesheli nankashi.

Mazu akwila nawu “hamba kabobola hela kubilela chikupuku, nawa kwosi muntu wakatiya izu dindi munyikwakwa yamaneniku” anatalishi mudihi? Neyi Yesu nakuuka antu, nakuyiteja wanyi, hela andemoni, ‘kumushimuna kudi antu.’ (Maku 3:12) Nakukeña wanyi antu amwiluki kuhitila mukumutiyakesha munyikwakwa  mudi antu amavulu hela munsañu yambonji yashimunañawu antu.

Cheñi, Yesu nakuyileja nsañu yakukundeja antu adi neyi iteti dachikeka, anakukabishawu nankashi. Adi neyi wanda wunakufwinda wishi, wunashali hohu kwanti nakujima. Yesu hanachiki iteti hela kujima wanda wunakufwinda wishiku. Ilaña, naluwi nikukeña, nakuyikwasha antu amwovu. Mwamweni, nyuza yejima yatela kukinka manuñu mudi Yesu!