Yesu nayinki apostolu indi nshimbi yatelela yakulondela chakushimwina hampinji yinakuyawu ayedi-ayedi. Hela chochu, hanakumini hohenahaku. Nayisoñamishi kutalisha hadi ayilumbu, nindi: “Tiyenu! Inakuyitemesha neyi anyikoku mukachi kawatuñwidi . . . Ikalenu asoñama nawantu, muloña akayitwala kuyota yanyanya nikuyetela mumasinagogi awu. Nawa akayitwala kudi anguvulu nianyanta kukoola ami, kulonda wakekali wunsahu kudi wena nikunyuza.”—Matewu 10:16-18.

Eña, akakumulondela Yesu akumona makabisha asweja, ilaña nayikoleshi nindi “neyi ayitwala kuchota chanyiloña, bayi mwakama chimwakahosha hela yuma yimwakahoshaku, muloña akayileja yuma yimwakahosha hanoyu mpinji; muloña hiyenu mwakahoshañaku, ilaña spiritu yaTata yenu diyakahoshelaña mudi enu.” Yesu natwalekihu nindi: “Muntu wakahana manakwindi kulonda amujahi, tata yawantu wakahana mwanindi nawa anyana akanyamukila anvwali jawu nakuyihana kulonda ayijahi. Nawa akayihela kudi antu ejima kukoola ijina dami, ilaña muntu wejima wakomika kushika nikunsa, diyi akamwinawu.”—Matewu 10:19-22.

Chineli mudimu wakushimwina walema nankashi, Yesu nakonkomweni nindi akakumulondela atela kwikala ababala kulonda azati chiwahi iwu mudimu. Nahoshi nindi: “Neyi ayikabisha mumusumba wumu, temukilenu muwukwawu; inakuyileja chalala nami, Mwana kamuntu wakenza henohu kanda mumanishi mudimu wenu wakushimwina munyisumba nimunyikala yaIsarela.”—Matewu 10:23.

Yesu nayinki apostolu indi 12 nshimbi, nayisoñamishi nikuyikolesha chiwahi. Hela chochu, awa mazu anayikundami niantu akashimwinaña hanyima yakwila Yesu nafwi nawa anamusañuli. Chumichi chinamwekeni mumazu alejeliyi atumbanji twindi nindi “akayihela kudi antu ejima,” bayi neyi antu kunakuyitemeshayi apostolu hohu nawu ayi nakushimwinaku. Kubombelahu, kanda tutañeñahu dehi netu awa apostolu ayileteleña kudi anguvulu nikudi anyanta haniyi mpinji yashimwineñawu muÑaliliya hela kuyitwala nakuyijaha kudi antaña jawuku.

Chinamwekani hatooka nawu, Yesu wayilejaña apostolu yuma yakamwekana kumbidi. Toñojokenu mazu ahosheliyi nindi, “Mwana kamuntu wakenza,” henohu atumbanji twindi kanda amanishi kushimwina munyikala yejima. Yesu nakumwekesha nindi atumbanji twindi hiyakamanisha kushimwina Wanta waNzambi henohu Mwanta Yesu Kristu kanda enzi neyi nsompeshiku.

Hampinji yinakushimwinawu apostolu hiyatela kuhayama neyi amona makabisha hampinji yinakushimwinawuku, muloña Yesu nahoshi nindi: “Kadizi habadika ntañishi yindiku, nawa nduñu habadika  nkaaka yindiku.” Chikuma chaYesu chinatiyakani. Antu anakumwila chatama nikumukabisha muloña wakushimwina Wanta waNzambi, niwena dichakayilawu. Dichi Yesu nayileji nindi: “Bayi mutiya woma antu ajahaña mujimba, ilaña akañanyaña kujaha wumiku; ilaña tiyenu woma owu wunateli kujilumuna wumi nimujimba muGehena.”—Matewu 10:24, 28.

Nayidizishi nachakutalilahu chindi yomweni. Watwalekelihu kwikala washinshika kudi mukañovu yejima, Yehova kushika nikukufwa. Nzambi waÑovu jejima hohu diyi wunateli kujiyisha “wumi” (kuchiñeja kwakushakama haya nyaaka kumbidi) hela wunateli kusañula muntu nawumi wahaya nyaaka. Chumichi chatela chayikundejeli apostolu!

Yesu nashimuni Nzambi chakamenañayi antu amulondeleña nanichi chakutalilahu: “Anzwimba ayedi hiyayilandishaña nakadiwayawaya kabula kulema wuseyaku? Ilaña kwosi niwumu wunateli kuholoka heseki chakadi Tata yenu kwilukaku. . . . Dichi bayi mutiya womaku; enu mwalema kubadika anzwimba amavulu.”—Matewu 10:29, 31.

Nsañu yinakushimwinawu atumbanji twaYesu yikwambula yisaka, amakwawu akwiteja amakwawu akukaana. Yesu nalumbululi nindi: “Bayi mutoñojoka nenu nenjili nakuleta kuwunda hamasekiku.” Eña, chakeñekaña kwikala wahamuka hakwila muntu wamuchisaka eteji chalala. Yesu nahoshi nindi: “Muntu wejima wakeñesha tata yindi hela mama yindi kubadika ami, hanateleli kwikala kambanji kamiku; nawa muntu wejima wakeñesha mwanindi weyala hela wamumbanda kubadika ami, hanateleli kwikala kambanji kamiku.”—Matewu 10:34, 37.

Hela chochu, amakwawu akuyitambwila chiwahi atumbanji twindi. Nahoshi nindi: “Muntu wejima wukwinka wumu hakachi kanawa akehelamu kaapu kamenji atuuta hohu muloña hikambanji, inakuyileja chalala nami, wakatambula wufwetu windi.”—Matewu 10:42.

Hanyima yakuyinka nshimbi, kuyisoñamisha nikuyikolesha, apostolu anayi “kumukala nimukala nakushimwina nsañu yayiwahi nikuuka antu kumaluña ejima.”—Luka 9:6.