Yesu nashimwini hama hadi yaaka yiyedi. Iyi himpinji yakukeheshaku kuzata nikunooka? Inehi, Yesu natandishi mudimu wakushimwina “nakuhitañana munyisumba nimunyikala yejima [yamuÑaliliya], nakuyitañisha mumasinagogi awu nikushimwina nsañu yayiwahi yaWanta nikuuka nyisoñu niyikatu yeñi-nayeñi.” (Matewu 9:35) Yuma yinamoniyi yinamuleteshi kuzata nankashi mudimu wakushimwina. Wukuwuzata ñahi?

Yesu chinakuhitañanayi, namoni antu anakukeñeka kuyidizisha chalala nikuyikundeja. Adi neyi nyikoku yakadi kabiña, anakukabakana nawa anayumbi chisayikila. Nayitiyili wushona nawa nayileji atumbanji twindi nindi: “Chalala, mudimu wakwaañula weneni, ilaña akakukalakala anakehi. Dichi, mulombenu Mwini mudimu wakwaañula kulonda atemeshi akakukalakala kumudimu windi wakwaañula.”—Matewu 9:37, 38.

Yesu neluki chikukwashana. Natambiki apostolu indi 12 nawa nayaambuli ayedi-ayedi, mumazanvu 6 awakakushimwina. Kuhiñahu nayinki nshimbi nindi: “Bayi muya munjila yanyuzaku nawa bayi mwiñila mumusumba wejima wawaSamariyaku; ilaña, muyeña hohu kudi anyikoku ajimbala amwitala daIsarela. Chimukuyaña, shimwinenuña nenu: ‘Wanta wamumawulu wunaswini dehi kwakwihi.’”—Matewu 10:5-7.

Wanta wunakuya nakushimwinawu, hiWanta wateneniyi Yesu mukulomba kwachitalilu. ‘Wanta wunaswini kwakwihi’ muloña Mwanta atondawu kudi Nzambi Yesu Kristu, nenzi dehi. Chumanyi chikumwekesha nawu atumbanji twindi anakwimenaku  iwu Wanta? Yesu nayinki ñovu yakuuka yikatu nikusañula afu, chawana. Hanu apostolu akwikala ñahi nayakuda niyuma yinakukeñeka?

Yesu nayileji atumbanji twindi kubula kudikeñela yuma yakuzatisha hampinji yinakuya nakushimwinawu? Hiyatela kusenda wuru, siliva hela wuneñu muyola yawuku. Hiyatela kusenda yakuda halwendu lwawu hela yakuvwala yikwawu ninkwabiluku. Muloñadi? Yesu nayileji nindi: “Mukakukalakala atelela kumwinka yakuda.” (Matewu 10:10) Antu akuwanawu akwiteja nsañu yikuyishimwinawu diwu akuyinka yuma yakeñekaña. Yesu nahoshi nindi: “Mwitala dejima mumukwiñila, shakamenu mwenomu nichimwakafuma munodu iluña.”—Maku 6:10.

Yesu nayileji cheñi chikushimwinañawu antu hamatala nsañu yaWanta, nindi: “Chimweñila mwitala, imushenu antu amunodu itala. Neyi itala dinateleli, kuwunda kwenu kwiikali hanodu itala; ilaña neyi dinateleli wanyi, kuwunda kwenu kufunti kudi enu aweni. Kwejima kukubula kuyitambwilawu kudi muntu hela kutiyilila kumazu enu, hakufuma munodu itala hela musumba, totomonenu lunkuñu kunyendu yenu.”—Matewu 10:12-14.

Mpinji yikwawu musumba hela mukala wejima wunateli kukaana nsañu yayiwahi. Chumanyi chikamwekena iluña damuchidiwu? Yesu namwekeshi nindi iwu musumba akawusompesha chatama. Nalumbululi nindi: “Nakuyileja chalala nami, Hefuku daKusompesha, chakamukalila nankashi iwu musumba kubadika ituña daSodoma naGomora.”—Matewu 10:15.