Yesu, Petulu Yakoba niYowanu chinakunkumukiwu kufuma kumpidi, anawani izaza deneni. Hadi chuma chinaluwankani. Ansoneki anayihwili atumbanji nakuditadeka nawena. Antu anahayami chinamumoniwu Yesu, nawa anenzi nakumwimusha. Nayihuli nindi: “Yumanyi yimunakuditaadika nawu?”—Maku 9:16.

Muntu wumu nafumi hezaza nenzi nakumufukamina Yesu nawa nalumbululi nindi: “Ntañishi, naleta mwanami kudi eyi muloña wudi naspiritu wamukañeshaña kuhosha. Neyi yamukwata, wamudimbwishaña chakwila watupulaña kafulolu nikudisumona kumazewu nawa ñovu yamumanaña. Nayileja atumbanji tweyi nami amufumishi, ilaña akañanya.”—Maku 9:17, 18.

Hadaha ansoneki anakuyidimbulula atumbanji muloña wakwila anakañanyi kumuuka kansi weyala, hadaha anakuyiseha chinakañanyiwu. Chatela amwakuli tata yawantu wunakabakani, Yesu nakuleja izaza dejima nindi: “Enu ikiñu dabula chikuhwelelu nawa datama, nakatwalekahu kushakama nanenu kushika mpinjinyi? Nakadiwula yilwilu yenu kushika mpinjinyi?” Awa mazu anayikundami ansoneki anadiña nakukabisha atumbanji twindi hamesu indi. Kuhiñahu Yesu nabalumukili kudi tata yawantu wunakabakani nakumwila nindi: “Muletenu kudi ami.”—Matewu 17:17.

Iwu kansi weyala chinakwinzayi kudi Yesu, ndemoni yidi mudi yena yinamudimbwishi hamaseki nakumukonyesha. Iwu kansi natwalekihu kwalañana hamaseki nawa natupuli nikafulolu kukanwa. Yesu namwihuli tata yindi nindi: “Chumichi chamutachikili mpinjinyi?” Yena namwakuli nindi: “Kufuma tuhu kuwansi, nawa kakavulu wamudimbwishilaña mukesi nimumenji kulonda yamukisañani.” Iwu iyala nalembi kudi Yesu nindi: “Neyi wukutwesha kumuuka, tutiyili wushona nawa tukwashi.”—Maku 9:21, 22.

 Tata yawantu naluluti nankashi, muloña niatumbanji twaYesu akañanya kumukwasha. Yesu namukoleshi iwu muntu wunaluluti nindi: “Chiwunahosheli neyi, ‘Neyi wukutwesha kumuuka’! Muloña kudi muntu wukweti chikuhwelelu yuma yejima yikutwesheka.” Hohenohu tata yawantu nabidiki nindi: “Nikweti chikuhwelelu! Nkwashi niikali nachikuhwelelu chakola!”—Maku 9:23, 24.

Yesu namoni izaza dinakwinza kudi yena lufuchi. Chinamoniyi yuma yejimiyi, Yesu namuzuwili ndemoni nindi: “Eyi spiritu wakañeshaña kuhosha nawa wajikaña matu, nakuleji nami fumaku mudi iwu mwana nawa bayi wiñilamu cheñiku!” Ndemoni chinakufumayi mudi mwana namuleteshi kukaloka nikudinatola. Kufumahu kansi weyala nakaami chakadi nikudinyinkesha. Antu amavulu chinamoniwu chumichi, anakuhosha nawu: “Nafwi!” (Maku 9:25, 26) Ilaña Yesu chinamukwatiyi kuchikasa, nanyamuki nawa nakoli “hayoyenoyu mpinji.” (Matewu 17:18) Antu anahayami chikupu hayuma yinakwilayi Yesu.

Hakusambila, mpinji yatemesheli Yesu atumbanji twindi kuya nakushimwina, atwesheli kufumisha ndemoni. Ichi dinu adi kwankawawu mwitala, anamwihuli Yesu nawu: “Twakañenyadi kumufumisha?” Yesu nalumbululi nindi muloña wakubula chikuhwelelu, nahoshi nindi: “Ndemoni wamuchidiwu watela kufuma hohu nakulomba.” (Maku 9:28, 29) Ateleleli kwikala nachikuhwelelu chakola nikulomba ñovu yaNzambi hakwila nawu afumishi ona ndemoni.

Yesu nakunkululi nindi: “Inakuyileja chalala nami, neyi mukweti chikuhwelelu chesekana naluchacha lwamositadi, mukuleja iyi mpidi nenu, ‘Fumaku aha wuyi hana,’ yikufumahu, dichi kwosi chuma nichimu chimukukañanyaku.” (Matewu 17:20) Chikuhwelelu chikweti ñovu!

Kukala hela yihuñu yatukañeshaña mumudimu waYehova yinateli kumwekana neyi chuma chakala nankashi nawa neyi mpidi. Ilaña neyi twikala nachikuhwelelu, tunateli kushinda yihuñu nikukala kudi neyi mpidi.