Chinakaaniwu nawu Yesu hanakufumisha andemoni nañovu yaNzambiku, ansoneki niaFwarisi anamwekeshi nawu anakutuka spiritu yajila. Hela chochu, kukabadi kanyi kwakwikalawu, kaSatana tahindi kaNzambi? Yesu nindi: “Hela chakwila mukubalumuna mutondu kwikala wawuwahi ninyikaabu yawu kwikala yayiwahi, hela kubalumuna mutondu kwikala watama ninyikaabu yawu kwikala yatama, mutondu awilukilaña kunyikaabu yawu.”—Matewu 12:33.

Dichi hiwusupi kuhosha nawu mukaabu wawuwahi wakufumisha andemoni wunakufuma mukumukalakela Satana. Neyi chashimwiniyi Yesu muMpanji yindi yahaMpidi, mukaabu wawuwahi dikwila nawu mutondu hiwatokaku. Indi nyiloña yinakumutwikawu Yesu kudi aFwarisi yinakumwekesha chumanyi? Yinakumwekesha nawu atoka. Yesu nayileji nindi: “Enu anyana katubandayuula, munateli kuhosha ñahi yuma yayiwahi henohu mwatama? Muloña yuma yidi mumuchima diyahoshañayi muntu.”—Matewu 7:16, 17; 12:34.

Eña, mazu itwahoshaña amwekeshaña yuma yidi mumuchima nawa dihu hakatusompeshelawu. Dichi Yesu nahoshi nindi: “Inakuyileja nami Hefuku daKusompesha antu akalumbulula kudi Nzambi hayuma yejima yamukunkulwayi yahoshañawu; muloña akakutena kuloña namazu iwahoshaña, nawa akakufwisha namuloña namazu iwahoshaña.”—Matewu 12:36, 37.

Hichikweti muloña nanyidimu yañovu yinakwilayi Yesuku, ansoneki niAfwarisi anakukeña kumwenahu yinjikijilu yayivulu, anamwili nawu: “Ntañishi, tunakukeña wutumwekesheli chinjikijilu.” Hela chakwila anamoni Yesu nakwila yihayamisha hela nehi, kudi ayinsahu amavulu anamoni yuma yinakwilayi. Dichi Yesu nayileji awa akulumpi jawaYudeya nindi: “Ikiñu datama nawa dabula kushinshika kudi Nzambi dakeñaña chinjikijilu, ilaña kwosi chinjikijilu chakamwekeshelawu idi ikiñuku, chiña chinjikijilu chakaprofwetu Yona hohu.”—Matewu 12:38, 39.

Yesu nayishiyi hohu kulonda atoñojokeña munatalishiyiku, nahoshi nindi: “Neyi chadiñayi Yona mwivumu danshi weneni mafuku asatu mwaana niwufuku, niMwana kamuntu wakekala mwijamu mafuku asatu mwaana niwufuku.” Yona amuminini kudi inshi weneni ilaña wafuminimu neyi anamusañuli. Dichi Yesu washimwineñahu dehi nindi yena wukafwa nawa hefuku damuchisatu akamusañula. Hela chochu, neyi chumichi chinamwekani akulumpi jawaYudeya anakaani ‘chinjikijilu chaYona,’ anakaani kubalumuka nikuhimpa. (Matewu 27:63-66; 28:12-15) Kwambukaku, “antu amuNiniva” abalumukili hanyima yakuyishimwina kudi Yona. Dichi idi ikiñu akadifwisha namuloña. Yesu wahosheli cheñi nindi kuhitila muyuma yeliliyi, mwanta wamumbanda wakuSheba wakayifwisha namuloña.  Wafwilileña kutiya maana adiña naSolomoni nikuhayama maanindi. Dichi Yesu nahoshi nindi, “muntu wabadika Solomoni wudi hanu.”—Matewu 12:40-42.

Yesu nesekeji chuma chinamwekeni idi ikiñu datama namuntu munakufuma aspiritu azonda. (Matewu 12:45) Chineli iwu iyala hanatachiki kwila yuma yayiwahi hanyima yakumufumishawu, aspiritu atama anafunti mudi yena nawa aspiritu atama 7 aneñili mudi yena. Munjila yoyimu, muza waIsarela awutookesheli nikuwufuntisha neyi iyala afumishiliwu aspiritu atama. Ilaña muza wakaanini atuprofwetu twaNzambi, nawa wenjili nakumukaana iwu Yesu wukweti spiritu yaNzambi. Chumichi chinakumwekesha nawu iwu muza watamini nankashi kubadika hakusambila.

Iku Yesu wuchidi kuhosha, mama yindi niamanakwindi anenzi nawa anemani kunsa yezaza. Amakwawu anashakami kwakwihi nayena anahoshi nawu: “Mama yeyi nianakweyi anemani hanji, anakukeña kukumona.” Dichi Yesu namwekeshi chikupu chadikundayi chikupu nawatumbanji twindi, adi neyi amanakwindi, ahela jindi nawa amama jindi. Nololi chikasa chindi nakwinyika kudi atumbanji twindi nindi: “Mama yami nianakwami diwu awa atiyaña izu daNzambi nikwilamu.” (Luka 8:20, 21) Dichi namwekeshi nindi hela chakwila wadikunda chikupu nawantaña jindi, ilaña wubwambu wukwetiyi nawatumbanji twindi wabadika chikupu. Chumichi chinatukoleshi nankashi hakudikunda nankashi nawamanakwetu nihela sweje-e neyi amakwawu anakutwijinooka hela kutusawula nanyidimu yayiwahi yitunakuzata!