Hanashimbuli wanyi kufuma hokayi muntu wakata kalepa, Yesu natwalekihu muKaperinamu kwakwihi naKaluñalwiji kaÑaliliya. Cheñi, mazaza anenzi kudi yena nawa natachiki kuyitañisha. Chinakwendayi, namumoni Matewu, atenañawu cheñi nawu Levi nashakami mukasanji kanyisonku. Yesu namuleji nindi: “Ikalaku mukakunlondela.”—Matewu 9:9.

Hadaha, Matewu neluki dehi nsañu yinakutañishayi Yesu ninyidimu yinakukoñayi mwiluña, neyi chelukiliwu aPetulu, Anderi, Yakoba niYowanu. Matewu natachiki kumulondela neyi cheliliwu wena. Matewu nashimuni chumichi munsañu yasonekeliyi nindi: “Hohenohu [Matewu yomweni] wanyamukili nakumulondela,” Yesu. (Matewu 9:9) Dichi, Matewu nashiyi mudimu windi wakutambula nyisonku nawa nekali kambanji kaYesu.

Chimunahiti mpinji, hadaha nakufwila kusakilila hamutambi, wamutambikiliwu kudi Yesu, Matewu nekali nachawija cheneni mwitala dindi. Anyi anatambikiyi kubombela hadi Yesu niatumbanji twindi? Akwawu adikundileñayi nawu niakwawu akakutambula nyisonku anenzi. Ayitambwilaña nyisonku ayilolu jawaRoma, kushilahu nyisonku yajimbopolu yafumaña kuyikumu, nyisonku yamatemba ahitaña munyikwakwa yamaneni, ninyisonku yayuma yinakulandawu kufuma kwacheñi. Indi aYudeya ayimonaña ñahi akakutambula nyisonku? Antu ayihela muloña kakavulu atambulaña mali amavulu kubadika hanyisonku. ‘Akanshidi’ niwena anenzi kuchawija, antu elukawu nawu akoñaña yuma yatama.—Luka 7:37-39.

Chinamumoniwu Yesu nawantu amuchidiwu, aFwarisi adimonaña kuloña adi hachawija anayihuli atumbanji twindi nawu: “Muloñadi ntañishi yenu chadiilañayi hamu nawakakutambula nyisonku niakanshidi?” (Matewu 9:11) Yesu chanatiyiyi chinakuhoshawu nayakuli nindi: “Antu akola hiyakeñaña ndotoluku, chiña akata. Dichi, yenu mwakadizi mwatalisha awa mazu akwila nawu: ‘Nakeñi luwi, bayi mulambuku.’ Muloña nenjili nakutambika akanshidi, bayi aloñaku.” (Matewu 9:12, 13; Hoseya 6:6) AFwarisi hela chakwila anakumutena Yesu nawu “ntañishi” amudiwula, ilaña anateli kudizilaku kudi yena yuma yayivulu hayuma yaloña.

Chakadi nikujina, Matewu natambiki akakutambula nyisonku niakanshidi kwitala dindi kulonda atiyilili kudi Yesu nawa ayuuki kuspiritu, “muloña antu amavulu adiña nakumulondela.” (Maku 2:15) Yesu nakukeña ayikwashi ekali nawubwambu wawuwahi naNzambi. Kwambukaku nawaFwarisi adimonaña kuloña, Yesu nayidiwuli wanyi antu amuchidiwu. Chineli nayitiyili wushona niluwi; nateli kuyuuka kulonda ekali nawubwambu wawuwahi naNzambi.

Yesu nayitiyili luwi akakutambula nyisonku niakanshidi, bayi neyi neteji nshidi jawuku, ilaña nayitiyili luwi neyi lwatiyililiyi antu akata yikatu. Chakutalilahu, anukenu chelili amukwati mukambumba iku namutiyili wushona, nindi: “Nakeñi! Tookaku.” (Matewu 8:3) Komana ninetu kwila tutiyilaña antu wushona nikuyikwasha kulonda ekali amabwambu jaNzambi nehi?