Antu anakwiteja yuma yinakuhosha Yesu nawa yinakwilayi kwesekeja nachidi yilwilu yawu. Ichi dichuma chinamwekani mwitala muÑaliliya. KaFwarisi wejina daShimona namutambiki Yesu nakudiila hamu nindi, hadaha nakukeña amumweshi muntu wunakuzata nyidimu yakuhayamisha. Yesu namoni nindi iyi himpinji yayiwahi yakuyishimwina antu, nawa neteji mutambi neyi chetejeliyi mpinji yikwawu yamutambikiliwu kudi akukutambula nyisonku niakanshidi.

Hela chochu, Yesu anamutambwili wanyi neyi chatambwilañawu enyi. Muntu neyi nakwenda munyikwakwa yamuPalestine, nkwabilu yatataña nikutama, dichi antu amwekeshaña chisambu kuhitila mukuwelesha enyi kunyendu namenji atuta. Hiyanamutambwilihu nakumufufwa neyi chelañawuku. Kashidikilu kakwawu kelañawu kakumwekeshalamu chisambu niluwi hikuhuñunwina manji munsuki yamwenyi. Hiyanamwilili cheñi Yesu chumichiku. Hanu anamutambwili ñahi?

Anatachiki kuda nawa anashakami kaheña kumesa. Hampinji yinakudawu mumbanda neñili wumweneni mukapeka chakadi kumutambika. Amwiluka “mumusumba nawu himukanshidi.” (Luka 7:37) Antu abula kuwanina ejima hiyakanshidi, ilaña iwu mumbanda welaña yuma yatama muchihandilu chindi, hadaha hichivumbi. Hekwawu, watiyahu dehi yuma yatañishañayi Yesu, kushilahu nimutambi wunakutambikayi ‘antu ejima asenda yiteli yalema kwinza kudi yena kulonda yayinookeshi.’ (Matewu 11:28, 29) Hadaha muloña wakutiya mazu aYesu niyuma yinakwilayi dihanafumi kumukeñakeña.

Nenjili kunyima yaYesu kumesa nawa nafukami kunyendu yindi. Natachiki kuwulumwina madilu kunyendu yaYesu nawa nakuyikombwela nansuki jindi. Natachiki kufufwa kunyendu yindi nikuhuñunwinaku manji evumba dadiwahi asendayi. Shimona nakumumona nawa natiyi kutama nakudihoshesha yomweni nindi: “Neyi iwu iyala mwamweni wadiña kaprofwetu, wadi kwiluka nindi iwu mumbanda wunakumukwata himukanshidi.”—Luka 7:39.

Yesu neluki chinakutoñojokayi Shimona, nahoshi nindi: “Shimona, kudi chuma chinnakukeña kukuleja.” Yena namwakuli nindi: “Ntañishi, nleji!” Yesu natwalekihu nindi: “Kwadiña amayala ayedi adiña namukudi kudi mukakukongwesha; wumu wadiña namukudi wamadenari 500, ilaña mukwawu 50. Chakañenyiwu kumufuntishila mukudi windi, wayanakeneni wejima wawu ayedi. Hanu dinu, hinyi wukumukeña nankashi hadi awa ayedi?” Hadaha nakadiwu Shimona nakuli nindi: “Natoñojoki nami ona anakeneniwu mukudi weneni.”—Luka 7:40-43.

Yesu neteji. Iku nakutala kudi mumbanda, namuleji Shimona nindi: “Wunamumoni iwu mumbanda? Neñila mwitala deyi; eyi hiwanyinka menji akuwela kunyendu yamiku. Ilaña iwu mumbanda wazowesha nyendu yami namadilu indi nikuyikombwela nansuki jindi. Eyi hiwanfufwaku, ilaña iwu mumbanda kufuma tuhu mpinji yineñila munu, waleka wanyi kufufwa kunyendu yami. Hiwanhuñunwina manji kumutu wamiku, ilaña iwu mumbanda wanhuñunwina manji evumba dadiwahi kunyendu yami.” Yesu namoni nindi iwu mumbanda nabalumuki mumuchima nakuleka yilwilu yindi yatama. Dichi nakunkululi nindi: “Inakukuleja nami, hela chakwila nshidi jindi jajivulu, anajanakeni, muloña namwekeshi kukeña chikupu. Ilaña muntu ananakeniwu chantesha, nikukeña kwindi kwantesha.”—Luka 7:44-47.

Yesu nakwiteja wanyi yilwilu yatama. Ilaña nakumwekesha nindi nakutiyila wushona antu akoñaña nshidi jasweja ilaña amwekeshaña nawu anabalumuki nakwinza kudi Kristu kulonda ayamwini. Nawa iwu mumbanda natiyi kuwaha chinamulejiwu kudi Yesu nindi: “Anakwanakeni nshidi jeyi. . . Chikuhwelelu cheyi chinakwamwini; yaña mukuwunda.”—Luka 7:48, 50.