Hanyima yakubalumuka nikuuka kansi weyala wadiña nandemoni mwiluña damuKesareya Fwilipi, Yesu nayi kuKaperinamu. Nayi nawatumbanji twindi mukuswamujoka kulonda mazaza awantu ‘abuli kwiluka chumichi.’ (Maku 9:30) Chumichi chinamwinki cheñi mpinji yakuyiloñesha atumbanji twindi hakufwa kwindi nimudimu wukushala nakuzatawu. Nalumbululi nindi: “Mwana kamuntu akumuhana mumakasa awantu, nawa wena akumujaha, hefuku damuchisatu akamusañula.”—Matewu 17:22, 23.

Iyi hinsañu yayiha kudi atumbanji twindiku. Yesu wahoshelihu hakusambila nindi akamujaha, hela chakwila Petulu wetejeli wanyi nindi chatela kumwekana. (Matewu 16:21, 22) Nawa apostolu asatu amweniku chabalumukiliyi nawa atiyili nsañu yahosheleñawu “hakuya” kwaYesu. (Luka 9:31) Ichi akakumulondela “[ananeñi] nankashi” nayuma yinakuhoshayi Yesu, hela chakwila anatiyishishi wanyi kulema kwamazu indi. (Matewu 17:23) Hela chochu, anakutiya woma wakumwihula cheñi.

Chimunahiti mpinji anenzi muKaperinamu, mwiluña munazatiliyi Yesu nyidimu nawa mumukala wawapostolu amakwawu. Kweniku, amayala atambulaña nyisonku mutembeli anamuwani Petulu. Hadaha anakufwila kumwinka Yesu nyiloña nawu wafwetaña wanyi nyisonku, anehuli nawu: “Komana ntañishi yenu hahanaña musonku [wamutembeli] wamadirakima ayediku?”—Matewu 17:24.

Petulu nakuli nindi: “Eña.” Chinafuntiwu kwitala, Yesu neluki dehi chuma chinamwekani. Chatela amuhembeleli Petulu kuhosha iyi nsañu, Yesu namwihuli nindi: “Wukuhoshahu neyidi Shimona? Komana anyanta ahanu hamaseki atambulaña nyilambu hela nyisonku kudanyi? Kudi anyanawu tahindi kudi antu acheñi?” Petulu namwakuli nindi: “Kudi antu acheñi.” Kuhiñahu Yesu nahoshi nindi: “Diimu, dichi anyana hiyatela kuhana nyisonkuku.”—Matewu 17:25, 26.

Tata yaYesu diyi Mwanta wakuleña kwejima nawa Yena diyi adifukulañaku hatembeli. Dichi, Mwana kaNzambi hatela kufweta musonku watembeliku. Kuhiñahu Yesu nahoshi nindi: “Dichi hakwila nawu tubuli kuyihukesha, yaku kukaluñalwiji, wuumbili ilowa hamenji nawa wunoni inshi iwukusambila kulowa wumwasamishi mukanwa, wukuwanamu iwayawaya [tetiradirakima] dasiliva. Wudisendi wuyinki, kulonda wufwetimu musonku wami niweyi.”—Matewu 17:27.

Katataka atumbanji adi hamu nawa anakukeña kumwihula Yesu kulonda eluki wabadika chikupu muWanta. Awa amayala wowamu, hanyima atiyili woma wakumwihula Yesu kutalisha hakufwa kwindi kunakwinza, ilaña ichi analeki kutiya woma wakumwihula kulonda eluki mbidi yawu. Yesu neluki yuma yinakutoñojokawu. Hichuma chadiña nakuditadikishawu hashalawu hanyima hampinji yafuntañawu kuKaperinamu. Dichi nayihuli nindi: “Mwaditaadikañadi munjila?” (Maku 9:33) Atumbanji anatiyi nsonyi, dichi anamwenihu, muloña adiña nakuditadikisha mulwawu nawu hinyi wabadika. Nkumininaku, apostolu anamwihuli Yesu lwihu lwahanjekañawu, nawu: “Hinyi wabadika chikupu muWanta wamumawulu?”—Matewu 18:1.

Atumbanji hiyatela kuditadikishaña hachumichiku muloña anamoni nikumutiya Yesu kwakwihi nayaaka yisatu. Hela chochu, awanina wanyi. Akulila mukwitiya mwalemeshawu nankashi wukulumpi. Kubombelahu, katataka Petulu watiya chamukanawu “nsapi” jaWanta kudi Yesu. Komana  chumichi chikumuletesha kutoñojoka nindi wabadika? Yakoba niYowanu hamwaha dichakutoñojokawu niwena, muloña amumweni Yesu chabalumukiliyi.

Hela chochu, Yesu nayifumbi. Natambiki mwana wanyanya nawa namwimiki mukachi kawu, nawa nayileji atumbanji twindi nindi: “Neyi mubula kubalumuka nakwikala neyi anyana anyanya, himwamba keñila muWanta wamumawuluku. Dichi, muntu wejima wukudizoza neyi iwu mwana wanyanya, yenowu diyi wabadika chikupu muWanta wamumawulu; nawa wejima wukutambwila mwana wanyanya wudi neyi iwu muloña wejina dami, nantambwili ninami nawa.”—Matewu 18:3-5.

Nayitañishi chachiwahi nankashi. Yesu nayihilili wanyi atumbanji twindi hela kuyila nindi adi nalwisu hela kudisamba. Ilaña nazatishi chakutalilahu chachiwahi. Anyana anyanya hiyadimonaña kulema hela kufwila mpuhuku. Dichi Yesu namwekeshi nindi atumbanji twindi niwena atela kwikala neyi chekala anyana anyanya. Nkuminininaku Yesu nakunkululi chuma chatela kudizilaku akakumulondela nindi: “Muntu wukudikehesha hakachi kenu, diyi wabadika.”—Luka 9:48.