Chuma chineliyi Yesu chakudiisha makombakanji muchihayamisha chinayishiki antu hanyichima. Anashikeni dakuhosha nawu “chalala iwu diyi Kaprofwetu ashimwiniwu nawu wakenza mukaayi,” nawa nawu nateli kwikala nyuuli wamuwahi. (Yowanu 6:14; Kuhituluka 18:18) Dichi antu anakukeña kumukwata Yesu kulonda amwilishi kwikala mwanta.

Hela chochu, Yesu neluki chuma chinakukeña kwilawu antu. Naleji izaza kuya nawa naleji atumbanji twindi kufunta muwatu. Kudihi kunakuyawu? Anakuya kuBetisayida kuhiñahu akuya kuKaperinamu. Yena nayi kumpidi nakulomba nkawindi hawuna wufuku.

Iku chejeji chakakweji chinakutoñeka henohu kanda kwiyili nankashi, Yesu namoni watu hahalehi. Mankanda ahakaluñalwiji anakubwankañila nampepela yeneni nawa apostolu ‘anakukabakana kuvuwa watu muloña wampepela yinakufuma kunakuyawu.’ (Maku 6:48) Yesu nakunkumuki hampidi nawa natachiki kwenda hamankanda nakuya kudiwu. Haniyi mpinji “anavuwi dehi kwakwihi namamayilu asatu hela awana.” (Yowanu 6:19) Atumbanji twaYesu anamumoni nakuhita nawa anabidiki nawu: “Himujimu!”—Maku 6:49.

Yesu nayiwundishi nindi: “Kolenu! Yami; bayi mutiya womaku.” Ilaña Petulu namwili nindi: “Mwanta, neyi yeyi, nleji nendi hamenji nakwinza kudi eyi.” Yesu namwakuli nindi: “Inzaña!” Dichi Petulu nafumi muwatu nawa nendi hamenji nakuya kudi Yesu. Ilaña chinamoniyi mpepela yeneni, natiyi woma. Nakaluki nindi: “Mwanta, ñamwini!” Hohenohu Yesu nololi chikasa, namukwati nakumuleja nindi: “Eyi wukweti chikuhwelelu chantesha, muloñadi chiwatachikila kujinoka?”—Matewu 14:27-31.

Petulu naYesu anakandami muwatu nawa mpepela yinawundi. Atumbanji anahayami! Komana atela kuhayama? Neyi eluka “mwatalishili mankendi,” chihayamisha chakoñayi Yesu hamaora antesha anahitihu hadishayi mazaza, adi kuhayama wanyi hakumona nakwenda hamenji nikuwundisha mpepela. Ichi anadifukuli kudi yena, nakuhosha nawu: “Chalala eyi wudi Mwana kaNzambi.”—Maku 6:52; Matewu 14:33.

Hanashimbuli wanyi anashiki kuchana chachiwahi chaGenesareta, kukabeta kakuchidilu kaKaperinamu. Anakasi watu kuchikumu nawa anafumimu. Antu anamwiluki Yesu nawa wena niantu amakwawu amunidi ituña, analeti antu akata kudi yena. Chakwatawu hohu kunzombu yachakuvwala chaYesu chahewulu, anakushikena dakukola hohenohu.

Ilaña, izaza damweni Yesu nakudiisha mazaza muchihayamisha dinamoni nawu Yesu nayi. Dichi chinenzi maatu anyanya kuTiberasi, anakandamimu nawa anayi nakumuwana Yesu kuKaperinamu. Chinashikiwu, anamwihuli nawu: “Rabi, wenza mpinjinyi kunu?” (Yowanu 6:25) Yesu nayizuwili neyi chitukumona.