Mazaza awantu anenzi kudi Yesu muDekapoli kumusela waKaluñalwiji kaÑaliliya. Anenzi nakutiya yuma yinakutañishayi ninakuyuuka, anasendi nyitoña mwakusha yuma.

Hela chochu, chimunahiti mpinji Yesu naleji atumbanji twindi nindi: “Natiyili izaza dawantu wushona, muloña anashakami nanami mafuku asatu nawa adana yakuda. Neyi niyili nami ayi kumatala awu nanzala, akenda kafwa chinzeya munjila nawa amakwawu ashakamaña kwakulehi.” Ilaña atumbanji twindi anamwihuli nawu: “Kudihi kwatela kuwanayi muntu mankendi amavulu akudiisha iwu mukanka kudinu iluña kwabula antu?”—Maku 8:2-4.

Yesu nayakuli nindi: “Mukweti mankendi añahi?” Anamwakuli nawu: “7 niinshi janyanya jantesha.” (Matewu 15:34) Nkumininaku Yesu nayileji antu kushakama hamaseki. Natambuli mankendi niinshi, kuhiñahu nalombi kudi Nzambi nawa nayinki atumbanji twindi kulonda ayinki antu. Ejima anadii nawa anekuti. Mankendi anashalihu anenzali munyitoña 7 hela chakwila amayala 4,000, kushilahu niambanda nianyana anadii.

Chineli Yesu naleji antu nindi ayi, yena niatumbanji twindi anazambukili kuMagadani nawatu kumujika wachikumu chaKaluñalwiji kaÑaliliya. Kweniku, Afwarisi nezanvu dawaSadusi anakumweseka Yesu, anakumwila nawu ayimwekesheli chinjikijilu kufuma mwiwulu.

Yesu chinelukiyi yuma yidi munyichima yawu, nayakuli nindi: “Neyi kuneli melela, mwahoshaña nenu, ‘Kumadiki mwakacha chiwahi, muloña iwulu dinachinani,’ nawa nantetemena mwahoshaña nenu, ‘Lelu kukwikala chishika nimuzowa, muloña iwulu dineli mavu nankashi nawa dinachinani.’ Mweluka kulumbulula chinakumwekana iwulu, ilaña yinjikijilu yampinji mwakañanyaña kuyilumbulula.” (Matewu 16:2, 3) Kuhiñahu Yesu nayileji Afwarisi nawaSadusi nindi kwosi chinjikijilu chakuyinkawu chiña hohu chinjikijilu chaYona.

Yesu niatumbanji twindi anakandami muwatu nawa anayi kuBetasayida kukabeta kasumbwañesha chimunswa namusela kuchikumu chakaluñalwiji. Hampinji yinakuyawu, atumbanji ananuki nawu ajimbalaku kusenda mankendi. Adi hohu nadinkendi dimu. Chinelukiyi yuma yidi muyitoñojoka yawaFwarisi niaSadusi amuhakwilañaku Herodi, Yesu nayileji nindi: “Tonenuña nawa babalenu neluñi dawaFwarisi niiluñi daHerodi.” Atumbanji twindi anatoñojoki mwaluwa nawu chinakutenayi iluñi nakutena chinabuli kusendawu mankendi. Yesu chinamoniyi nindi anakutoñojoka mwaluwa nayileji nindi: “Muloñadi chimunakuditaadikishila hamuloña wakwila mudana dinkendi.”—Maku8:15-17.

Katataka Yesu wadiisha makombakaji awantu mankendi. Dichi atumbanji atela kwiluka nawu hanakwakama hakubula kwikala namankendiku. Nayihuli nindi: “Komana munakwanuka wanyi mankendi atanu inahumwini adiiliwu kudi amayala 5,000? Kuvula kwayimpaaya yiñahi yayakuda yashalilihu yimwasendeli?” Wena anamwakuli  nawu: “12.” Yesu natwalekihu nindi: “Chinahumwini mankendi 7 adiiliwu kudi amayala 4,000, kuvula kwayimpaaya yamaneni yiñahi yimwasendeli yenzeli to-o nayakuda yashalilihu?” Wena anamwakuli nawu: “7.”—Maku 8:18-20.

Yesu nayihuli nindi: “Hanu dinu munakañanyi ñahi kwiluka nenu hinayilejaña hadinkendiku?” Nabombelihu nindi: “Ilaña nami babalenu neluñi dawaFwarisi niaSadusi.”—Matewu 16:11.

Nkumininaku, atumbanji anachitiyishi. Iluñi dayilishaña nikuvuvumuna mankendi. Yesu nakuzatisha iluñi muchifwikija kwimenaku yuma yaluwañeshaña. Nakuyisoñamisha atumbanji kwikala ababala “nantañishilu yawaFwarisi niaSadusi,” yaluwañeshaña.—Matewu 16:12.