AYudeya ashakamaña kukabeta kasumbwañesha chimunswa namujika kuchikumu chaKaluñalwiji kaÑaliliya, anatiyi nawu Yesu nakufunta kufuma kuDekapoli. Chakadi nikujina, hikwadiña mpepela yeneni, amavulu atiya nawu Yesu wamwenesha mpepela yeneni nimenji, nawa woka antu adiña nandemoni. Dichi, “izaza deneni dawantu” dinapompi kukaluñalwiji, mwiluña daKaperinamu kulonda dimutwambili Yesu. (Maku 5:21) Chinashikiyi kuchikumu, anatiyi kuwaha nankashi.

Muntu wunakukeña nankashi kumumona Yesu hiJayirusa, nlomboli wamusinagogi, hadaha yekala muKaperinamu. Nadimbukili kunyendu yaYesu nakumulembelela nindi: “Mwanami wanyanya wamumbanda wakata nankashi. Nalembi, tuyi wakamunañiki makasa eyi kulonda akoli nawa ahandi.” (Maku 5:23) Yesu wukwila ñahi hakwila amukwashi Jayirusa wunakumulembelela nindi amukwashi mwanindi wumu hohu wudi nayaaka 12 nawa akeñayi chikupu?—Luka 8:42.

Chinakuyayi kwitala daJayirusa, nawani chuma chikwawu chakuneñesha. Antu anakumulondela Yesu anatiyi kuwaha, anakukeña kumona neyi wukukoña chihayamisha chikwawu. Hela chochu, mumbanda wumu wudi hakachi kezaza nashi muchima hachikatu chindi.

Hadi yaaka 12, iwu mumbanda kaYudeya wakata chikatu chakupweka mashi. Nakeñikeñi wukwashu kudi andotolu amavulu nawa nombi mali indi ejima hayuma yamulejeleñawu nawu yikumukwasha. Ilaña hakolañaku. Kafwampi, kukala kwindi ‘kunaswejeliku.’—Maku 5:26.

Mukwiteja nenu chikatu chindi, chamuzeyeshaña nawa chamutiyishaña nsonyi nikumusawisha. Kakavulu chakala nankashi antu kushimuna nawu nakata ichi chikatu. Kubombelahu, muNshimbi jaMosi, mumbanda wunakupweka mashi amumonaña nawu wamajilu. Muntu wejima wukumukwata hela kukwata kuchakuvwala chindi chidi namashi watela kuwela nawa wukwikala wamajilu kushika melela.—ALevi 15:25-27

Iwu mumbanda “natiyi mpuhu yaYesu,” nawa ichi nakumukeña. (Maku 5:27-29) Chineli wamajilu, nahiti mwizaza mukuswamujoka nakudihoshesha yomweni nindi: “Neyi nikwata hohu kuyakuvwala yindi yahewulu, nukukola.” Chinakwatiyi hohu, kunzombu yachakuvwala chindi, hohenohu mashi analeki kupweka! Natiyi “mumujimba windi nindi nakoli.”—Maku 5:27-29.

Kuhiñahu Yesu nahoshi nindi: “Hinyi wunankwati?” Munakutoñojoka nenu iwu mumbanda watiyili ñahi chatiyiliyi awa mazu? Petulu nahayami nakuhosha nindi: “Ntañishi, mazaza awantu anakukunyeñumuka nikukuwuña.” Hanu dinu muloñadi Yesu chinehwiliyi nindi: “Hinyi wunankwati?” Yesu nalumbululi nindi: “Kudi wankwata, muloña natiya ñovu yafuma mudi ami.” (Luka 8:45, 46) Eña, iku kuuka kunamwekani kunamuleteshi Yesu kumana ñovu.

Chinamoniyi nindi anamwiluki dehi, iwu mumbanda nadimbuki kunyendu yaYesu, iku nakutiya woma nikuzaala. Nashimuni chikatu chindi hamesu awantu amavulu nawa nindi nakoli. Yesu namukundeji nindi: “Mwanami, chikuhwelelu cheyi chinakukoleshi. Yaña mukuwunda nawa musoñu weyi wumani.”—Maku 5:34.

Chakadi nikujina, Owu atondawu kudi Nzambi nawu akayuuli iseki wekala chiwahi, himuntu wukweti wushona, wakamenaña antu nawa wukweti ñovu yakuyikwasha!