Yesu niatumbanji twindi anashiki muBetasayida. Kuhiñahu antu analeti mputa mesu nawa anakumulembelela Yesu nawu amuuki.

Yesu namukwati kuchikasa nawa namutwali hanji yamukala. Hanyima yakumufwijila mazeñi mumesu, Yesu namwihuli nindi: “Wunakumonahu yuma yidi yejima?” Iwu iyala namwakuli nindi: “Inakumona antu, ilaña anakumwekana neyi nyitondu yinakwenda.” (Maku 8:23, 24) Yesu chinakwatiyi hamesu indi, natachiki kumona. Namuleji iwu iyala wunatachiki kumona chiwahi nindi ayi, nawa nindi bayi eñila mumukalaku.

Kuhiñahu Yesu niatumbanji twindi anayi kumujika kwiluña damuKesareya Fwilipi. Himukandu wawulehi chikupu, hekala makilomita kwakwihi na 40. Iwu mukala wekala hewulu mamita 350 kufuma hakaluñalwiji, kuMpidi yaHerimoni yekala kukabeta kasumbwañesha chimunswa namusela kwanokaña nvula yachishika. Hadaha ilu lwendu lunayisendeli mafuku amavulu.

Heluña dimu munjila, Yesu nasenuki nakulomba nkawindi. Kunashali tukweji 9 hela ikumi nakufwa kwindi, nawa Yesu nakwakamena atumbanji twindi. Amavulu aleka kumulondela nawa amakwawu hadaha analuwankani hela kuneña. Hadaha anakutoñojoka nawu muloñadi chayikaaninayi antu akeña kumudisha wanta hela muloñadi wunabuliliyi kumwekesha chinjikijilu kulonda amwiluki?

Atumbanji chinenziwu kunakulombelayi, Yesu nayihuli nindi: “Indi antu anakuhoshaña nawu Mwana kamuntu hinyi?” Anamwakuli nawu: “Amakwawu anakuhoshaña nawu Yowanu Mpapatishi, amakwawu nawu Elija, amakwawu niwena nawu Yeremiya hela wumu hadi atuprofwetu.” Eña, antu atoñojokaña nawu Yesu watela kwikala wumu hadi awa amayala anasañuliwu. Nakukeña kwiluka chinakutoñojokawu, dichi Yesu nayihuli nindi: “Indi enu mwahoshaña nenu yaminyi?” Petulu nashikeni dakwakula nindi: “Yeyi Kristu, Mwana kaNzambi wamumi.”—Matewu 16:13-16.

Yesu nahoshi nindi Petulu wudi namuzañalu muloña Nzambi namusolweli chumichi, nabombelihu nindi: “Yeyi Petulu, nawa hanidi ilola nakatuñilahu chipompelu chami, nawa yiisu Yejamu hiyakachishindaku.” Yesu natalishi mukwila nindi yomwenindi wukatuña chipompelu nawa nindi hela Ijamu hidikatwesha kusha muwunkoli antu jindi neyi atwalekahu kwikala ashinshika hesekiku. Namushiiki Petulu nindi: “Nakakwinka nsapi jaWanta wamumawulu.”—Matewu 16:18, 19.

Yesu hanamwinki Petulu wukulumpi hadi akwawu apostoluku, hela hanamwilishi kwikala chikuku chachipompeluku. Yesu yomweni diyi Ilola hakutuñila chipompelu. (1 AKorinda 3:11; AEfwesesa 2:20) Hela chochu, Petulu watela kutambwila nsapi jisatu. Wukekala namudimu wakwenzununa, kukwasha antu amavulu kwiñila muWanta wamwiwulu.

Petulu wadi kuzatisha nsapi yatachi haPentekosta 33 C.E., kulonda amwekesheli aYudeya abalumukili niantu abalumukili nakwikala aYudeya,  chuma chatela kwilawu hakwila ayamwini. Wukuzatisha nsapi yamuchiyedi kulonda enzunwini aSamariya akuhweleli kulonda ayiteji kwiñila muWanta waNzambi. Kuhiñahu, mu 36 C.E., Petulu wadi kuzatisha nsapi yamuchisatu kulonda akwashi akamatuña abulili kwalama, chidi neyi Konelisu niamakwawu.—Yilwilu 2:37, 38; 8:14-17; 10:44-48.

Muniku kuhanjeka, apostolu aYesu anatiyi kutama chinayilejiyi makabi akumonayi nichakumujahawu katataka muYerusalema. Chineli neluki wanyi nindi Yesu akamusañula nawumi wamwiwulu, Petulu namutwali hambadi nakumuzuwila nindi: “Ditiyili luwi, Mwanta; yumiyi hiyakakumwekena hela hantiku.” Ilaña nabalumuki, nakumwila nindi: “Yaku kunyima yami, eyi Satana! Wudi chuma chakunhukesha, muloña watoñojokaña yitoñojoka yawantu bayi yaNzambiku.”—Matewu 16:22, 23.

Ichi Yesu natambiki apostolu indi niantu amakwawu anakuyileja nindi chaswayi wanyi kwikala kambanji kindi. Nahoshi nindi: “Neyi muntu nakukeña kunlondela, adibondi yomweni nakusenda mutondu windi wakuyandishila nawa atwalekihu kunlondela. Muloña muntu wejima wakeñaña kupulwisha wumi windi, wakawujimbesha, ilaña muntu wejima wukujimbesha wumi windi kukoola ami nihamuloña wansañu yayiwahi, wakawamwina.”—Maku 8:34, 35.

Eña, hakwila ayiteji kudi Yesu, akakumulondela indi atela kwikala ahamuka nawa adihana. Yesu wahosheli nindi: “Muntu wejima watiyaña nsonyi kwikala kambanji kami nawa wabulaña kukuhwelela mazu ami mudinu ikiñu dabula kushinshika nawa datama, Mwana kamuntu niyena hakenzayi mukulema kwaTata yindi hamu nawañelu ajila, wakamutiya nsonyi owu muntu.” (Maku 8:38) Eña, Yesu chakenzayi “wakafweta muntu-himuntu kwesekeja nayilwilu yindi.”—Matewu 16:27.