Chakadi nikujina, antu amuNazareta anazañalali hakumumona. Henohu kanda ayi nakumupapatisha kudi Yowanu kwakwihi nachaaka chimu chinahitihu, Yesu wadiña mukwakusoña munidi iluña. Ilaña ichi anamwiluki nawu himuntu wakoñaña yihayamisha. Antu amwiluña dindi anakufwila kumona chikwilayi yuma yakuhayamisha hakachi kawu.

Nawa antu anatiyi kuwaha nankashi, muloña Yesu nayi kusinagogi neyi chelañayi dikalu. Yuma yinadibombeli kuniku kupompa hikutaña, kulomba nikutaña nyikanda yaMosi neyi chelañawu “mumasinagogi hasabata-hisabata.” (Yilwilu 15:21) Yikunku yamunyikanda yawuprofwetu niyena nakuyitaña. Yesu chinemaniyi nakutaña, hadaha neluki antu amavulu adi musinagogi elukiliyi yaaka yinahitihu. Anamwinki muvuñilu wawuprofwetu waIsaya. Nawani hasonekawu kutalisha hadi wawayishewa naspiritu yaYehova, makonu awa mazu ekala haIsaya 61:1, 2.

Yesu nakutaña nsañu yinakuhosha hadi owu Muntu ashimwineñahu wakashimwina nikubidika kudi ankoli nsañu yakuyisubula, kutonesha amputa mesu nikushimwina nawu mwaka waYehova wunashiki dehi. Yesu nafuntishi muvuñilu kudi kalama nawa nashakami. Antu ejima anamutali chikupu. Kuhiñahu nahoshi, hadaha hampinji yayilehi nawa mazwindi anamani namazu anakwila nawu: “Dalelu, iyi nsona yimunatiyi yinashikijewi.”—Luka 4:21.

Antu anahayami “namazu amawahi [anafumeña] mukanwa kindi,” nawa anadihosheli wumu namukwawu nawu: “Iwu himwana kaYosefu, netu?” Ilaña chinelukiyi nindi anakukeña nawu ayilili yihayamisha neyi yatiyiliwu, Yesu natwalekihu nindi: “Chakadi nikujina awa mazu mukuyikunjika kudi ami nenu, ‘Ndotolu, duuki eyi aweni. Koñaku nimunu mumukala weyi yuma yitwatiyili yiwakoñeli muKaperinamu.’” (Luka 4:22, 23) Antu ashakamineñayi nawu hadaha anakutoñojoka nawu watela ntahi kuuka mumukala weyi, kulonda chiyikwashi antu jeyi. Dichi hadaha anakutoñojoka nawu Yesu neli chiwahi wanyi.

Yesu chinelukiyi yuma yinakutoñojokawu, nahoshi yuma yamwekeni muIsarela. Nahoshi nindi muIsarela mwadiña antuluwa amavulu mumafuku aElija, ilaña Elija hiyamutemeshelihu kudi wumu hakachika kawuku. Ilaña wayili kudi ntuluwa wabula kwikala kaIsarela kuZarefwati, mbaka yekala kwakwihi naSidoni, oku Elija kwakoñeliyi chihayamisha chakupulwisha wumi. (1 Anyanta 17:8-16) Nawa mumafuku aElisha, muIsarela mwadiña antu akata mbumba amavulu, ilaña kaprofwetu watookesheli hohu Nayamani wakuSiriya.—2 Anyanta 5:1, 8-14.

Indi awa antu amumukala waYesu anelidi nansañu yinatiyiwu yakunyima yinakumwekesha nawu adikeña aweni nawa hiyadi nachikuhweleluku? Adi musinagogi anatiyi kutama, ananyamuki nawa anamukwati Yesu nakumutwala hanji yamusumba. Anamutwali hewulu dampidi hatuñilawu Nazareta nawa anakukeña kumunatila mwishina. Ilaña Yesu nayiwomboloki nawa nayi. Yesu nayi kuKaperinamu kukabeta kasumbwañesha chimunswa namujika kuchikumu chaKaluñalwiji kaÑaliliya.