Henohu Yesu nakutañisha antu mwiluña damuKesareya Fwilipi, iluña hadi makilomita 25 kufuma kuMpidi yaHerimoni, nayileji apostolu indi mazu akuhayamisha nindi: “Inakuyileja chalala nami, kudi amakwawu anemani hanu akabula kutompa kufwa sampu anamoni Mwana kamuntu nakwinza muWanta windi.”—Matewu 16:28.

Hadaha atumbanji anakutoñojoka munatalishiyi Yesu. Chimunahiti mulungu wumu, Yesu nasendi apostolu indi asatu aPetulu, Yakoba naYowanu nawa anayi kumpidi. Hadaha kuneyili nankashi, muloña awa amayala asatu anakunoñoka. Mmwekenu yaYesu yinahimpiki iku nakulomba yindi. Apostolu anamoni kumesu indi kunakutoñeka neyi mwaana nawa yakuvwala yindi yinatooki kwato-o neyi chejeji.

Nkumininaku kunamwekani antu ayedi, “Mosi naElija.” Anatachiki kuhanjeka naYesu kutalisha ‘hakuya kwindi, oku kwadi kushikijewela kuYerusalema.’ (Luka 9:30, 31) Iku kuya kwindi kunatalishi kukufwa kwindi kuhiñahu nikusañuka, kwadiña nakushimunayi katataka. (Matewu 16:21) Iyi nsañu yinakuhoshawu yinambukiku nachuma chamulejayi Petulu, kufwa kwaYesu kwakafwayi munjila yakumusawisha hichuma chatela kubula kutondolwelayi.

Apostolu asatu anahinduki nawa anakutona, anakumona nikutiyilila iku anahayami nankashi. Ichi hichimwenu, ilaña chinamwekani neyi chalala chakwila Petulu niyena nadiñijimu, nakuhosha nindi: “Rabi, chidi hohu chiwahi etu kushakama kunu. Dichi tulemenu matenti asatu, dimu deyi, dikwawu daMosi nawa dikwawu daElija.” (Maku 9:5) Komana Petulu nakukeña kutuña matenti kulonda chimwenu chitwalekihu?

Iku Petulu wuchidi kuhosha, ivu ditooka dinayibuti nawa anatiyi izu dinakufuma mwiivu nakuhosha nawu: “Iwu diyi Mwanami, inakeña, inatiyaña kuwaha. Mutiyililenu.” Chinatiyiwu izu daNzambi apostolu anatiyi woma nawa anadinati chamesu heseki, ilaña Yesu nayileji nindi: “Nyamukenu. Bayi mutiya womaku.” (Matewu 17:5-7) Chinahindukiwu, awa apostolu asatu kwosi cheñi wunamoniwu chiña hohu Yesu. Chimwenu chinamani. Kunachi dehi nawa anakukunkumuka hampidi, Yesu nayileji nindi: “Kulejaku muntu chimwenu chimunamoni nehi, sampu Mwana kamuntu anamusañuli mudi afu.”—Matewu 17:9.

Chinamwekaniyi Elija muchimwenu chinaleteshi kwihula lwihu. Chinaleteshi apostolu kwihula nawu: “Muloñadi ansoneki chahoshelañawu nawu Elija watela kusambila kwinza?” Yesu nayakuli nindi: “Elija wenza dehi, nawa hiyamwilukiliku.” (Matewu 17:10-12) Yesu nakutena Yowanu Mpapatishi, wazatili mudimu yowumu nawazatili Elija. Elija wamuloñesheleli njila Elisha, nawa Yowanu niyena dichileliyi naKristu.

Ichi chimwenu chamukolesheli Yesu niapostolu. Hichuma chinakumwekesha kulema kwaWanta waKristu. Dichi atumbanji amweni “Mwana kamuntu nakwinza muWanta windi.” (Matewu 16:28) Iku adi hampidi, adiña “ayinsahu amweni kulema kwindi kwabadika.” Hela chakwila aFwarisi akeñeleña chinjikijilu chinakumwekesha nawu Yesu wadiña Mwanta atondawu kudi Nzambi, yena hayimwekesheleli chinjikijilu hela chimuku. Ilaña atumbanji twaYesu adikunda nindi ayitejeli kumona kubalumuka kwaYesu, kwaditejeli nawuprofwetu waWanta. Dichi Petulu wenjili nakusoneka nindi: “Tukweti izu dawuprofwetu dalala chikupu.”—2 Petulu 1:16-19.