HaSabata yikwawu, Yesu nayi musinagogi, hadaha muÑaliliya. Kweniku nawani iyala walepa chikasa. (Luka 6:6) Ansoneki nawaFwarisi anakumushinshika chikupu Yesu. Muloñadi? Anamwekeshi yuma yidi mumuchima wawu chinamwihuliwu nawu: “Komana nshimbi yeteja kuuka haSabata?”—Matewu 12:10.

Anlomboli jawaYudeya eluka nawu muntu nateli kuumuka hohu haSabata chiña neyi wumi wudi muwubanji. Dichi, chakutalilahu, haSabata chetejewa wanyi munshimbi kukotola ifwa hela kunuña ifwa, chikatu chinateli kubula kufwilahu muntu. Mwamweni awa ansoneki niaFwarisi anakumwihula Yesu bayi neyi anakumutiyila luwi iwu iyala wunakukabakanaku. Anakukeña hohu kuwana hakumwinkela Yesu muloña.

Hela chochu, Yesu neluki yuma yinakutoñojokawu. Neluki nindi anakumona chambuka nachahosha nsona kutalisha hakukaanisha kuzata nyidimu haSabata. (Kwidika 20:8-10) Amwinkahu dehi cheñi muloña wakuzata nyidimu yayiwahi. Dichi, chumichi chinamukwashi Yesu kwinza nakumuleja iwu iyala wakata kalepa nindi: “Nyamukaku winzi hakachi.”—Maku 3:3.

Nabalumukili kudi ansoneki nawaFwarisi nakuyileja nindi: “Neyi wukweti mukoku wumu nawa owu mukoku aholokela mwibuku haSabata, hinyi hakachi kenu wukubula kumukwata nakumufumisha mwibuku?” (Matewu 12:11) Mukoku himali, dichi hiyakumulekela mwibuku sampu niifuku dikwawuku; kuchina wakamba kafwa nawa kwosi chuma chakuwaninamuku. Kafwampi, Nsona jahosha nawu: “Muntu waloña wahembaña chiwahi yimuna yindi.”—Yishimu 12:10.

Kuzatisha iyi nsañu Yesu natwalekihu nindi: “Muntu walema chikupu kubadika mukoku. Dichi chetejewa munshimbi kwila chuma chachiwahi haSabata.” (Matewu 12:12) Yesu hatela kufumpa nshimbi yaSabata neyi amuuka muntuku. Anlomboli jakwitiya anakañanyi kutoñojoka haniyi nsañu, kulonda amoni hakuhanina muloña. Anakumini dakumwenahu.

Nazuwi nawa natiyi kutama nayitoñojoka yawu yaheña, Yesu nakutalatala. Nkumininaku, namuleji iwu iyala nindi: “Ololaku chikasa cheyi.” (Matewu 12:13) Iwu iyala chinololiyi chikasa chindi chalepa, nashikeni dakukola. Nazañalili nankashi, indi antu anakumukwatila kafuta Yesu anatiyi ñahi?

Chatela azañalali nawu iwu iyala anamuuki chikasa chindi, aFwarisi anayi nawa anamushakamini hampuña “hamu nawakakumulondela Herodi kulonda amujahi [Yesu].” (Maku 3:6) Idi izanvu dachiyuulu munadibombeli izanvu dawantu amukwitiya atenañawu nawu aSadusi. Kafwampi, aSadusi nawaFwarisi atiyañanaña wanyi, ilaña ichi anakutiyañana muloña wejima wawu anakudikaña naYesu.