Atumbanji chinashikiwu kuchikuma hanyima yakumona kukala hakaluñalwiji, anamoni chuma chakuhayamisha. Amayala ayedi azuwa, wejima wawu adi nandemoni anakufuma kumajamu, anakutemukila kudi Yesu! Wumu hakachi kawu diyi wunaswejeshi, hadaha nasweji kuzuwa muloña andemoni anamukabishi hadi yaaka yayivulu.

Iwu iyala wendaña hohu kwanzekesi. Mwaana niwufuku, wabilelaña “kumajamu nikumapidi . . . nakuditapola namalola.” (Maku 5:5) Washakamaña mumasaña chakwila antu atiyaña woma kuhita muniyi njila. Amakwawu aneseki kumukasa mumaleñi, ilaña nakuketula maleñi nimpompa munakumushawu nyendu yindi. Kwosi wamubadikaña ñovuku!

Iwu iyala chinakwinzayi kudi Yesu nadimbukili kunyendu yindi, ndemoni yinakumuyuula yinamuleteshi kubidika nindi: “Eyi Yesu, Mwana kaNzambi Mukakubadika Chikupu, wunakukeñadi kudi ami? Inakukusanyikisha mwijina daNzambi nami bayi wumbabeshaku.” Yesu namwekeshi nindi wukweti ñovu chikupu kubadika ndemoni, namwili nindi: “Eyi spiritu wazonda, fumaku mudi owu muntu.”—Maku 5:7, 8.

Andemoni amavulu adi mudi iwu iyala. Yesu chinamwihuliyi nindi: “Ijina deyi yeyinyi?” Yena namwakuli nindi: “Yami Izaza, muloña tudi amavulu.” (Maku 5:9) Izaza dawamashidika awaRoma mwadiña makombakaji amashidika; dichi, andemoni amavulu anahwili mudi iwu iyala nakumukabisha nankashi. Anakulemba kudi Yesu nawu “abuli kuyitwala mwikela.” Hadaha aneluki chuma chikuyimwekena ninlomboli yawu Satana.—Luka 8:31.

Kukamwihi kudi añulu kwakwihi na 2,000 anakuda, anyama amajilu nawa kwesekeja naNshimbi jawaYudeya hiyatela kuyihembaku. Awa andemoni anakuhosha nawu: “Tutemeshi mudi angulu kulonda twiñili mudi wena.” (Maku 5:12) Yesu nayileji kuya, nawa wena eneñili mudi añulu. Haniyi mpinji añulu ejima 2,000 anadumbili mukaluñalwiji.

 Dichi atubiña anakuhemba añulu chinamoniwu chumichi, anayi nakushimuna mumusumba nimunyikala. Antu anenzi nakumona chuma chinamwekani. Chinashikiwu, anamoni iyala wadiña nandemoni nakoli dehi. Navwali nawa nashakami kunyendu yaYesu.

Antu anatiyi hela kumumona iwu iyala anatiyi woma, muloña aneluki wanyi munatalishi yumiyi. Anamuleji Yesu kufuma mwiluña dawu. Yesu chinakandamiyi muwatu nindi ayeña, muntu anafumishiyi ndemoni nakulemba nindi ayi nindi. Ilaña Yesu namuleji iwu iyala nindi: “Yaña kwitala kudi antaña jeyi wuyileji yuma yejima yinakwililiyi Yehova niluwi lunakutiyiliyi.”—Maku 5:19.

Kakavulu Yesu walejaña antu anookiyi kubula kulejaku antu chuma chinamwekani muloña wakeñaña wanyi antu kukunkulula kwesekeja nachinatiyiwu. Ilaña haniyi mpinji, muntu anafumishiwu andemoni nakumwekesha wunsahu wunakushimuna nawu Yesu wukweti ñovu nawa nateli kulejaku antu anabuli kumumona Yesu. Wunsahu wukushimunayi cheñi wukuwundisha wunsahu kutalisha hadi añulu anajimbali. Dichi, iwu iyala nayi nakutachika kushimuna muDekapoli yejima chuma chinamwililiwu kudi Yesu.