Kwishinadi damusela waKaluñalwiji kaÑaliliya, Yesu nadiishi makombakaji nawa nawomboloki chineliwu nawu amukwati nakumudisha wanta. Nawufuku hakaluñalwiji hadiña makanda nawa wamupulwisha niPetulu wenda hamenji niyena, ilaña watachika kujimina chela chikuhwelelu chindi chikehi. Yesu wamwenesha cheñi mpepela, hadaha nikupulwisha atumbanji twindi muwatu wakeñaña kukisika.

Ichi Yesu nafunti kumujiika wakaluñalwiji, mwiluña daKaperinamu. Antu adishiliyi muchihayamisha anamuwani nakumwihula nawu: “Rabi, wenza mpinjinyi kunu?” Yesu nayizuwili, nakuyileja nindi anakumukeñakeña kulonda ayidishi cheñi. Nayileji nindi, “bayi muzatila yakuda yakisikañaku, ilaña zatilenu yakuda yashakamaña haya nyaaka.” Dichi anamwihuli nawu: “Yumanyi yitwatela kwila kulonda tuzati nyidimu yaNzambi?”—Yowanu 6:25-28.

Hadaha anakutoñojoka hanyidimu yashimunawu muNshimbi, ilaña Yesu nakutena mudimu wasweja kulema: “Mudimu waNzambi diweniwu, nawu mukuhweleli mudi owu atemesheliyi.” Hela chochu, antu hiyanamukuhweleli Yesuku, hela chakwila nazati nyidimu yayivulu. Anamuleji nawu yakoñi chihayamisha chikwawu kulonda amukuhweleli. Anamwihuli nawu: “Chumanyi chiwukwila? Ankakulula jetu adiileña manina mwisaña neyi chasonekawu nawu: ‘Wayinkeli yakuda kufuma mwiwulu.’”—Yowanu 6:29-31; Isamu 78:24.

Kutalisha hachinjikijilu chinamulombiwu, Yesu nakuyileja antu kwafumaña yihayamisha nindi: “Inakuyileja chikupu nami, Mosi hayinkeli yakuda kufuma mwiwuluku, ilaña Tata yami wayinkaña yakuda yalala kufuma mwiwulu. Muloña yakuda yaNzambi diyi owu wafuma mwiwulu nawa wenkaña kaayi wumi.” Dichi chineli aneluki wanyi munatalishiyi, anamwili nawu: “Mwanta, wutwinkeña iyi yakuda mpinji yejima.” (Yowanu 6:32-34) Hela chochu, ‘yakudanyi’ yinakutenayi Yesu?

Nalumbululi nindi: “Yami yakuda yawumi. Wejima wukwinza kudi ami, hakatiya cheñi nzalaku, nawa wejima wukunkuhwelela, hakatiya cheñi mpwilaku. Ilaña neyi chinayileja, enu munammoni nikummona, ilaña munankuhweleli wanyi. . . . Ami nenzi kufuma mwiwulu bayi neyi nakwila nkeñelu yamiku, ilaña nakwila nkeñelu yanowu wantemesheli. Iyi diyi nkeñelu yanowu wantemesheli, nindi bayi nijimbeshahu hela wumu hadi ejima anyinkayiku, ilaña nindi nakayisañuli hefuku dakukumishaku. Muloña iyi diyi nkeñelu yaTata yami, nindi wejima wamwitejaña Mwana nikumukuhwelela watela kwikala nawumi wahaya nyaaka.”—Yowanu 6:35-40.

Chumichi chinaleteshi antu kuzuwa nawa aYudeya anatachiki kumutoobela. Nateli kuhosha ñahi nindi yena diyi “yakuda yafumini mwiwulu.” (Yowanu 6:41) Wena aneluki nawu himwana kamuntu, anvwali jindi akuÑaliliya mumusumba waNazareta. Antu anamwihuli nawu: “Komana iwu hidiyi Yesu mwana kaYosefu, wukweti tata yindi nimama yindi itwelukaku?”—Yowanu 6:42.

Yesu nayakuli nindi: “Lekenu kutooba mukachi kenu. Kwosi muntu wunateli kwinza kudi amiku, chiña amukoka kudi Tata wantemesheli, nawa nakamusañula hefuku dakukumishaku. Chasonekewa mumazu awaTuprofwetu nawu: ‘Ejima akayidizisha kudi Yehova.’ Muntu wejima wunatiyilili kudi Tata nawa wunadizi, wenzaña kudi ami. Kwosi muntu wamumonahu dehi Tataku, chiña hohu wafuma kudi Nzambi; iwu diyi wamumonahu dehi Tata. Inakuyileja chikupu nami, muntu wejima wukwitiya, wukweti wumi wahaya nyaaka.”—Yowanu 6:43-47; Isaya 54:13.

Hanashimbuli wanyi kufuma hahoshayi naNikodemu, Yesu wateneni wumi wahaya nyaaka nawa wasumbwañesheli chumichi nakukuhwelela mudi Mwana kamuntu, nindi: “Muntu wejima wukumukuhwelela  [Mwana kaNzambi wumu hohu] akabuli kujilumuka, ilaña akekali nawumi wahaya nyaaka.” (Yowanu 3:15, 16) Ilaña nakuleja izaza deneni nindi wukweti mudimu wakuyikwasha kulonda akekali nawumi wahaya nyaaka, chakwila hela manina hela yakuda yadiña muÑaliliya hiyikutwesha kuyihandishaku. Hanu muntu nateli kwikala ñahi nawumi wahaya nyaaka? Yesu nafuntishihu nindi: “Ami yami yakuda yawumi.”—Yowanu 6:48.

Iyi nsañu yinakuhosha kutalisha hayakuda yafumaña mwiwulu yinatwalekihu, kushika nimpinji yinakutañishayi Yesu musinagogi muKaperinamu.