Hanyima yakuhosha hakwanakena mwitala dakaFwarisi Shimona, Yesu natachikili lwendu lukwawu lwakushimwina muÑaliliya. Ichi dichaaka chamuchiyedi chamudimu windi nawa hadi kankawindiku. Wudi nawapostolu 12, kushilahu niambanda “okiliwu yikatu nikuyifumisha aspiritu atama.” (Luka 8:2) Hakachi kawu hadi Mariya Mandaleni, Suzana niYowana, wukweti nfumwindi mushidika waMwanta Herodi Antipasi.

Antu amavulu chinakumwilukawu Yesu, anakwambokelamu muyitoñojoka hanyidimu yindi. Dichuma chinamwekani hampinji muntu wudi nandemoni, mputamesu nawa wabulaña kuhosha, amuleti kudi Yesu nawa namuuki. Ichi iwu iyala anamuuki nawa hiyanakumuyuula cheñi kudi andemoniku nakumona nikuhosha. Antu anahayami nakuhosha nawu: “Iwu bayi neyi diyi Mwana kaDavidiku?”—Matewu 12:23.

Mazaza amavulu anenzi kwitala daYesu, nawa Yesu niatumbanji anakañanyi nikuda yakuda. Hela chochu, anukenu nenu Yesu diyi “Mwana kaDavidi.” Ansoneki niaFwarisi amakwawu anafumi kuYerusalema, ilaña hiyanenzi nakudizila kudi Yesu hela kumukwashakuku. Anakuleja antu nawu: “Wudi naBelezebubi, nawa wafumishaña andemoni nañovu yanyuuli wawandemoni.” (Maku 3:22) Dichi antaña jaYesu chinatiyiwu chumichi, anenzi nakumukwata Yesu. Muloña wankahi?

Haniyi mpinji, amana kwaYesu kanda akuhweleli nawu hiMwana kaNzambi. (Yowanu 7:5) Iwu Yesu wunakuletesha kwikaleña ipumba hidiyi Yesu elukiliwu hampinji yakulileñawu nindi muNazaretaku. Chinakunkululiwu nawu yitoñojoka yindi yinaluwankani, anahoshi nawu: “Nazaluki.”—Maku 3:21.

Hela chochu, iyi yuma yinakumwekeshadi? Yesu nafumi tuhu nakuuka iyala wadiña nandemoni,  ichi nakumona nikuhosha. Kwosi wukukaana chumichiku. Dichi ansoneki niAfwarisi aneseki kumutwambila Yesu kulonda antu amudiwuli. Anahoshi nawu: “Iwu muntu wafumishaña andemoni nañovu yaBelezebubi, nyuuli wawandemoni.”—Matewu 12:24.

Yesu neluki chinakutoñojokawu ansoneki niaFwarisi, dichi nahoshi nindi: “Wanta wejima wadaambulaña waweni wakisikaña, nawa musumba wejima hela itala dadaambulaña dadeni dakolaña wanyi. Munjila yoyimu, neyi Satana afumisha Satana, dikwila nawu nadaambuli yomweni; hanu dinu wanta windi wukukola ñahi?”—Matewu 12:25, 26.

Nalumbululi chachiwahi! AFwarisi aneluki nawu aYudeya amakwawu afumishaña andemoni. (Yilwilu 19:13) Dichi Yesu nayihuli nindi: “Neyi nafumishaña andemoni nañovu yaBelezebubi, indi anyanenu afumishaña nañovu janyi?” Munjila yikwawu, anakuditena hohu awenawu. Kuhiñahu Yesu natwalekihu nindi: “Ilaña neyi nafumishaña andemoni naspiritu yaNzambi, dikwila nawu Wanta waNzambi chalala wunayishintakeshi.”—Matewu 12:27, 28.

Hakulumbulula nindi chinakufumishayi andemoni chinakumwekesha nawu wukweti ñovu kubadika Satana, Yesu nahoshi nindi: “Muntu nateli kulukuka ñahi itala damuntu wukweti ñovu nakumubuwa maheta indi? Watela kusambila kumukasa iwu muntu wukweti ñovu. Neyi namukasi dehi, dihakubuwayi dinu mwitala dindi. Wejima wunabuli kwikala kukabadi kami, nakudikaña nanami, nawa wejima wabulaña kupompesha hamu nanami, wapalañeshaña.” (Matewu 12:29, 30) Chakadi nikujina, ansoneki niaFwarisi anakudikaña naYesu, nakumwekesha nawu hiyantu jaSatana. Anakupalañesha antu kulonda afumi kudi Mwana kaNzambi, wunakukoña iyi nyidimu nawukwashu waYehova.

Yesu nayisoñamishi awa antu jaSatana nindi: “Antu akayanakena nshidi jejima jakakoñawu hela chakwila jamuchidinyi nimazu ejima akasawuntu ahoshañawu. Hakwila muntu wejima wasawulaña spiritu yajila, hiyamba kamwanakenaku, ilaña wakekala namuloña wanshidi haya nyaaka.” (Maku 3:28, 29) Toñojokenu chakayilawu antu ejima amuhakwilañaku Satana nayuma yinakwilawu naspiritu yaNzambi!