Hampinji yinakudayi Yesu mwitala dakaFwarisi, mazaza awantu anapompi hanji nakumuhembelela. Chuma chamuchidiwu chamumwekeneni cheñi muÑaliliya. (Maku 1:33; 2:2; 3:9) Akunu kuYudeya, amavulu anakukeña kumumona nikumutiya, anamwekeshi yilwilu yambukaku nayawaFwarisi hampinji yadañawu.

Mazu anahoshiyi Yesu alema nankashi kudi atumbanji twindi, nahoshi nindi: “Babalenu neluñi dawaFwarisi, dikwila nawu wunfwikiji.” Yesu wayilejeli cheñi chumichi hakusambila, ilaña chuma chinamoniyi hampinji yinadeñawu chinakumwekesha nawu watela kuyifumba cheñi. (Luka 12:1; Maku 8:15) AFwarisi anakukeña kusweka kutama kwawu, ilaña kudi chuma chiyatela kusololawu. Yesu nalumbululi nindi: “Muloña kwosi chuma chaswekawu chikupu chakabula kusololawuku, nawa kwosi chuma chakujinda chakabula kwilukawuku.”—Luka 12:2.

Hadaha antu amavulu anamunyeñumuki Yesu hiyaYudeya abulahu dehi kumutiya nakutañisha muÑaliliya. Dichi, nafuntishihu yikuma yoyimu yahoshayi hakusambila. Naleji ejima anakumutiyilila nindi: “Bayi mutiya woma antu ajahaña mujimbaku, muloña neyi anayijahi dehi, kwosi chuma chikwawu chikuyilawuku.” (Luka 12:4) Neyi cheliliyi kunyima, nihaniyi mpinji nakuyikolesha akakumulondela kumukuhwelela Nzambi nawu wukuyakamenaña. Atela cheñi kumwiluka Mwana kamuntu nawa atela kwiluka nawu Nzambi wukuyikwashaña.—Matewu 10:19, 20, 26-33; 12:31, 32.

Kuhiñahu, iyala wudi mwizaza namuleji Yesu chuma chinakumwakamisha nindi: “Ntañishi, muleji manakwami twanzañani wuswana.” (Luka 12:13) Nshimbi yahosha nawu mwana weyala wawedi watela kutambula maseka ayedi awuswana, dichi hiyatela kwikala yikonkojolaku. (Kuhituluka 21:17) Chinamwekani neyi iwu iyala nakukeña kutambula yuma yayivulu kubadika heseka datela kutambulayi. Yesu nakaani kwikala kukabadi kamuntu. Namwihuli nindi: “Eyi iyala, hinyi wantondeli kwikala nsompeshi yenu hela ihaku hakachi kenu?”—Luka 12:14.

Nkumininaku Yesu naleji antu ejima nindi: “Tonenuña nawa tondolwelenuña lwisu lwejima, muloña hela chakwila muntu wukweti yuma yayivulu nankashi, wumi windi hiwashindamena hayuma yahetayiku.” (Luka 12:15) Hela chakwila muntu waheta chamuchidinyi, komana ifuku dimu hakafwa nakushiya yuma yindi yejimaku? Yesu nakonkomweni ichi chikuma kuzatisha chakutalilahu chinakumwekesha cheñi nawu chalema kwikala nejina dadiwahi naNzambi:

“Iha dasamaheta wumu dasoñeli nankashi. Nawa watachikili kudihoshesha nindi, ‘Nukwila ñahi chineli hinikweti hakusha yakuda yamiku?’ Dichi nahoshi nindi, ‘Nukwila ñana: Nukusanda nkalaña jami kulonda nituñi jamaneni, mwenomu dimunukusha mbutu yami niyuma yami yejima, nawa nukudihoshesha ami awenami nami: “Wudi nayuma yayiwahi yayivulu yiwunalumbiki yakuzatisha hadi yaaka yayivulu; dinookeleña kweyi, daña, nwaña, diluñisheña.”’ Ilaña Nzambi wamulejeli nindi, ‘Eyi wabula maana, lelu nawufuku akukutambula wumi weyi. Hanu dinu, hinyi wukushala nayuma yeyi yiwunalumbiki?’ Dichichekala nikudi muntu wadilumbikilaña maheta henohu hikazweñi kumesu aNzambi.”—Luka 12:16-21.

Atumbanji twaYesu niantu anakumutiyilila anateli kwikala mukweseka kwakufwila maheta. Hela kwakama kwawumi kunateli kuyikañesha kumukakela Yehova. Dichi Yesu nafuntishihu kufumba kwokumu kwayifumbiliyi kwakwihi nachaaka chimu nachikunku chinahitihu muMpanji yindi yahaMpidi:

Nahoshi nindi: “Lekenu kwakama hawumi wenu kutalisha hayuma yimukuda, hela kwakama hanyijimba  yenu kutalisha hayuma yimukuvwala. . . . Toñojokenu hadi makololu: Hiyakuwaña mbutu hela kumunaku; hiyakweti nkalaña hela itala mwakuhembelaku; ilaña Nzambi wayidiishaña. Komana enu himwalema chikupu kubadika atudaku? . . . Toñojokenu hankenu chiyakulaña: Hiyakabakanaña hela kuchima yakuvwalaku; ilaña inakuyileja nami niSolomoni yomweni mukulema kwindi kwejima, havwalilihu yakuvwala yidi neyi iyi nkenu hela yimuku. . . . Lekenu kufwila yuma yimukuda niyimukunwa, nawa lekenu kusweja kwakama . . . Tata yenu weluka nindi mwakeñaña yumiyi. . . . Keñenuña Wanta windi, nawa yumiyi akayishilahu.”—Luka 12:22-31; Matewu 6:25-33.

Anyi atela kukeñaña Wanta waNzambi? Yesu namwekeshi nindi “mukanka wanyanya wanyikoku,” wawantu ashinshika akelaña chumichi. Mukuhita kwampinji akayiluka nawu hiyantu akushika ku 144,000. Chumanyi chikayinkawu? Yesu nayileji nindi: “Tata yenu neteji kuyinka Wanta.” Awa hiyakasha muchima hakwikala namaheta hanu hamasekiku, hekala amakombi nawa eyañaku. Ilaña muchima wawu wakekala “[hi]heta dabulaña kumana mwiwulu,” mwakayuulilañawu naKristu.—Luka 12:32-34.