Yesu anamwiluki nankashi kufuma tuhu muchaaka chapapatisheweliyi. AYudeya amavulu anamoni yihayamisha yindi nawa nsañu yanyidimu yindi yinatandi mwituña dejima. Ichi dinu haChawija chaTabanaka (hela chaYisolu) muYerusalema, amavulu anakumukeñakeña.

Antu akweti yitoñojoka yashiyashana hadi Yesu. Amakwawu anakuhosha nawu: “Himuntu wamuwahi.” Amakwawu niwena nawu: “Watama. Waluwañeshaña antu.” (Yowanu 7:12) Nsañu yejimiyi yinamwekani hamafuku atachika chawija. Hela chochu, kwosi wunahamuki nakumuhoshelaku Yesu, muloña anakuchiina chuma chikwilawu akulumpi jawaYudeya.

Henohu chawija chatachika dehi, Yesu nenzi mutembeli. Antu amavulu anahayami hawuswa wukwetiyi wakutañisha. Kanda ayeñahu dehi kushikola yawarabi, dichi aYudeya anakuhosha nawu: “Indi iwu muntu weluka ñahi Nsona henohu kanda yayeñahu dehi kumashikola?”—Yowanu 7:15.

Yesu nayilumbulwili nindi: “Yuma yinatañishaña yami wanyi, ilaña yanowu wantemesheli. Neyi kudi muntu wunakukeña kwila nkeñelu Yindi, wukwiluka neyi yuma yinatañishaña yafumaña kudi Nzambi indi kwiji nahoshaña yitoñojoka yami ami aweni.” (Yowanu 7:16, 17) Yuma yatañishaña Yesu yinesekani naNshimbi jaNzambi, dichi nakufwila kumulemesha Nzambi bayi yomwenindiku.

Kuhiñahu Yesu nayihuli nindi: “Mosi wayinkeli Nshimbi, hidimuku? Ilaña hakachi kenu hosi niwumu wovwahilaña Nshimbiku. Munakukeñeladi kunjaha?” Amakwawu mwizaza, hamwaha añenji anafumi kumaluña acheñi aneluki wanyi chumichi. Wena aneteji wanyi neyi kudihu muntu wunakukeña kujaha ntañishi wamuchidiwu. Dichi, anakunkululi nawu Yesu wudi chiwahi wanyi hakuhosha mazu amuchidiwu. Anahoshi nawu: “Eyi wudi nandemoni. Hinyi wunakukeña kukujaha?”—Yowanu 7:19, 20.

Kafwampi, hakusambila hadi chaaka chimu nachikunku chinahitihu, akulumpi jawaYudeya akeñeleña kumujaha Yesu hanyima yakuuka iyala wumu haSabata. Yesu nahoshi yuma yinaleteshi asololi yitoñojoka yawu yaheña. Nashimuni chuma chashimunawu muNshimbi nawu mwana weyala atela kumwalamisha hefuku damu 8 hela chakwila odu ifuku hiSabata. Nkumininaku nayihuli nindi: “Neyi muntu amwalamishaña haSabata kulonda abuli kufumpa Nshimbi jaMosi, indi enu munanhilili chikupu hamuloña wakwila nokili muntu hasabata tahindi? Lekenu kusompesha nachinakumwekanayi muntu, ilaña sompeshenuña mwaloña.”—Yowanu 7:23, 24.

Antu ashakamaña muYerusalema aneluki iyi nsañu anahoshi nawu: “Komana iwu hidiyi muntu anakukeña (anyuuli) kujahawuku? Ilaña talenu! nakuhosha nihatooka, wena anakumutala hohu. Anyuuli anamwiluki dehi chikupu nawu diyi Kristu tahindi?” Hanu dinu muloñadi antu chinabuli kumukuhwelela nawu Yesu diyi Kristu? Anakuhosha nawu: “Etu tuneluki kwafumayi iwu muntu; muloña neyi Kristu nenzi, kwosi muntu wakeluka kwakafumayiku.”—Yowanu 7:25-27.

Hohenaha hatembeli, Yesu nayakuli nindi: “Mwañiluka nawa mweluka ninoku kunafuma. Hinadinjilili ami aweniku, ilaña Owu wantemesheli walala nawa himwamwilukaku. Ami namwiluka, muloña nidi ñimeni yindi, nawa Yenowu diyi wantemesheli.” (Yowanu 7:28, 29) Wena chinatiyiwu awa amazu anahoshiyi, anakukeña kumukwata Yesu kulonda amukasi hela kumujaha. Hela chochu, anakañanyi muloña kanda yishiki mpinji yatela kufwayi Yesu.

Hela chochu, antu amavulu anamukuhweleli Yesu. Wendeli hewulu damenji, wawundishili mpepela yasweja, wadiishili makombakaji awantu muchihayamisha namankendi antesha niinshi, wokili akata, wokili ayifwayi, watonesheli amputamesu,  wokili akata kalepa nikusañula afu. Wunsahu wukwetiwu wunayileteshi kwihula nawu: “Neyi Kristu nenzi, komana wakakoña yihayamisha yayivulu kubadika yinakoñiyi iwu muntu tahindi?”—Yowanu 7:31.

Afwarisi chanatiyiwu antu anakuhosha iyi nsañu, wena niakulumpi jawatupristu anatemeshi atupasu nakumukwata Yesu.