Iku Yesu wuchidi kwakwihi naYerusalema, aYudeya ambokamboka anenzi nakumuwana. Amakwawu anakukeña kudizila kudi yena nawa amakwawu anakukeña kumweseka. Wumu hakachi kawu welukisha Nshimbi, namwihuli nindi: “Ntañishi, chumanyi chinatela kwila hakwila nakekali nawumi wahaya nyaaka?”—Luka 10:25.

Yesu neluki nindi iwu muntu nakwihula hohu nindi eluki nsañuku. Nakukeña amoni neyi Yesu wukwakula munjila yikuyihilisha aYudeya. Yesu neluki nindi iwu iyala wudi nayitoñojoka yambukaku. Dichi namwakuli mukubabala kulonda asololi yuma yinakutoñojokayi iwu muntu.

Yesu nehuli nindi: “MuNshimbi asonekamu nawudi? Watañañamu neyidi?” Iwu muntu wadiza Nshimbi yaNzambi, dichi nakuli kushindamena hayuma yadizayi. Nazatishi mazu ekala haKuhituluka 6:5 niAlevi 19:18 hahosha nawu: “‘Watela kukeña Yehova Nzambi yeyi namuchima weyi wejima, nawumi weyi wejima, nañovu jeyi jejima ninayitoñojoka yeyi yejima’ nawa ‘keñaku mukwenu neyi chiwadikeña eyi aweni.’” (Luka 10:26, 27) Iyi diyi ñakwilu?

Yesu namuleji iwu iyala nindi: “Wunaakuli mwalala; twalekakuhu kwila mwenimu nawa wakekala nawumi.” Komana nsañu yinakumini hohenaha? Iwu iyala hanakukeña hohu ñakwiluku, yena nakukeña “kudimwekesha nindi waloña,” kulonda amwekeshi nindi yuma yelukayi yalala nawa wayilaña antu amakwawu chiwahi. Dichi nehuli nindi: “Indi mukwetu hinyi?” (Luka 10:28, 29) Ilu lwihu lunakumwekana neyi lwapela ilaña munadivuñili yuma yayivulu. Munjilanyi?

AYudeya eluka nawu izu dakwila nawu “mukwetu” dakundama hohu kudi antu ahembaña tushidikilu twawaYudeya, nawa chinamwekani neyi Alevi 19:18 yinakoleshi ichi chikuma. Kafwampi, kaYudeya nateli nikuhosha nindi “nshimbi hiyeteja” kudikunda namuntu wabula kwikala kaYudeyaku. (Yilwilu 10:28) Dichi iwu iyala hadaha niatumbanji twaYesu amakwawu adimonaña nawu aloña neyi ayitiyila luwi akwawu aYudeya. Ilaña hiyanateli kumutiyila muntu wabula kwikala kaYudeya luwiku, muloña “himukwetu” wanyi.

Yesu nateli kwolola ñahi iyi yitoñojoka chakubula kumuhukesha iwu iyala niaYudeya amakwawu? Nashimuni chakutalilahu, nindi: “Kwadiña iyala wumu wakunkumukileña kufuma kuYerusalema nakuya kuYeriku nawa amulukukili kudi atupondu, amuvuulili, amweteli, nawa ayili, nakumushiya kwakwihi nakufwa.” Yesu natwalekihu nindi: “Dichi kukasumuka, muyoyenoyu njila mwadiña kapristu wahitileña, ilaña chamumweniyi, wamutondolweleleli. KaLevi niyena dicheliliyi, chashikiliyi hanodu iluña nawa chamumweniyi, wamutondolweleli. Ilaña kaSamariya wumu wahitileña muyoyenoyu njila, chashikiliyi hadiñayi nawa chamumweniyi, wamutiyilili wushona.”—Luka 10:30-333.

Iwu iyala anakulejawu nsañu kudi Yesu weluka nindi atupristu amavulu nialevi azatilaña hatembeli ashakamaña kuYeriku. Hakwila afumi kutembeli atela kwendahu makilomita 23. Muniyi njila mwekala wubanji muloña mwekala atupondu. Neyi kapristu nikaLevi awana mukwawu kaYudeya wudi mukukala, kwila amukwasha nehi? Muniyi nsañu, Yesu nalumbululi nindi anamukwashi wanyi. Muntu wamukwashili hikaSamariya, antu adiwulawu kudi aYudeya.—Yowanu 8:48.

KaSamariya wamukwashili ñahi kaYudeya akatishiliwu? Yesu natwalekihu nindi: “Wayili hadiñayi nawa wamukasekeli hayilonda yindi, nakuhuñunwinahu manji nivinyu. Kuhiñahu, wamukandamishili hakanyama kindi nakumutwala kwitala kwashikenaña enyi nakumuhembelaku. Hefuku dalondelelihu, wanoneli madenari ayedi nakwinka nhembi wetala mwashikenaña enyi, nakumuleja nindi: ‘Wumuhembi chiwahi nawa mali ejima iwukuzatisha akubadika hanawa innakwinki, nakakufuntishila neyi nafunti.’”—Luka 10:34, 35.

 Hanyima yakushimuna nsañu, Ntañishi Muneni, Yesu namwihuli iwu iyala lwihu lwakutoñojokahu, nindi: “Hadi awa antu asatu, hinyi iwunamoni neyi diyi wadiña mukwawu kudi iwu muntu alukukiliwu kudi atupondu?” Hadaha iwu iyala chinamukalili kwakula nindi “kaSamariya,” dichi nakuli nindi: “Ona wamutiyilili luwi.” Kuhiñahu Yesu namuleji nindi: “Nineyi yaña wileña mwomumu.”—Luka 10:36, 37.

Iyi hinjila yayiwahi yakutañishilamu! Neyi Yesu washikena kumuleja nindi niantu abula kwikala aYudeya hiyakwetu, komana iwu iyala niaYudeya amakwawu anakutiyilila adi kwiteja chumichi? Adi kwiteja wanyi. Ilaña, chashimunayi chakutalilahu kuzatisha yuma yinelukiwu antiyilili jindi, ñakwilu yalwihu lwakwila nawu “Indi mukwetu hinyi?” lukupela kwakula. Muntu wamwekeshaña nindi mukwenu, diyi muntu wamwekeshaña kukeña niluwi lwashimunawu muNsona.