Yesu nalumbululi nindi “mukanka wanyanya wanyikoku” wukatambwila iluña muWanta wamwiwulu. (Luka 12:32) Ilaña hakwila nawu atambwili iwu wuloku wawuwahi hichuma chakuhemeshaku. Kafwampi, natwalekihu kukonkomwena chichalemena kudi muntu kwikala nayilwilu yayiwahi hakwila akekali muniwu Wanta.

Dichi, Yesu nayikonkomweni atumbanji twindi kudiloñesha mpinji yakufuntayi. Nahoshi nindi: “Vwalenu nikudiloñeshela chadimu nawa manoñu enu abutukeña, nawa mwatela kwikala neyi antu anakutalila nkaaka yawu wunakufuma kuchawija chawulu, kulonda neyi nashiki nawa yadondomwena, wejima wawu akushikena dakumwenzunwinaku. Adi namuzañalu wowu anduñu akawanawu anakutona hampinji yakenzayi nkaaka yawu!”—Luka 12:35-37.

Atumbanji anatiyishishi chuma chinaleteshi ahani chakutalilahu. Añamba anateniyi anadiloñeshi dehi, anakuhembelela nkaaka yawu mpinji yikufuntayi. Yesu nalumbululi nindi: “Neyi [nkaaka yawu] yenza hachilu chamuchiyedi [kufuma kuma 21:00 nakushika hakachi kawufuku] hela chamuchisatu [kufuma hakachi kawufuku nakushika kuma 03:00], nawa yayiwana anadiloñesheli chadimu, owu anduñu adi namuzañalu!”—Luka 12:38.

Nakufumbana hohu wanyi hakwikala ñamba wadikita hela mukakukalakala. Chumichi chinamwekani hatooka hampinji Yesu, Mwana kamuntu, hanadimwekeshiyi munichi chakutalilahu. Nayileji atumbanji twindi nindi: “Ninenu nawa, diloñeshelenu chadimu, muloña Mwana kamuntu wakenza hampinji yimwakabula kumukuhwelela nenu nakwinza.” (Luka 12:40) Dichi kumbidi, Yesu wakenza. Nakukeña akakumulondela sweje-e “mukanka wanyanya wanyikoku,” kwikala adiloñesha.

Petulu nakukeña kutiyishisha munatalishiyi Yesu, dichi nehuli nindi: “Mwanta, wunakuleja hohu etu ichi chakutalilahu tahindi ejima?” Chatela ashikeni kumwakula Petulu, Yesu nashimuni chakutalilahu, nindi: “Indi ñamba washinshika, wamaana, akatondawu kudi nkaaka yindi kumuhembela ambuña amwitala dindi nakutwalekahu kuyinka yakuda yawu yashikila hampinji yatelela, hinyi? Wudi namuzañalu yowu nduñu akawanawu kudi nkaaka yindi nakwila mwenimu! Inakuyileja chalala nami, wakamutonda kumuhembela yuma yindi yejima.”—Luka 12:41-44.

Muchakutalilahu chatachi, “nkaaka” yawantu chakadi nikujina nakutena Yesu, Mwana kamuntu. “Ñamba washinshika” munadibombeli “mukanka wanyanya wanyikoku” akenkawu Wanta. (Luka 12:32) Ahanu Yesu nakuhosha nindi antu amakwawu amunidi izanvu akuyinkaña “ambuña amwitala dindi” yakuda “yawu yashikila hampinji yatelela.” Dichi Petulu niatumbanji amakwawu anakutañishayi Yesu nikuyidiisha kuspiritu anateli kukunkulula nawu kwakekala mpinji kumbidi yakenzayi Mwana kamuntu. Nawa haniyi mpinji, kwakekala ntanjikilu yikazatikaña yakudiishilamu akakumulondela Yesu, “ambuña amwitala” daNkaaka yawu.

Yesu nakonkomweni atumbanji twindi cheñi chatela kwikalawu asoñama nikuwahisha yilwilu yawu. Imu dimu, muloña chumichi chinateli kuletesha muntu kwikala nakadiwu chakwila wukutachika nikukabisha akwawu: “Ilaña neyi owu nduñu wakadihoshesha mumuchima windi nindi, ‘Nkaaka yami nashimbuli kwinza,’ nawa atachika kweta ambuña awamayala niawambanda nikuda nikunwa nakusheta, nkaaka yanowu nduñu wakenza hefuku dinabuli kumukuhwelelayi nindi nakwinza niora yinabuli kwilukayi, nawa wakamubabesha nankashi nakumusha hamu nawantu abula kushinshika.”—Luka 12:45, 46.

Yesu nahoshi nindi nenzi “nakubutula kesi hamaseki.” Nawa dimu muneliyi, naleti nsañu yinakuletesha  antu kutadeka nawa yinakujima ntañishilu yakutwamba nitushidikilu. Nawa chumichi chinakwaambula antu atela kwikala anuñañana, kwaambula “tata yawantu namwanindi weyala, mwana weyala natata yindi, mama yawantu namwanindi wamumbanda, mwana wamumbanda namama yindi, muku wamumbanda namumbanda wesumbu, mumbanda wesumbu namuku wamumbanda.”—Luka 12:49, 53.

Awa mazu anakundami sweje-e atumbanji twindi. Dichi Yesu nabalumukili cheñi kudi mazaza. Antu amavulu anakaani wunsahu wunakumwekesha nawu diyi Mesiya, dichi nayileji nindi: “Neyi mumona ivu dinakusela kumujika, mwahoshaña nenu, ‘kunakwinza nvula yampepela,’ nawa yanokaña. Neyi mumona nenu mpepela yakukabeta kakuchidiilu yinakukunka, mwahoshaña nenu, ‘Kukwikala nkanza yasweja,’ nawa yekalañaku. Anfwikiji, mweluka kulumbulula chinakumwekana iseki niiwulu, hanu dinu, mwabulilañadi kwiluka chakulumbulula yinu mpinji?” (Luka 12:54-56) Chinamwekani hatooka nawu anadiloñeshi wanyi.