Yesu chinatwalekihu kutañisha muYudeya, nahoshi hayuma yelukawu antiyilili jindi, nyikoku nimayinda awanyikoku. Ilaña nayizatishi hohu neyi chakutalilahu. AYudeya atela ananuki mazu aDavidi akwila nawu: “Yehova diyi Kabiña kami. Hinukukaankila chumaku. Wankaamikaña kumunyenvu.” (Masamu 23:1, 2) Mwisamu dikwawu, Davidi walejeli muza nindi: “Tufukamenu kumesu aYehova Ntuñi yetu. Muloña yena diyi Nzambi yetu, nawa etu tudi antu akumunyenvu windi.” (Masamu 95:6, 7) Mwamweni, aIsarela adiña muNshimbi ayesekejeli hadi mpinji yayilehi namukanka wanyikoku.

Awa “anyikoku” adiña “mwiyinda,” munjila yikwawu avwalikilili muchitiyañenu chaNshimbi yaMosi. Nshimbi yadiña neyi mpwembu, yayikiñileña kubula kudiñija muyuma yatama yakoñeleña antu abulili muniyi ntanjikilu. Hela chochu, aIsarela amakwawu, akabishileña nyikoku yaNzambi. Yesu wahosheli nindi: “Inakuyileja chikupu nami, muntu wabulaña kwiñilila kuchiisu cheyinda dawanyikoku nawa wakandaminaña hacheñi, hiikombi nawa himukakupuupa. Ilaña weñililaña kuchiisu hikabiña wanyikoku.”—Yowanu 10:1, 2.

Antu anateli kutoñojoka hadi antu aditeneneña nawu Mesiya, hela Kristu. Awa antu adi neyi makombi nawa akakupuupa. Antu hiyatela kulondela antu amuchidiwuku. Ilaña atela kulondela “kabiña wanyikoku” ateneniwu kudi Yesu nawu:

“Mukakuhemba kuchiisu wamwenzunwinañaku, nawa anyikoku atiyaña izu dindi. Wayitambikaña anyikoku indi hejina-hejina nakuyidisha hanji. Neyi nedishi dehi anyikoku indi ejima, watwaminañaku, nawa anyikoku amulondelaña, muloña eluka izu dindi. Hiyalondelaña muntu wacheñiku, amutemukaña muloña hiyelukaña mazu awantu acheñiku.”—Yowanu 10:3-5.

Hakusambila, Yowanu Mpapatishi, kufwana mukakuhemba chiisu, wamuteneni Yesu nindi diyi owu atenawu muchifwikija nawu nyikoku yidi muNshimbi yatela kumulondela. Nawa nyikoku yikwawu, yamuÑaliliya nimunu muYudeya, yineluki izu daYesu. ‘Wukuyidisha hanji’ nakuyitwala kudihi? Nawa yumanyi yikufumamu mukumulondela? Amakwawu anakutiyilila chakutalilahu chindi anahayami, muloña ‘wena aneluki wanyi munatalishiyi.’—Yowanu 10:6.

Yesu nalumbululi nindi: “Inakuyileja chikupu nami, yami chiisu chanyikoku. Ejima adifwikijaña kwikala neyi ami hiyamakombi nawa hiyakakupuupa; dichi anyikoku hiyayitiyililañaku. Yami chiisu; wejima wukwiñilila mudi ami akamwamwina, yenowu wukwiñila nikwidika nawa wukuwana munyenvu.”—Yowanu 10:7-9.

Mwamweni, Yesu nakuhosha hachuma chachiha. Antu anakumutiyilila aneluki wanyi nawu yena diyi chiisu chachitiyañenu chaNshimbi, chadiñaku hadi yaaka yayivulu. Dichi watela nakuhosha nindi nyikoku ‘yikwidishayi hanji’ yatela kwiñila mwiyinda dacheñi. Yumanyi yikufumamu?

Chinatwalekihu kulumbulula mudimu windi, Yesu nahoshi nindi: “Ami nenzi kulonda ekali nawumi nikwikala nawu haya nyaaka. Yami kabiña wamuwahi; kabiña wamuwahi wahanaña wumi windi kukoola anyikoku.” (Yowanu 10:10, 11) Hanashimbuli wanyi Yesu wafuma tuhu nakukundeja atumbanji twindi nindi: “Bayi mutiya womaku, enu mukanka wanyanya wanyikoku, muloña Tata yenu neteji kuyinka Wanta.” (Luka 12:32) Eña, ejima ekala “mukanka wanyanya wanyikoku” diwu akedishayi Yesu hanji nakuyiñija mwiyinda dacheñi, kulonda akekali “nawumi nikwikala nawu haya nyaaka.” Kwenoku kukoleka hakwikala hakachi kaniwu mukanka!

Hela chochu, Yesu nakumini hohu ahaku. Nahoshi nindi: “Nikweti anyikoku amakwawu, ilaña hiyamwiyinda dinuku; niwena natela kuyileta mwiyinda, akatiya izu dami nawa akekala mukanka wumu nikabiña wumu.” (Yowanu 10:16) Awa “anyikoku  amakwawu . . . hiyamwiyinda dinuku.” Dichi, atela amwiyinda dikwawu, dambukaku neyinda mudi “anyikoku amakwawu” akaswana Wanta. Awa mayinda ayedi, hela mayinda anyikoku, akweti kuchiñeja kwambuka. Ilaña, anyikoku adi mumayinda ejima ayedi awanaña wuselewa mumudimu waYesu. Nahoshi nindi: “Ichi dichankeñelayi Tata, muloña nukuhana wumi wami kulonda nakawutambwili cheñi.”—Yowanu 10:17.

Amavulu mwizaza anakuli nawu: “Wudi nandemoni nawa nazaluki.” Ilaña amakwawu anakutiyilila nawa anakumwekesha nawu anakukeña kumulondela Kabiña Wamuwahi. Anahoshi nawu: “Muntu wudi nandemoni kwila ahosha awa mazu nehi. Komana ndemoni nateli kutonesha mesu awamputamesu?” (Yowanu 10:20, 21) Atela anakutena ona iyala okiliwu kudi Yesu wavwalikili mputamesu.