Yesu wuchidi muYerusalema kuChawija chaTabanaka (hela Yisolu). Nazañalali muloña antu “amavulu hezaza dawantu [anamukuhweleli].” Hela chochu, chumichi chinayizañaleshi wanyi akulumpi jakwitiya. Anatemeshi atulama azatishañawu mukwitiya kulonda amukwati. (Yowanu 7:31, 32) Ilaña, Yesu hanaswamiku.

Yesu natwalekihu kutañisha antu muYerusalema hatooka nindi: “Nukutwalekahu nanenu hakapinji kantesha henohu kanda niyi kudi wantemesheli. Mwakankeñakeña, ilaña himwakanwanaku, nawa kunakekala, enu mwakatwesha kwinzaku wanyi.” (Yowanu 7:33, 34) AYudeya aneluki wanyi munatalishiyi, dichi anatachiki kudihoshesha mulwawu nawu: “Indi iwu muntu nakukeña kuya kudihi kutukubula kumuwana? Nakukeña kuya kudi aYudeya apalañena mudi aGiriki nakuyitañisha aGiriki tahindi? Natalishi mudihi chinahoshiyi nindi, ‘Mwakankeñakeña, ilaña himwakanwanaku, nawa kunakekala, enu mwakatwesha kwinzaku wanyi’?” (Yowanu 7:35, 36) Hela chochu, Yesu nakuhosha hakufwa kwindi nichakasañukayi nakuya mwiwulu nawa ayilumbu jindi hiyakumulondelaku.

Ifuku damu 7 dachawija dinashiki. Ntetemena hintetemena, kapristu nakwichila menji anakutahawu mwijiya daSilowami, kulonda amwañili kwishina dakameña kamutembeli. Hadaha anakukeña kuyanukisha antu ichi chuma, Yesu nahoshi nindi: “Muntu wejima wunatiyi mpwila, enzi kudi ami nimwinki menji akunwa. Muntu wejima wukunkuhwelela, ‘heshina damuchima windi hakafumaña tuloña twamenji awumi’ neyi chahosha nsona.”—Yowanu 7:37, 38.

Yesu nakutena chuma chakamwekana hampinji yakayiwayishawu atumbanji twindi naspiritu yajila nawa hakayinkawu wumi wamwiwulu. Akayiwayisha hanyima yakufwa kwaYesu. Kutachikila hefuku daPentekosta chaaka chahiñilihu, tuloña twamenji ahanaña wumi tukatachika kuhita chikatachika kuyishimwinawu  antu chalala kudi atumbanji awayishawu naspiritu.

Antu amakwawu anatiyi chinakutañishayi Yesu anahoshi nawu: “Chalala iwu hiKaprofwetu,” chakadi nikujina nakutena kaprofwetu ashimwineñahu dehi nawu wamubadika Mosi. Amakwawu anahoshi nawu: “Iwu diyi Kristu.” Ilaña amakwawu niwena anakutadika nawu: “Kristu hakafumina muÑaliliyaku, tahindi? Komana nsona hiyahosha nawu Kristu wakenjila mudi anyana kaDavidi nimuBetelemi, mukala mwadiñayi Davidiku?”—Yowanu 7:40-42.

Dichi izaza dinambokelimu. Hela chakwila amakwawu anakukeña nawu amukwati Yesu, kwosi wunamukwatiku. Chinafuntiwu atulama kudi akulumpi jansakililu chakadi Yesu, akulumpi jawatupristu niaFwarisi anayihuli nawu: “Muloñadi chimunabulili kumuleta kunu?” Atulama anakuli nawu: “Kwosi wahoshahu dehi neyi iwu muntuku.” Akulumpi jakwitiya anazuwi nawa anayili nawu: “Ninenu anayiluwañeshi dehi tahindi? Kudihu nyuuli hela kaFwarisi wunamukuhweleli tahindi? Ilaña idi izaza dabula kwiluka Nshimbi hiyantu ashiñewa.”—Yowanu 7:45-49.

Dichi Nikodemu, kaFwarisi nawa membala wamuSanihedirini nakukeña kumuhakwilaku Yesu. Hayaaka yiyedi nachikunku yinahitihu, Nikodemu wenjili kudi Yesu nawufuku nawa wamwekesheli nindi wamukuhweleleli. Ichi Nikodemu nahoshi nindi: “Nshimbi jetu jeteja wanyi kushikena kusompesha muntu chakadi kutiya mukanwa kindi kulonda twiluki yuma yinakwilayi, hidimuku?” Wena akwakula nawudi? “Nineyi hiwafuma kuÑaliliyaku, tahindi? Sandujolaku nawa wukuwana nawu kwosi kaprofwetu wakafuma muÑaliliyaku.”—Yowanu 7:51, 52.

Nsona yashimwini wanyi jiika nawu kaprofwetu wukafuma muÑaliliya. Hela chochu, Izu daNzambi dashimwini hadi Kristu nawu wakafuma kweniku; daprofweteli nawu “chejeji chacheni” chikamwekena “muÑaliliya yawakanyuza.” (Isaya 9:1, 2; Matewu 4:13-17) Kubombelahu, neyi chashimwineñahu dehi, Yesu wavwalikilili muBetelemi nawa wafumini muchisaka chaDavidi. Hela chakwila aFwarisi aneluki chumichi, ilaña diwu anakutandisha makudi ahoshañawu antu hadi Yesu.