Yesu neseki njila jajivulu hakukwasha antu kulonda eluki wubwambu wawu naNzambi chiwudi. Mpinji yimu, himpinji yinafumiyi nakuhanjeka nawantu hanji yetela dakaFwarisi.

Amakwawu anashimuni wubanji wamwekana. Anahoshi “nsañu yawaÑaliliya ajahiliyi [Nguvulu wawaRoma Pontusi] Pilatu hampinji yahanineñawu nyilambu yawu.” (Luka 13: 1) Anatalishi mudihi?

Hadaha awa aÑaliliya diwu ajahiliwu hampinji yelili makombakaji awaYudeya amuhosheña Pilatu helili azatisheña mali amuchimbañu chamutembeli kulonda atuñi nachu kapila kakuletaña menji muYerusalema. Pilatu watela wasendeli awa mali kuhitila mukuditeja nawantu adiña nawuswa hatembeli. Awa antu anakulumbulula iyi nsañu anakutoñojoka nawu aÑaliliya akabakeni muloña akoñeli yuma yatama. Yesu nakaani.

Nayihuli nindi: “Munakutoñojoka nenu ana aÑaliliya ajahiliwu adiña akanshidi nankashi kubadika aÑaliliya ejima?” Ñakwilu yindi yidi nawu inehi. Ilaña nazatishi chuma chamwekeni kulonda ayisoñamishi aYudeya nindi: “Neyi mukubula kubalumuka munyichima, ninenu akayijilumuna wejima wenu.” (Luka 13:2, 3) Yesu nateni cheñi wubanji wukwawu watela wamwekana katataka nawa wunakundami kunsañu yakutuña kapila, nehuli nindi:

“Ana antu 18 aholokeleliwu kudi kaposhi muSilowami nakuyijaha—munakutoñojoka nenu adiña nanshidi jasweja kubadika antu ejima ashakamaña muYerusalema?” (Luka 13:4) Izaza dinakutoñojoka nawu awa antu afwili muloña wayuma yatama yeliliwu. Cheñi Yesu nakaani. Neluki nindi “mpinji niyuma yamwekanaña chakubula kukuhwelela” diyi yaletesheli amoni wubanji wamuchidiwu. (Mukwakutañisha 9:11) Dichi awa antu atela kudizila kuniyi yuma. Yesu nayileji nindi: “Neyi mukubula kubalumuka munyichima, akayijilumuna wejima wenu neyi chayijilumwiniwu wena.” (Luka 13:5) Hanu muloñadi chinakukonkomwenayi ichi chikuma?

Chinashindameni nakwiluña kunakuzatilayi mudimu wakushimwina, nawa nalumbululi muniyi njila: “Iyala wumu watumbili mutondu wachikuyu mwitempa dindi danyivinyu, nawa wayili nindi akumuniku nyikaabu, ilaña wawanini kwosi. Dichi, walejeli mukakukalakala mwitempa danyivinyu nindi, ‘Chinu dichaaka chamuchisatu chinnenzi nakukeña nyikaabu kuniwu mutondu wachikuyu, ilaña nawanaña kwosi. Wutemi! Muloñadi chiwukukisañenaña iseki?’ Yena wamwakwili nindi, ‘Nkaaka, wuleki cheñi hadi chaaka chimu, nichipachipiku nakushaku wushi. Neyi wakasoña nyikaabu kumbidi, chikawaha; ilaña neyi wakasoña wanyi, wakawutemi.’”—Luka 13:6-9.

Kubadika hadi yaaka yisatu, Yesu neseki kuyikwasha aYudeya kulonda ekali nachikuhwelelu. Hela chochu, aYudeya antesha hohu diwu anekali atumbanji nawa anateli kutenawu nawu nyidimu yamakasa indi. Ichi muchaaka chindi chamuchiwana naswejeliku kuzata nañovu. Chidi tuhu neyi wadiña nakuchipachipaku nakushaku wushi kumutondu wachikuyu wawaYudeya nanochu chatañishañiyi nikudizisha muYudeya nimuPereya. Yumanyi yinafumimu? AYudeya antesha hohu diwu aneteji. Muza wejima wunakaani kubalumuka nawa wudi munjila yaya kukujilumuka.

 Kubula kumwekesha chikuhwelelu kwamuchidiwu kunenzi nakumwekana cheñi haSabata. Yesu nakutañisha musinagogi. Namoni mumbanda anayandishiwu kudi ndemoni hadi yaaka 18 waha mapampa kayedi. Yesu chinamutiyiliyi wushona, namuleji nindi: “Eyi mumbanda, wufwayi weyi wunamani.” (Luka 13:12) Yesu namunañiki chikasa nawa hohenohu nashikeni dakukola nawa natachiki kumulemesha Nzambi.

Chumichi chinamutiyishi kutama mukulumpi waSinagogi wunahoshi, nindi: “Kwekala mafuku 6 akuzatilamu nyidimu; dichi mwinzeña ayuukeña munawa mafuku, bayi hefuku daSabataku.” (Luka 13:14) Iwu mukulumpi nakukaana wanyi nindi Yesu wukweti ñovu yakuuka; ilaña nakuyizuwila antu chinakwinzawu nakuyuuka haSabata! Yesu namwakuli chiwahi nindi: “Enu anfwikiji, komana enu muntu-himuntu hakasununaña chizamba chindi chañombi hela chimbuulu mwitaña haSabata nakumutwala kulonda ayi nakumwinka menjiku? Komana iwu mumbanda, mwana kaAbarahama akasiliwu kudi Satana hadi yaaka 18, hanateleli kumufumisha muniwu wuduñu hefuku daSabataku?”—Luka 13:15, 16.

Awa akakudimbulula anatiyi nsonyi, ilaña izaza dinazañalali hakumona yuma yayiwahi yineliyi Yesu. Nkumininaku munu muYudeya nafuntishihu yakutalilahu yawuprofwetu kutalisha haWanta yashimwiniyi cheñi hadiñayi muwatu hakaluñalwiji kaÑaliliya.—Matewu 13:31-33; Luka 13:18-21.