Kumakumishilu achaaka cha 32 C.E., henohu munahiti dehi yaaka kwakwihi nayisatu kufuma hamupapatishiliwu Yesu. Hanashimbuli wanyi yena niatumbanji adiña kuChawija chaTabanaka muYerusalema. Hadaha adi kwakwihi naYerusalema. (Luka 10:38; Yowanu 11:1) Mwamweni, tukweji 6 twashaliliku Yesu wazatili mudimu wakushimwina muYudeya hela mwishinadi daKaloña Yodani mwiluña damuPereya. Munawa maluña munakukeñeka kushimwinamu nimwena.

Hakusambila, hanyima yaChipandakenu chamu 30 C.E., Yesu nashakami tukweji twatuvulu nakushimwina muYudeya nikwenda mwahita Samariya. Kuhiñahu mumpinji yaChipandakenu chamu 31 C.E., aYudeya muYerusalema akeñeleña kumujaha. Hadi chaaka chimu chalondelelihu nachikunku, Yesu watañishileña nankashi muÑaliliya. Haniyi mpinji, antu amavulu ekalili akakumulondela. MuÑaliliya Yesu wayidizishili apostolu indi nakuyileja nindi: “Shimwinenuña nenu: ‘Wanta wamumawulu wunaswini dehi kwakwihi.’” (Matewu 10:5-7) Ichi naloñeshi kampeni yakushimwina muYudeya.

Hakutachika iyi kampeni, Yesu natondi atumbanji 70 nawa nayitemeshi ayedi ayedi. Dichi, mwiluña mudi mazanvu 35 awakakushimwina aWanta, mwakwila “mudimu wakwaañula weneni, ilaña akakukalakala anakehi.” (Luka 10:2) Anakuyahu dehi mumaluña mwakalondelayi Yesu. Awa 70 atela kuuka akata nikushimwina nsañu yoyimu yashimwinineñayi Yesu.

Awa atumbanji hiyatela kushimwinaña mumasinagogiku. Yesu nayileji kuya kumatala kudi antu. Nayileji nindi: “Itala dejima mumukwiñila, sambilenu kuhosha nenu: ‘Kuwunda kwiikali mudinu itala.’ Neyi mudi muntu wakeña kuwunda, kuwunda kwenu kukwikala hadi yena.” Nsañwinyi yakushimwinañawu? Yesu nahoshi nindi: “Nakuyileja nenu: ‘Wanta waNzambi wunenzi kwakwihi nanenu.’”—Luka 10:5-9.

Nshimbi yinayinkiyi Yesu awa 70 yoyimu nayenkeliyi apostolu 12 hakusambila. Wayilejeli nindi bayi neyi antu ejima akuyitambwila chachiwahiku. Hela chochu, chikuzatawu nañovu chikuyikwasha antu amwovu kulonda neyi Yesu nenzi mukuhita kwampinji, amavulu akafwila kumumona Mwanta nikudizila kudi yena.

Hanashimbuli wanyi awa akakushimwina aWanta mazanvu 35 anafunti kudi Yesu. Anakumuleja iku anazañalali nawu: “Mwanta, niandemoni anakutwovwahila muloña wakuzatisha ijina deyi.” Iyi nsañu yayiwahi yinamuzañaleshi Yesu, muloña nakuli nindi: “Namumoni dehi Satana naholoki neyi nzaji yinafumi mwiwulu. Tiyenu! Nayinki wuswa wakudata tupela nitunjimbu.”—Luka 10:17-19.

 Dichi Yesu nayileji akakumulondela nindi akwimika mushindu yuma yafwana, muchifwikija kudata atupela nitunjimbu. Kubombelahu, atela kwiluka nawu kumbidi Satana wukaholoka mwiwulu. Yesu nayikwashi cheñi awa 70 kumona chuma chalema mukuya kwampinji. Nahoshi nindi: “Bayi muzañalala muloña wakwila anakuyovwahila kudi aspirituku, ilaña zañalalenu muloña majina enu anayisoneki mumawulu.”—Luka 10:20.

Yesu nazañalali nawa namuhameki Tata yindi hakuzatisha awa ambuña indi adizoza kuzata nyidimu yañovu. Nabalumukili kudi atumbanji twindi nakuyileja nindi: “Adi namuzañalu wowu mesu amonaña yuma yimunakumona enu. Muloña inakuyileja nami, atuprofwetu amavulu nianyanta afwilileña kumona yuma yimunakumona enu, ilaña hiyayimweniku, nawa afwilileña kutiya yuma yimunakutiya enu, ilaña hiyayitiyiliku.”—Luka 10:23, 24.