Hefuku dakukumishaku daChawija chaTabanaka, hefuku damu 7, Yesu nakutañishila kukabadi kamu kamutembeli katenañawu nawu “yikasha yamali.” (Yowanu 8:20; Luka 21:1) Hadaha wudi Mwibulu dawambanda, mwahaninañawu antu yawaana yawu.

Hawufuku wachawija, idi iluña datambeli dinatooki nankashi nachejeji. Manoñu amaneni adi mwomu, manoñu ejima awana amaneni anenzali namanji. Chejeji chinakufuma kunawa manoñu chinakutoñeka hahalehi. Chuma chinahoshiyi Yesu haniyi mpinji hadaha chinayanukishi antu anakumutiyilila awa manoñu: “Ami yami chejeji chakaayi. Wejima wukunlondela hakenda mumwidimaku, ilaña wakekala nachejeji chawumi.”—Yowanu 8:12.

Afwarisi anakaani mazu anakuhoshayi Yesu nawa anahoshi nawu: “Eyi washimunaña wunsahu hadi eyi aweni; wunsahu weyi walala wanyi.” Yesu nakuli nindi: “Hela chakwila nashimunaña wunsahu hadi ami aweni, wunsahu wami walala, muloña neluka kunafumini ninoku kwinnakuya. Ilaña enu himweluka kunafumini hela kwinnakuyaku.” Nabombelihu nindi: “Muloña hinekala nkawamiku: ‘Wunsahu wawantu ayedi walala.’ Ami nashimunaña wunsahu hadi ami aweni, niTata wantemesheli niyena washimunaña wunsahu hadi ami.”—Yowanu 8:13-18.

Chineli aFwarisi anakaani munahoshiyi, anamwihuli nawu: “Tata yeyi wudi kudihi?” Yesu nayakuli nindi: “Himwañiluka ami hela Tata yamiku. Neyi mwadiña mwañiluka, mutenowu mwadi kwiluka niTata yami.” (Yowanu 8:19) Hela chakwila aFwarisi anakukeña kumukwata haniyi mpinji, kwosi wunamukwatiku.

Yesu natwalekihu kuhosha mazu wowamu ahoshayi cheñi nindi: “Inakuya nawa mwakankeñakeña, ilaña mwakafwa nanshidi jenu. Oku kwinnakuya, enu mukutwesha kwinzaku wanyi.” AYudeya  anatiyishishi wanyi munatalishiyi Yesu, dichi anatachiki kudihula nawu: “Wukudijaha yomweni tahindi? Muloña nakuhosha nindi, ‘Oku kwinnakuya, enu mukutwesha kwinzaku wanyi.’” Aneluki wanyi munatalishiyi Yesu muloña aneluki wanyi kwafumayi. Nalumbululi nindi: “Enu mudi ahanu hamaseki; ilaña ami nafuma mwiwulu. Enu mudi amukanu kaayi; ilaña ami hinidi wamukanu kaayiku.”—Yowanu 8:21-23.

Yesu nakuhosha mpinji yadiñayi mwiwulu henohu kanda enzi hanu hamaseki nawa nichekalayi Mesiya akaniniwu, hela netu Kristu, atalilañawu awa akulumpi jakwitiya. Hela chochu, anakumwihula nakadiwu nawu: “Yeyinyi?”—Yowanu 8:25.

Iku anakukaana nikumudimbulula, Yesu nayakuli nindi: “Muloñadi chinnakuhoshela ninanenu?” Hela chochu, nahoshi hadi Tata nimuloña waweni aYudeya chatela kumutiyililawu Mwana: “Owu wantemesheli walala, nawa yuma yinatiyili kudi yena diyi yinnakuhosha mukaayi.”—Yowanu 8:25, 26.

Kuhiñahu, Yesu namwekeshi nindi wamukuhwelela Tata yindi, chuma chabulaña kwilawu awa aYudeya nindi: “Neyi Mwana kamuntu anamunyamuni dehi, dihimwakeluka nenu diyi ami nawa nenu hinadililaña chuma hela chimuku; ilaña nahoshaña yumiyi neyi chanlejeliwu kudi Tata. Nawa Owu wantemesheli wudi nanami; hanlekeli kankawamiku, muloña mpinji yejima nelaña yuma yamutiyishaña kuwaha.”—Yowanu 8:28, 29.

Hela chochu, aYudeya amakwawu anamukuhweleli Yesu nawa nayileji nindi: “Neyi mukutwalekahu kuhemba mazu ami, chalala mudi atumbanji twami, nawa mukwiluka chalala, chalala nichena chikuyifumisha muwuduñu.”—Yowanu 8:31, 32.

Kudi amakwawu, awa mazu akuyifumisha muwuduñu, anayitishishi wanyi. Anakukaana nawu: “Etu tudi anyana kaAbarahama nawa kanda twikaleñahu dehi anduñu kudi muntuku. Hanu dinu wunahoshelidi neyi, ‘Mukufuma muwuduñu’?” AYudeya aneluki nawu mpinji yikwawu ayiyuulileña kudi antu acheñi, ilaña anakukaana kuyitena nawu anduñu. Hela chochu, Yesu nayileji nindi achidi anduñu, chinahoshiyi nindi: “Inakuyileja chikupu nami, muntu wejima wakoñaña nshidi, hinduñu yanshidi.”—Yowanu 8:33, 34.

Kukaana nawu hiyanduñu anshidi wanyi kunateli kuyiletela kukala. Yesu nalumbululi nindi: “Nduñu hashakamaña mwitala haya nyaakaku; ilaña mwana washakamaña haya nyaaka.” (Yowanu 8:35) Nduñu hakweti wuswa wakumuswana nkaka yindiku, nawa anateli kumuhaña kala mpinji. Mwana avwalawu mwitala diyi washakamaña “haya nyaaka,” dikwila nawu mafuku ejima akuhanda kwindi.

Dichi kwiluka chalala hadi Mwana kwasubulaña antu kufuma kunshidi yakufwa chayaha nyaaka. Yesu nahoshi nindi: “Neyi Mwana ayifumisha muwuduñu, mukusubuka chikupu.”—Yowanu 8:36.