Mpinji yadiyi muYudeya Yesu neteji mutambi kudi kaFwarisi. Hadaha himpinji yamwana bayi namelela hampinji yakudaku. (Luka 11:37, 38; esekejenu Luka 14:12.) Henohu kanda adii aFwarisi alondelaña kashidikilu kakwisuka kumakasa kushika munkokola. Ilaña Yesu dichelañayi wanyi. (Matewu 15:1, 2) Hikufumpa Nshimbi yaNzambi wanyi neyi wisuka kushika munkokola, hela dichuma chakeñañayi Nzambi wanyi.

KaFwarisi nahayami hakumona nindi Yesu walondelaña wanyi aka kashidikilu. Yesu neluki chumichi nawa nahoshi nindi: “Enu aFwarisi, mwatookeshaña hanji yakaapu nicheña, ilaña mukachi kenu mwenzala ntuuya nikutama. Enu antu abula maana! Komana owu waleñeli mukachi hidiyi waleñeli nihanjiku?”—Luka 11:39, 40.

Kwikala wakadi majilu kumakasa henohu kanda wutachiki kuda himuloñaku, ilaña kudi awa akulumpi anfwikiji wena himuloña. Afwarisi niamakwawu esukaña kumakasa muloña wanaka kashidikilu akañanyaña kutookesha nyichima yawu yatama. Dichi Yesu nayifumbi nindi: “Hanenuña yawaana yaluwi yidi munyichima yenu, nawa tiyenu! yuma yejima kudi enu yakekala yitooka.” (Luka 11:41) Dimu! Kuhana kwatela kufumaña hamuchima, bayi kufwila kutiyisha antu kuwaha kuhitila mukudidimba neyi waloñaku.

Chinamwekeni neyi awa amayala ahanaña wanyi. Yesu nashimuni nindi: “Mwahanaña yamwikumi yalweñi, nipeganoni nimafu ejima evumba dadiwahi amumatempa, ilaña mwadiwulaña wuñanji nikumukeña Nzambi! Yumiyi mwateleleli kuyila, ilaña bayi kudiwula oyu yuma yikwawuku.” (Luka 11:42) Nshimbi yaNzambi yashimwini nawu atela kuhanaña yamwikumi yambutu. (Kuhituluka 14:22) Chumichi munabombeli minti nipeganoni nimafu ejima evumba dadiwahi awahishaña yakuda. Afwarisi afwetaña yamwikumi yamafu evumba dadiwahi, ilaña adiwulaña chuma chalema chashimunawu muNshimbi, chidi neyi kumwekesha wuñanji nikudikehesha—Mika 6:8.

Yesu natwalekihu kuhosha nindi: “Oyihuñu yimwakamona enu aFwarisi, muloña mwakeña kushakama hayitwamu yakumbidi mumasinagogi nikukeña nenu ayimusheña muyisankanu! Oyihuñu yimwakamona enu, muloña mudi neyi majamu abulaña kumwekana, nawa antu endujolañahu chakadi kwiluka nawu hadi majamu!” (Luka 11:43, 44) Eña, antu anateli kuhukana namajamu amuchidi awa nawa akwikala namajilu. Yesu nazatishi chumichi hakulumbulula nindi majilu awa aFwarisi amwekanaña wanyi.—Matewu 23:27.

Iyala wumu weluka chikupu Nshimbi namuleji nindi: “Ntañishi, owu mazu iwunahoshi, wunatutuki ninetu.” Hela chochu awa antu atela kwiluka nawu akañanyaña kukwasha antu. Yesu nahoshi nindi: “Oyihuñu yimwakamona ninenu mweluka chikupu Nshimbi, muloña mwatwikaña akwenu yiteli yalema yakala kusenda, ilaña enu aweni himwatweshaña kukunka oyu yiteli hela namunu wenu wumuku! Oyihuñu yimwakamona enu, muloña mwatuñaña majamu awatuprofwetu henohu ankakulula jenu diwu ayijahili!”—Luka 11:45-47.

Yiteli yinakutenayi Yesu hitushidikilu twawu niaFwarisi chalumbululañawu Nshimbi. Awa amayala anakukoleshela antu chihandilu. Nawa anakukanjikija antu nawu ejima wawu atela kulondela iyi nshimbi. Ankakulula jawu ajahili atuprofwetu, kutachikila hadi Abeli. Dichi wena anakumona nawu anakulemesha atuprofwetu anakuyimbila majamu kuhitila mukwimbujola ankakulula jawu. Anakukeña nikujaha kaprofwetu wabadika waNzambi. Yesu nahoshi nindi Nzambi wakababesha idi ikiñu hamuloña wachumichi. Nawa dichu chenjili nakumwekana yaaka 38, yahitilihu mu 70 C.E.

Yesu natwalekihu nindi: “Oyihuñu yimwakamona enu mweluka chikupu Nshimbi, muloña mwasendeli  nsapi yakwiluka. Enu aweni himweñililimuku, nawa mwakañeshaña antu anakwiñilamu!” (Luka 11:52) Awa amayala atela kukwasha antu kwiluka mwatalisha Izu daNzambi, diwu anakuletesha abuleña kwiluka nikuditiyishisha.

AFwarisi niansoneki aneli ñahi? Yesu chinatachikiyi kuya anatachiki kumudimbulula nikumwihula malwihu. Bayi neyi anakumwihula muloña anakukeña kwilukaku. Ilaña, anakukeña ahoshi yuma yikuletesha amukwatilihu.