Yesu wuchidi muYerusalema kuChawija chaTabanaka (hela chaYisolu), Yesu nayi nakutañisha chalala chalema. AYudeya amakwawu adihu anamuleji nawu: “Etu tudi anyana kaAbarahama nawa kanda twikaleñahu dehi anduñuku.” Yesu nakuli nindi: “Neluki nami mudi anyana kaAbarahama. Ilaña munakukeña kunjaha, muloña himwetejaña yuma yinatañishañaku. Ami nahoshaña yuma yinamweni hinadiña naTata yami, ilaña enu mwelaña yuma yimwatiyaña kudi tata yenu.”—Yowanu 8:33, 37, 38.

Chikuma chaYesu chapela: Tata yindi wambukaku nawatata jawu. Chineli aneluki wanyi munatalishiyi Yesu, aYudeya anafuntishihu cheñi nawu: “Etu tata yetu Abarahama.” (Yowanu 8:39; Isaya 41:8) Diimu tuhu afuma kudi yena. Dichinakuletesha adimoneña nawu akweti chikuhwelelu neyi chebwambu daNzambi Abarahama.

Hela chochu, Yesu nayakuli munjila yakuhayamisha nindi: “Neyi mwadiña anyana kaAbarahama, mwadi kuzataña nyidimu yaAbarahama.” Mwamweni, mwana wembujolaña tata yindi. Yesu natwalekihu nindi: “Ilaña ichi munakukeña kunjaha, ami wunayileji chalala chinatiyili kudi Nzambi. Abarahama helili mwenimuku.” Kuhiñahu Yesu nahoshi mazu anayihayamishi nindi: “Munakuzata nyidimu yatata yenu.”—Yowanu 8:39-41.

AYudeya achidi kanda eluki muntu anakutenayi Yesu. Anakukaana nawu hiyanyana amuyiputaku, anakuhosha nawu: “Etu hitudi anyana amuwujilaku; tukweti Tata wumu, Nzambi.” Komana Nzambi hiTata yawu? Yesu nayileji nindi: “Neyi Nzambi wadiña Tata yenu, mwadi kunkeña, muloña ami nafumini kudi Nzambi nawa nidi hanu. Hinadinjilili ami aweniku, ilaña Yena diyi wantemesheli.” Yesu nehuli lwihu nawa nakuli yomweni nindi: “Muloñadi chimunakubulila kutiya yuma yinnakuhosha? Muloña himunakwiteja mazu amiku.”—Yowanu 8:41-43.

Yesu namwekeshi yuma yinateli kufumamu neyi muntu amukaana. Ilaña nahoshi chakadi kuhita mumbadi nindi: “Enu mwafuma kudi tata yenu Diyabolu, nawa mwakeñaña kwila yuma yafwilañayi tata yenu.” Tata yawu wekala ñahi? Yesu namulumbululi munjila yatiyakana nindi: “Yeniwu wadiña mukakujaha antu kufuma hatachikiliyi, nawa hatwalekelihu kwenda muchalalaku, muloña chalala hichekala mudi yenaku.” Yesu nabombelihu nindi: “Muntu wafuma kudi Nzambi watiyililaña mazu aNzambi. Ichi dichayileteshaña mubuleña kutiyilila, muloña himwafuma kudi Nzambiku.”—Yowanu 8:44, 47.

Awa mazu anayihilishi aYudeya nawa anamwakuli nawu: “Komana tunatwambi hakuhosha netu, ‘Eyi wudi kaSamariya nawa wukweti ndemoni’?” Chinamuteniwu Yesu nawu “kaSamariya” anakumusupisha. Ilaña Yesu nayidiwuli nakuyakula nindi: “Ami hinikweti ndemoniku, ilaña namulemeshaña Tata yami, hakwila enu mwansawulaña.” Iyi nsañu yalema nachinahoshiyi Yesu nindi: “Neyi muntu ahemba mazu ami, hamba kamona kufwaku.” Hanatalishi mukwila nindi apostolu niantu amulondelaña akafwaku. Ilaña, hiyakamona kujilumuka kwahaya nyaaka, “kufwa kwamuchiyedi,” chakadi kuchiñejaku.—Yowanu 8:48-51; Chimwekeshu 21:8.

Ilaña aYudeya anatiyili mwacheñi, anahoshi nawu: “Ichi dinu tuneluki netu wudi nandemoni. Abarahama wafwa dehi niatuprofwetu, ilaña eyi wunakuhosha neyi, ‘Neyi muntu ahemba izu dami, hamba katompa kufwaku.’ Komana eyi wunamubadiki tata yetu Abarahama wafwa dehi tahindi? . . . Wunakudimona neyi yeyinyi?”—Yowanu 8:52, 53.

Chakadi nikujina, Yesu nakuyileja nindi yena diyi Mesiya. Ilaña chatela ashikeni kwakula lwihu lwawu nawu yena diyi Mesiya, nahoshi nindi: “Neyi nidilemesha ami aweni, kulema kwami kwamukunkulwayi. Tata yami diyi wanlemeshaña, owu imunakutena nenu Nzambi yenu. Ilaña enu himwamwilukaku, hakwila ami namwiluka. Nawa neyi nihosha nami hinamwilukaku, nukwikala neyi enu, akakutwamba.”—Yowanu 8:54, 55.

 Yesu nayifuntishi cheñi kuchakutalilahu chankakulula yawu wadiña washinshika, nindi: “Tata yenu Abarahama wazañaleli nankashi chachiñejeleñayi kumona ifuku dami, dichi wadimweni nawa wazañaleli.” Eña chineli wakuhweleli muyikaninu yaNzambi, Abarahama wachiñejeleña mpinji yakenza Mesiya. AYudeya anakuli nakuhayama nawu: “Eyi kanda wushikiji niyaaka 50, indi Abarahama wamumweni ñahi?” Yesu nayakuli nindi: “Inakuyileja chikupu nami, henohu Abarahama kanda yavwaliki, ami nadiña kwoku.” Nakutena mpinji yadiñayi mwiwulu neyi chileñaleña chañovu henohu kanda enzi hanu hamaseki.—Yowanu 8:56-58.

AYudeya anahili Yesu chinakuhoshayi nindi wadiña kwoku henohu Abarahama kanda, nawa anakukeña kumwasa malola. Ilaña Yesu nayishiyi chakadi kumukatisha.