Kukabadi kamusela kumukunkumuki waMpidi yaNyiolivi, hadi makilomita asatu kufuma kuYerusalema, dihekala mukala waBetani. (Yowanu 11:18) Yesu nayi kweniku nawa nashikeni kwitala dakansi namukulumpi, Mariya naMata. Wena nimanakwawu Lazaru, himabwambu jaYesu nawa anamutambwili chiwahi.

Kutambwila Mesiya mwitala dawu hikukooleka nankashi. Mata nakukeña kumutambwila chiwahi Yesu, dichi natachiki kuloñesha yakuda yayivulu. Hampinji yinakuzatayi Mata, muhelindi Mariya nashakami kunyendu yaYesu nakumutiyilila. Chimunahiti mpinji, Mata namwili Yesu nindi: “Mwanta, komana hiwunamoni Mariya chinanlekeliyi nyidimu nkawamiku? Muleji enzi ankwashiku.”—Luka 10:40.

Yesu hanamuzuwili Mariyaku, ilaña namufumbi Mata hakwakama yuma yayivulu nindi: “Mata, Mata, wunaakami nawa wunaluwankani nayuma yayivulu. Kunakukeñeka hohu yuma yantesha, hela chimu. Ilaña Mariya, natondihu iseka dadiwahi nawa kwosi wakamutambuladu.” (Luka 10:41, 42) Yesu nashimuni nindi chachiwahi wanyi kunata mpinji yeneni nakuloñesha yakuda yayivulu. Yantesha hohu diyinakukeñeka.

Chuma chinakwilayi Mata chatama wanyi. Nakukeña kumwekesha chisambu. Ilaña chinaswejiyi kwakama nayakuda chinayi mukwila nawu nakushalahu yuma yalema yinakushimunayi Mwana kaNzambi wumu hohu. Yesu nakonkomweni nindi Mariya nafuukuli chachiwahi chikumukwasha hadi mpinji yayilehi nawa ninetu dichuma chitwatela kudizilaku.

Hampinji yacheñi, nashimuni chambukaku ilaña chikuma chochimu chalema chitwatela kudizilaku. Kambanji namwihuli nindi: “Mwanta, tudizishi chakulomba, neyi Yowanu chadizishiliyi atumbanji twindi.” (Luka 11:1) Yesu wayidizishili dehi hakusambila kwakwihi nachaaka chimu nachikunku muMpanji yindi yahaMpidi. (Matewu 6:9-13) Hela chochu, iwu kambanji hadaha wadiñaku wanyi, dichi Yesu nafuntishihu yikuma yamaneni. Nkumininaku nashimuni chakutalilahu kulonda akonkomweni chatela kutatakenawu mukulomba.

“Tuhoshi netu wumu hakachi kenu wudi nebwambu nawa aya kudi yena hakachi kawufuku nakumwila nindi, ‘Ibwambu, nkongweshiku mankendi asatu, muloña natambwili ibwambu dami nafumi kwakulehi nawa hinikweti yakuda yakumwinkaku.’ Ilaña yena hakwakula mwitala nindi: ‘Lekaku kunkabisha. Kuchiisu kwakukiya nawa ami nianyanami anyanya tudi dehi mukadidi. Hinukutwesha kuhinduka nakukwinka chumaku.’ Inakuyileja nami, muloña wanyikoyu yindi, iwu muntu wukuhinduka nakumwinka chuma chejima chinakukeñayi, bayi neyi muloña wakwila hiibwambu dindiku.”—Luka 11:5-8.

Yesu natalishi wanyi mukwila nindi Yehova wakeñaña wanyi kwakula kulomba neyi ona ibwambu. Ilaña, natalishi mukwila nindi neyi ibwambu wunakubula kukeña wukutwesha kwakula mukwawu wunatwalekihu kumulomba, chakadi nikujina Tata yetu wamwiwulu watukeña wukwakula kulomba kwawambuña indi ashinshika. Yesu natwalekihu nindi: “Inakuyileja nami, lombenuña, akayinka; keñakeñenuña, mwakawana; dondomwenenuña, akayenzunwinaku. Muloña muntu wejima walombaña, watambwilaña, muntu wejima wakeñakeñaña, wawanaña, nimuntu wejima wadondomwenaña, amwenzunwinañaku.”—Luka 11:9, 10.

Nkumininaku Yesu nakonkomweni chikuma kuzatisha chakutalilahu chatata yawantu, nindi: “Tata yawantwinyi wukwila neyi mwanindi namulombi inshi, yena hakumwinka kapela chatela amwinki inshi? Hela neyi amulomba cheñi iteta, yena hakumwinka kanjimbu? Dichi, hela chakwila enu mwatama, ilaña mweluka kwinka anyanenu yawaana yayiwahi, dikwila nawu Tata yenu wekala mwiwulu wakasweja kuyinka antu amulombaña spiritu yajila.” (Luka 11:11-13) Awa mazu anakutuzañalesha hakwiluka netu Tata yetu watiyaña nikwakula kulomba kwetu!