Yesu wadiña nakuyifumba chiwahi atumbanji twindi chakuzatisha maheta. Ilaña atumbanji twindi hidiwu hohu anakutiyililaku. AFwarisi niwena anadiña hohu, nawa atiya kufumba kwaYesu. Muloñadi? Muloña asweja “kukeñesha mali.” Chinatiyiwu yuma yinakuhoshayi Yesu, ‘anatachiki kumudiwula.’—Luka 15:2; 16:13, 14.

Hela chochu, hichinamutiyishi Yesu womaku. Nayileji nindi: “Enu yenu mwadishimunaña kudi antu nenu mwaloña, ilaña Nzambi weluka nyichima yenu. Muloña chuma chamonañawu antu nawu chalema, kumesu aNzambi chawuzondu.”—Luka 16:15.

AFwarisi ‘anayilemeshi kudi antu’ hadi mpinji yayilehi, ilaña ayinu diyi mpinji yakuhimpika, mpinji yakubalumuna yuma chiyekala. Antu alemeshawu nankashi mukaayi namaheta, akweti ñovu mujamapolitiki nimujakwitiya atela kuyiholola. Antu eluka hohu nawu atela kudiza hadi Nzambi diwu atela kunyamunawu. Yesu nahoshi hatooka nindi kuhimpa kweneni kwatela kumwekana, nahoshi nindi:

“Nshimbi niaTuprofwetu jadiñaku kushika nimpinji yaYowanu. Kufuma hohenohu, Wanta waNzambi anakuwushimuna nawu nsañu yayiwahi, nawa antu akunyichidi yejima anakuzata nañovu kulonda eñilimu. Chalala, chaswayi iwulu niiseki kuhita kubadika kamufunda kansona kamuNshimbi kuhita chakadi kushikijewa.” (Luka 3:18; 16:16, 17) Mazu aYesu anamwekeshi ñahi nawu kuhimpika kunakumwekana?

Anlomboli jakwitiya kwawaYudeya ahoshaña nakuditiya nawu alondelaña Nshimbi jaMosi. Anukenu nenu chelili Yesu atoneshi iyala wumu muYerusalema, aFwarisi ahosheli nakuditiya nawu: “Etu tudi atumbanji twaMosi. Tuneluki netu Nzambi wahosheleña naMosi.” (Yowanu 9:13, 28, 29) Nkeñelu yimu yahaniniwu Nshimbi kuhitila mudi Mosi yadiña yakulombola antu adizoza kudi Mesiya, dikwila nawu, Yesu. Yowanu Mpapatishi wamuteneni Yesu nindi Mukoku waNzambi. (Yowanu 1:29-34) Kutachikila kumudimu waYowanu, aYudeya adizoza, sweje-e atuzweñi, adiña nakutiya nsañu ‘yaWanta waNzambi.’ Eña, kudi “nsañu yayiwahi” yawantu ejima anakukeña kwikala muWanta waNzambi nawa wuyikwashi.

Nshimbi yaMosi bayi neyi hiyinakushikijewaku; ilaña, yinakulombola antu kudi Mesiya. Kubombelahu, antu akuleka kujilondela. Chakutalilahu, Nshimbi jetejeli kuseñana hanyiloña yayivulu, ilaña Yesu nalumbululi nindi “muntu wejima wukuseña ñodindi nakusumbula wacheñi, neli wujila, nimuntu wukusumbula owu mumbanda anaseñiwu kudi nfumwindi, neli wujila.” (Luka 16:18) Iyi nsañu chakadi nikujina yinayihilishi aFwarisi!

Ichi Yesu nashimuni chakutalilahu chikwesekana nakuhimpika kukutachika kuzatika. Mudi amayala ayedi, yihandilu yawu yahimpikili mukulambula kwadisu. Hampinji yitukuhanjekaña hachakutalilahu,  anukenu nenu antu anakutiyilila hiyaFwarisi akeña mali anakulemeshawu kudi antu.

“Kwadiña iyala wumu samaheta wavwalileña mahina awusombu awuseya, nawa wadiluñishileña hefuku-hefuku chihandilu chawuhandu. Ilaña mukakulombalomba wumu wejina daLazaru wadiña nayilonda mujimba wejima amusendeleña nakumusha hachiisu chindi nawa wafwilileña kuda yakuda yaholokeleña hamesa yasamaheta. Niatuwa enjileña nakulasha hayilonda yindi.”—Luka 16:19-21.

AFwarisi akukeña mali, dichi kwosi amakwawu anakutenayi Yesu muchakutalilahu nindi “iyala wumu samaheta.” Awa anlomboli jakwitiya kwawaYudeya akeña cheñi kuvwala yakuvwala yayiwahi yamali. Tuneluki wanyi maheta akwetiwu, ilaña amwekanaña kuheta muloña wakukoleka kukwetiwu. Eña, chinayesekejiwu neyala wunavwali yakuvwala yawanta yawusombu chinakumwekesha yifulu yakeñawu, nawa yakuvwala yitooka yinakumwekesha chadimonañawu kuloña.—Danyeli 5:7.

Indi awa antu aheta, anlomboli adinka wanta amonaña ñahi atuzweñi niantu ejima? Ayimonaña nawu amahaaretisi, hela antu amwituña (ahamaseki), abula kwiluka Nshimbi hela atela kubulawu kudizishawu Nshimbi. (Yowanu 7:49) Chumichi chinesakani nachidi “mukakulombalomba wumu wejina daLazaru,” watiyilaña nzala “yakuda yaholokeleña hamesa yasamaheta.” Kufwana Lazaru  wudi nayilonda, antu hohu ayidiwulaña, neyi kwiji akata kuspiritu.

Chumichi chinashimbuli nankashi, ilaña Yesu neluki nindi mpinji yakuhimpa yinashiki kudi awa antu ejima adi neyi iyala samaheta ninowu adi neyi Lazaru.

Yesu natwalekihu kushimuna haniku kuhimpika. Nahoshi nindi: “Chimwahitili mpinji, mukakulombalomba wafwili nawa añelu amusendeli nakumutwala kukabadi kaAbarahama. Samaheta niyena wafwili nawa amujiikili. Nawa Mwijamu mwadiñayi wakabakeneña nankashi, chafumbwiliyi mesu indi, wamweni Abarahama hahalehi wudi naLazaru kukabadi kindi.”—Luka 16:22, 23.

Antu anakumutiyilila Yesu aneluki nawu Abarahama wafwili dehi nawa wudi Mwijamu. Nsona jashimuna hatooka nawu kwosi muntu wudi Mwijamu, hela muShelu, wunateli kumona hela kuhoshaku, kushilahu niAbarahama. (Mukwakutañisha 9:5, 10) Hanu dinu awa akulumpi jakwitiya anakutoñojoka nawu Yesu natalishi mudihi nanichi chakutalilahu? Watela nakutalisha hadi antu hohu nihadi awa akulumpi jakwitiya asweja kukeña mali?

Yesu nafumi tuhu nakushimuna hakuhimpika nachinahoshiyi nindi, ‘Nshimbi niaTuprofwetu jadiñaku kushika nimpinji yaYowanu, ilaña kufuma hohenohu, Wanta waNzambi anakuwushimuna nawu nsañu yayiwahi.’ Dichi, hikushimwina kwaYowanu naYesu Kristu nindi Lazaru niyala samaheta afwili muyuma yawu yakusambila hela chadiñawu hakusambila, nawa ichi adi nayifulu yayiha kudi Nzambi.

Sweje-e antu adizoza hela atuzweñi, anayidizishi wanyi kulonda amwiluki Nzambi hadi mpinji yayilehi. Ilaña anakuyikwasha nawa anakwiteja nsañu yaWanta yinayilejiwu kudi Yowanu Mpapatishi nikudi Yesu. Kunyima, ahandilileña hohu muyuma yantesha ‘yaholokeleña kumesa’ yawakulumpi jakwitiya. Ilaña ichi anakuyidiisha nayakuda yayiwahi yachalala chamuNsona, yuma yayiwahi yinakulumbululayi Yesu. Chidi tuhu neyi adi dehi nayifulu yalema kumesu aYehova Nzambi.

Kwambukaku, awa adi mwizanvu dawasamaheta anlomboli jakwitiya akaanaña kwiteja nsañu yaWanta yashimwiniyi Yowanu niyinakushimwinayi Yesu mwituña. (Matewu 3:1, 2; 4:17) Kafwampi, anahili, anatiyi kutama naniyi nsañu, yinakushimuna kwinza kwawunsompeshi waNzambi. (Matewu 3:7-12) Anlomboli jakwitiya akutiya kuwaha chikupu neyi Yesu niatumbanji twindi aleka kushimwina nsañu yaNzambi. Awa anlomboli adi neyi iyala samaheta wudi muchakutalilahu, wunakuhosha nindi: “Tata Abarahama, ntiyili luwi, nawa temeshaku Lazaru atumpiki insa yamunu windi mumenji kulonda atuutishi idimi dami, muloña inakukabakana nankashi munaka kesi kanakubidima.”—Luka 16:24.

 Ilaña chumichi chikumwekana wanyi. Anlomboli jakwitiya amavulu akuhimpa wanyi. Akaanini “kutiyilila kudi Mosi niAtuprofwetu,” nsañu yadi kuyikwasha kumutambwila Yesu nawu Mesiya nawa Mwanta anatondiwu kudi Nzambi. (Luka 16:29, 31; AÑalija 3:24) Nawa anakaani kudizoza kulonda atiyilili kudi atuzweñi anamwiteji Yesu nawa anatiyiwu kuwaha kudi Nzambi. Atumbanji twaYesu, wena kwawu adiwulaña wanyi chalala hela kuchisekesha kulonda atiyishi kuwaha anlomboli jakwitiya. Muchakutalilahu chindi, Yesu nalumbululi chumichi mumazu ahosheliyi “Tata Abarahama” kudi iyala samaheta:

“Eyi mwanami, anukaku neyi wadiluñishileña yuma yayiwahi muchihandilu cheyi, ilaña Lazaru watambwilileña yuma yatama. Ichi dinu, yena nakukundejewa, ilaña eyi wunakukabakana. Kubombela hayumiyi, hakachi kenu nanetu hadi ikela deneni nankashi kulonda antu anakukeña kufuma kunu nawu enzi kudi enu, akañanyi, hela antu anakukeña kufuma oku nawu enzi kudi etu, akañanyi.”—Luka 16:25, 26.

Iku kuhimpika kunateleli nawa kunashiki hampinji yayiwahi! Kunahimpi yuma hakachi kawanlomboli jakwitiya aditiya nawantu adizoza aneteji mpaanda yaYesu nawa anayinookeshi nikuyikwasha kulonda amwiluki Nzambi. (Matewu 11:28-30) Nawa iku kuhimpika kukumwekana hatooka mutukweji tukulondelahu neyi chitiyañenu chaNshimbi anachisinsi nachitiyañenu chachiha. (Yeremiya 31:31-33; AKolosi 2:14; AHeberu 8:7-13) Neyi Nzambi nechili dehi spiritu yajila hefuku daPentekosta 33 C.E., chikamwekana hatooka chikupu nawu, atumbanji twaYesu anayitiyi kuwaha kudi Nzambi bayi aFwarisi nawanlomboli jakwitiyaku.