Chakutalilahu chamwana wajimbeli, chinafumiyi tuhu Yesu nakushimuna, chatela chinayishiki hamuchima akakutambula nyisonku, ansoneki niaFwarisi, aneluki nawu Nzambi wafwilaña kwanakena akanshidi anabalumuki munyichima. (Luka 15:1-7, 11) Ichi nakuleja atumbanji twindi. Nazatishi chakutalilahu chikwawu, haniyi mpinji hiyala waheta wuneluki nindi muntu wamuhembelaña itala, hela ñamba, wunabuli kuzata chachiwahi.

Yesu nahoshi nindi ñamba anakumwila nawu nakuzatisha chiwahi wanyi yuma yankaaka yindi. Dichi nkaaka yindi nahoshi nindi wukumuhaña iwu ñamba. Ñamba natoñojoki nindi: “Nukwila ñahi, chineli nkaaka yami nakunhaña mudimu wawuñamba? Hinekala nañovu yakudimaku, nawa natiyaña nsonyi kulombalomba.” Hakwila yeluki chakwila nayuma yikukeña kumwekana, nakunkululi nindi: “Neluki chinukwila, kulonda neyi anhaña mudimu wawuñamba, antu akantambwili mumatala awu.” Hohenohu natambiki ejima adi nanyikudi, nakuyihula nindi: “Wakongweli chiñahi kudi nkaaka yami?”—Luka 16:3-5.

Watachi namwakuli nindi: “Yesekelu 100 yamanji amuolivi.” Dikwila nawu magaloni 580 amanji. Wadiña namukudi watela wadiña namanji amakwawu amuolivi hela neyi nehi wadiña mukakulandisha manji. Ñamba namuleji nindi: “Tambulaku mukanda weyi wachitiyañenu, nawa shakamaku heseki wusonekihu swayi-swayi 50 [magaloni 290].”—Luka 16: 6.

Ñamba nehuli mukwawu nindi: “Indi eyi, wakongweli chiñahi?” Namwakuli nindi: “Yesekelu yamaneni 100 yatidiku.” Dikwila nawu makwati oma 20,000. Dichi ñamba namuleji iwu wamukudi nindi: “Tambulaku mukanda weyi wachitiyañenu, wusonekuhu 80.” Mukudi nawufuntishi namapesenti 20.—Luka 16:7.

Ñamba wuchidi kutala maheta ankaaka yindi, dichi munjila yikwawu wuchidi nawuswa wakuyifumishilaku antu amukogwela nkaaka yindi. Chinakufumishaku kudi ana akweti mukudi, iwu ñamba nakukwata wubwambu nanowu anateli kumwila chiwahi neyi mudimu wunamumani.

Nkaaka yindi natiyi yuma yinakumwekana. Hela chakwila wukujimbesha yuma yayivulu nachuma chineliyi, nkaaka yindi natiyi kuwaha nañamba yindi nawa namuhameki “muloña welili mwamaana” hela chakwila “hadiña waloñaku.” Yesu nabombelihu nindi: “Anyana anshakaminu yamakonu akweti maana hakuzata nekiñu dawu kubadika anyana achejeji.”—Luka 16:8.

Yesu nakwiteja wanyi njila jinazatishiyi ñamba, hela hanakukolesha antu kuzatisha wupwapoki mujakulanda nakulandululaku. Hanu dinu, chumanyi chinakuhoshayi? Nayikoleshi atumbanji twindi nindi: “Kwatenu amabwambu kuzatisha maheta abula kuloña, kulonda neyi amana, akayitambwili mumaluña akushakamamu ahaya nyaaka.” (Luka 16:9) Eñañi, hadi chikuma chalema aha chakumwena yuma chadimu nikuzatisha maana. Ambuña aNzambi, “anyana achejeji,” atela kuzatisha  maheta awu munjila yayiwahi, nakutoñojoka hawumi wahaya nyaka kumbidi.

Yehova Nzambi naMwanindi hohu diwu anateli kutambwila muntu muWanta wamwiwulu hela muParadisa hamaseki muniwu Wanta. Twatela kukwata wubwambu nawu kuzatisha maheta etu itukweti kulonda tutwaleña mudimu waWanta hambidi. Twakatambwila wumi wahaya nyaka kumbidi neyi wuru, siliva nimaheta amakwawu amana hela ajiya.

Yesu nahoshi cheñi nindi antu ejima ashinshika hakuhemba nikuzatisha maheta hela yuma yikwetiwu akekala cheñi ashinshika hakuhemba yuma yasweja kulema. Yesu nahoshi nakuhanuka nindi: “Dichi, neyi himunamwekeshi kushinshika namaheta abula kuloñaku, hinyi wakayinka maheta alala [chidi neyi kutwamijaku Wanta]?”—Luka 16:11.

Yesu nakuyileja atumbanji twindi nindi atela kuzata nañovu neyi anakukeña nawu akayitambwili “mumaluña akushakamamu ahaya nyaaka.” Muntu kwila ekala kambuña Nzambi walala hampinji yoyimu hiñamba yamaheta abula kuloña hela maheta nehi. Yesu nakunkululi nindi: “Kwosi muntu wunateli kwikala ñamba yawanyanta ayediku, muloña wukuhelahu wumu nakukeñahu mukwawu, hela wukukakelahu wumu nakusekeshahu mukwawu. Himunateli kwikala anduñu jaNzambi niMahetaku.”—Luka 16:9, 13.