Yesu nahani chakutalilahu chamukoku wunajimbali niiwayawaya dadirakima hadaha wuchidi muPereya kumusela waKaloña Yodani. Nsañu yejima yinadizishiyi yidi yakwila nawu, twatela kuzañalala neyi mukanshidi nafunti kudi Nzambi. AFwarisi niansoneki anakukalisha nankashi muloña Yesu watambwilaña antu amuchidiwu. Komana awa antu amuchidiwu akudizilaku kuniyi yakutalilahu yiyedi? Komana aneluki Tata yetu wamwiwulu chatiyañayi hadi akanshidi anabalumuki mumuchima? Ichi Yesu nahani chakutalilahu chakushika hamuchima kulonda akonkomweni chikuma chochimu chalema.

Ichi chakutalilahu mudi tata yawantu wukweti anyanindi ayedi awamayala, wakansi diyi anashimuniwu nankashi munichi chakutalilahu. AFwarisi niansoneki kushilahu niantu amakwawu anakutiya chinakuhosha Yesu, atela kudizila kuyuma yinahoshiyi hadi mwana wakansi. Hela chochu, tukujimbalaku wanyi yuma yinahoshiyi Yesu hadi tata yawantu nimwanindi wamukulumpi, muloña twatela kudizila kuyilwilu yinamwekeshiwu. Dichi toñojokenu hadi awantu asatu hampinji yinakushimunayi Yesu ichi chakutalilahu.

Yesu natachiki kuhosha nindi: “Iyala wumu wadiña nawanyana ayedi awamayala. Mwana wakansi wamulejeli tata yindi nindi, ‘Tata, nyinkihu iseka dayuma yinatela kutambula.’ Dichi wayanzañeneni yuma yindi.” (Luka 15:11, 12) Talenu iwu mwana wakansi hanakulomba wuswana windi muloña tata yindi nafwiku. Tata yindi wuchidi wamumi. Ilaña mwana nakukeña amwinki iseka dindi hohenaha kulonda adimeni nawa eli yuma yinakukeñayi. Hiyumanyi?

Yesu nalumbululi nindi: “Chimwahitili mafuku antesha, mwana wakansi wapompesheli yuma yindi yejima nakuya kwituña dakwakulehi, nawa kwenoku wakisañeni yuma yindi yejima kuhitila mukushakama chihandilu chakubajama.” (Luka 15:13) Chatela ashakami mwitala dawu dakiñewa, natata yindi wakamenaña anyanindi, ilaña iwu mwana nayi kwituña dacheñi. Kwenoku nakisañani wuswana windi wejima nakudiñija muyilwilu yakubajama. Ilaña yuma yinamukalili dehi neyi chinatwalekihu Yesu nakuhosha nindi:

 “Chakisañeniyi yuma yindi yejima, munodu ituña dejima mwaholokeli nzala yakapwelendendi nawa washalili makasakasa. Dichi wayili nakudikunda namwenimbu wumu wamunodu ituña, owu wamutemesheli mumpata yindi nakubiña angulu. Wafwilileña tuhu nikuda mafulu adiileñawu angulu, ilaña kwosi niwumu wamwinkelihu chuma chidi chejimaku.”—Luka 15:14-16.

Nshimbi yaNzambi yashimuna añulu nawu amajilu, ilaña iwu mwana nekali kabiña wawa ñulu. Nzala yinamukwati chikupu chakwila natachiki nikuda yakuda yawanyama, añulu anakuhembayi. Dichi hamuloña wayihuñu yinamoniyi iwu mwani, “[watachikili] kutoñojoka cheñi chiwahi.” Wukwila ñahi? Nadihosheshi nindi: “Akakukalakala atata yami amavulu akweti yakuda yayivulu nankashi, ilaña ami kunu inakufwa nanzala. Nukunyamuka nakuya kudi tata yami nawa nukumuleja nami: “Tata, namuvulumuni Nzambi mwiwulu nineyi. Hinnateleli cheñi kuntena nawu mwaneyiku. Ñilishi niikali neyi akakukalakala eyi.”’ Hohenohu nanyamuki nakuya kudi tata yindi.—Luke 15:17-20.

Tata yindi wukwila ñahi? Komana wukuhila nakumuzuwila mwanindi chafuminiyi hetala? Komana tata yawantu wukumutambwila chachiwahi wanyi? Neyi mwadiña enu mwadi kwila ñahi? Indochu neyi wadiña mwanenu weyala hela wamumbanda?

Yesu nalumbululi chinatiyiyi tata yindi nichineliyi, nindi: “Henohu [mwanindi] wuchidi hahalehi, tata yindi wamumweni nawa wamutiyilili wushona, wamukinkililili nawa wamukumbatili  nakumufufwa.” (Luka 15:20) Hela chakwila watiyili nawu mwanindi wadiña nakubajama, ilaña namutambwili chiwahi hetala. Komana akulumpi jawaYudeya aditenaña nawu amwiluka Nzambi nawa adifuukulaña, akumona Tata yetu wamwiwulu chatiyañayi hadi akanshidi anabalumuki mumuchima? Komana akwiluka nawu Yesu niyena wamwekeshaña chilwilu chochimu chakutambwila?

Tata yawantu watoñojokelañaku nateli kumona mwanindi wunaneñi nikudihomba nindi nabalumuki mumuchima. Hela chochu, kukeña kwamwekeshayi tata yindi kwakumwimusha kunaleteshi mwana kushimuna nshidi jindi. Yesu nahoshi nindi: “Kuhiñahu, mwana wamulejeli nindi, ‘Tata, namuvulumuni Nzambi mwiwulu nineyi. Hinnateleli cheñi kuntena nawu mwaneyiku.’”—Luka 15:21.

Tata yawantu naleji anduñu jindi nindi: “Nyakalenu! letenu munkukumba wawuwahi nankashi mumuvwiki, nawa mumuvwiki nikazeya kumunu windi ninkwabilu kunyendu yindi. Letenu nimwana kañombi wanuna, mumujahi kulonda tudii nawa tuzañalali, muloña iwu mwanami wafwili ilaña nekali cheñi nawumi; wajimbeli ilaña namwekani.” Kuhiñahu anatachiki “kudiluñisha.”—Luka 15:22-24.

Ilaña mwanindi wamukulumpi wudi mwiha. Yesu nahoshi hadi yena nindi: “Chafuntiliyi nawa chashikiliyi kwakwihi netala, watiyili antu anakuvumisha tumina nikuhañana. Dichi watambikili ñamba wumu nakumwihula chuma chamwekeneña. Ñamba wamulejeli nindi, ‘Manakweyi nenzi nawa tata yeyi najahi mwana kañombi wanuna muloña nafunti wakola kumujimba.’ Ilaña yena wahilili nawa wakaanini kwiñila mukachi. Dichi tata yindi wedikili hanji nakutachika kumulembelela. Yena wamulejeli tata yindi nindi, ‘Tiyaña! Ami nakuzatili yaaka yayivulu nawa kanda nidikañeñahu dehi nanshimbi jeyi, ilaña kanda wunyinkeñahu dehi mwana kampembi kulonda nidiluñishi nawamabwambu jami. Ilaña chashikayi hohu iwu mwaneyi wakisañeni yuma yeyi nawayivumbi, wamujahila mwana kañombi wanuna.’”—Luka 15:25-30.

 Anyi adi neyi mwana wamukulumpi, adiña akalisha abula luwi hampinji yayitambwilileñayi Yesu antu hohu niakanshidi? Ansoneki nawaFwarisi. Chiyanakumutwikawu Yesu nyiloña hakutambwila akanshidi dichinaleteshi ahani ichi chakutalilahu. Hela chochu wejima wakalisha nanochu chamwekeshañayi Nzambi wushona watela kudizilaku.

Yesu nakunkululi chakutalilahu chindi nakushimuna tata yawantu chinamulejiyi mwanindi wamukulumpi nindi: “Mwanami, eyi wekalaña nanami mpinji yejima, nawa yuma yami yejima yeyeyi nawa. Chidi hohu chiwahi kuzañalala nikudiluñisha, muloña manakweyi wafwili, ilaña nekali cheñi nawumi; wajimbeli ilaña namwekani.”—Luka 15:31, 32.

Yesu nashimuni wanyi chuma chineliyi mwana wamukulumpi kufuma henaha. Hela chochu, hanyima yakufwa kwaYesu nikusañuka kwindi, “izaza deneni dawatupristu detiyili.” (Yilwilu 6:7) Hadaha ninana antu amakwawu amutiyileña Yesu nakushimuna chakutalilahu chamwana wajimbeli. Eña, chadiña chaswayi kudi wena kuhimpa yitoñojoka yawu, kubalumuka nikufunta kudi Nzambi.

Kufuma hanidi ifuku nikuya kumbidi atumbanji twaYesu atela kuhemba nikudizila yuma yalema munichi chakutalilahu. Chikuma chatachi chitunakudizilaku chidi chakwila nawu twatela kwikala hakachi kawantu jaNzambi, akamenañawu kudi Tata yetu watukeña nawa watwinkaña jitunakukeña, chatela tufwileña yuma yakudizañalesha “mwituña dakwakulehi.”

Chikuma chikwawu chitunakudizilaku chidi chakwila nawu neyi wumu hakachi ketu asempuka munjila yaNzambi, watela kudizoza nakufunta kudi Tata yetu kulonda amwiteji cheñi.

Chikuma chikwawu chitunakudizilaku hichaambu chidi hakachi katata yawantu wamutambwilili, nawa wanakeneni namwana wamukulumpi wahembeli ndulu, nikubula kutambwila mukwawu. Mwamweni, ambuña Nzambi atela kwanakenaña nikutambwila neyi wumu wasempukili nabalumuki chikupu mumuchima nawa nafunti cheñi mwitala daTata. Tuzañalaleña netu manakwetu ‘wafwili nekali cheñi nawumi’ nawa netu ‘wajimbeli namwekani.’