Yesu nafumi nakuleja antu anakumutiyilila muPereya nindi “amavulu anasambiliku, akekala akukumishaku, nawa anakumishiku, akekala akusambila.” (Matewu 19:30) Nakoleshi ichi chikuma nachakutalilahu chawakakukalakala mwitempa danyivinyu:

“Muloña Wanta wamumawulu wudi neyi mwanta wetala wamenekeli budidi nankashi nakukeña akakukalakala mwitempa dindi danyivinyu. Chelili natiyañani dehi nawakakukalakala nindi wukuyifweta denari yimu hamuntu-hamuntu ifuku damukuma, wayitemesheli kuya mwitempa dindi danyivinyu. Chayiliyi cheñi kuchisankanu kwakwihi naora yamuchisatu, wamweni cheñi amakwawu anemani hachisankanu chakadi nyidimu yinakuzatawu; dichi wayilejeli nindi, ‘Ninenu yenu mwitempa danyivinyu, nukuyifweta wufwetu washikila.’ Dichi ayili. Wayili cheñi kuchisankanu kwakwihi naora yamu 6 niyamu 9 nawa welili mwomumu. Nkumininaku, mpinji chiyashikili kwakwihi naora yamu 11, wayili cheñi kuchisankanu nawa wawanini antu amakwawu anemajali, wayihwili nindi, ‘Muloñadi chimunemeni hanu ifuku damukuma chakadi nyidimu yimunakuzata?’ Wena amwakwili nawu, ‘Muloña kwosi muntu wunatwiñiji mudimuku.’ Yena wayilili nindi, ‘Ninenu yenu mwitempa danyivinyu.’”—Matewu 20:1-7.

Antu anakumutiyilila Yesu atela anatoñojoki hadi Yehova Nzambi chinatiyiwu nahoshi nindi “Wanta wamumawulu” nawa nindi “mwanta wetala.” Nsona jamutena Yehova nawu mwini itempa danyivinyu, demeneneñaku muza wawaIsarela. (Isamu 80:8, 9; Isaya 5:3, 4) Ana ekala muchitiyañenu chaNshimbi ayesekeja nawakakukalakala mwitempa danyivinyu. Hela chochu, Yesu nakutena yuma yakunyimaku. Nakutena chuma chinakumwekana mumafuku indi.

Kufwana aFwarisi, anlomboli jakwitiya katataka tuhu amweseka hansañu jakudiseña, anatwalekihu kukabakana mumudimu waNzambi. Adi neyi akakukalakala ampinji yejima akeñaña kuyifweta nfwetu yejima, nfwetu yefuku hifuku yadenari.

Atupristu niantu amakwawu adi munidi izanvu amonaña aYudeya hohu nawu amukalakelaña Nzambi nankashi wanyi, adi neyi akakukalakala mwitempa daNzambi amafuku antesha. Muchakutalilahu chaYesu, awa diwu antu aneñijiwu mudimu “naora yamuchisatu” (9:00 a.m.) hela namwana, naora yamu 6 niyamu 9, nkumininaku nimuora yamu 11 (5:00 p.m.).

Amayala niambanda amulondelaña Yesu ayimonaña nawu “hiyantu ashiñewa.” (Yowanu 7:49) Mpinji yawu yayivulu ayumbilaña kukukwata inshi hela kukukalakala. Ilaña, kukumana kwa 29 C.E., “mwini itempa” wamutemesheli Yesu nakutambika antu adizoza kulonda amukalakeleña Nzambi neyi atumbanji twaKristu. Diwu “akukumishaku” ateneniyi Yesu nindi akakukalakala mwitempa danyivinyu amuora yamu 11.

Hakukunkulula chakutalilahu chindi, Yesu nalumbululi yuma yinamwekani kukumana kwefuku, nindi: “Chikwelili melela, mwini itempa walejeli kapitawu kindi nindi, ‘Tambikaku akakukalakala kulonda wuyinki nfwetu yawu, wutachiki nanana akumininaku nawa wukumishi nanana asambilaku.’ Akakukalakala atachikili kuzata haora yamu 11 chenjiliwu, wejima wawu atambwili denari yimu hamuntu-hamuntu. Akakukalakala asambililiku chenjiliwu, atoñojokeli nawu wena akutambula nfwetu yeneni, ilaña niwena ayifweteli denari yimu hamuntu-hamuntu. Chatambwiliwu nfwetu yawu, atachikili kumutoobela mwanta wetala nawa ahosheli nawu, ‘Awa antu akuminaku anazati hohu ora yimu; ilaña wunayifweti nfwetu yoyimu nanetu tunazati ifuku damukuma nikuha munkanza!’ Ilaña yena walejeli wumu hakachi kawu nindi, ‘Eyi mukwetu, kwosi chuma chatama chinnakwili. Twatiyañana kukwinka denari yimu, hidimuku? Tambulaku denari yeyi wuyeña. Inakukeña kuyifweta awa akuminaku nfwetu neyi yinnakufweti eyi. Komana hinikweti wuswa wakwila chuma chinnakukeña nayuma yamiku? Indi  kwiji wunatiyi ichima muloña akwenu nayilili chuma chachiwahi?’ Munjila yoyimu, antu anakumininiku akekala akusambila nawa antu anasambiliku akekala akukumininaku.”—Matewu 20:8-16.

Atumbanji atela anakutoñojoka hamazu akukumishaku munichi chakutalilahu. Indi anlomboli jakwitiya kwawaYudeya adimonaña kwikala “akusambila” akwikala ñahi “akukumininaku”? Nawa atumbanji twaYesu akwikala ñahi “akusambila”?

Atumbanji twaYesu, amonaña aFwarisi niantu makwawu nawu “akukumininaku” adi hakachi kawantu akekala “akusambila,” akatambwila nfwetu yawu yejima. Neyi Yesu nafwi, Yerusalema yahamaseki akaleka kuyizatisha, nawa Nzambi wakatonda muza wawuha, “Isarela waNzambi.” (AÑalija 6:16; Matewu 23:38) Yowanu Mpapatishi wateneni antu amuchidiwu chahosheliyi hakupapatisha naspiritu yajila. Ana adiña “akukumininaku” akekala akusambila kutambwila chipapatishu nikwikala nakukooleka kwakwikala ayinsahu aYesu “kwakumina iseki dejima.” (Yilwilu 1:5, 8; Matewu 3:11) Atumbanji chelukawu mpinji yayiwahi yinakutenayi Yesu, anateli kufwikija chinakuyitiyawu kutama kudi akulumpi jakwitiya, akekala “akukumininaku.”