Yesu wuchidi kwitala dakaFwarisi hanyima yakuuka muntu wakata ndondu. Yesu nakumona antu anatambikiwu anakushakama hayitwamu yalema hakuda, nawa nazatishi iyi mpinji kulonda adizishi chikuma hakudizoza.

Yesu nahoshi nindi: “Neyi akutambika kudi muntu kuchawija chawulu, bayi wushakama mwiluña dalema nankashiku. Hadaha muntu walema kubadika eyi niyena anamutambiki. Dichi muntu wunayitambiki wejima wenu ayedi wukwinza nakukuleja nindi, ‘Fumaku ohu kulonda iwu muntu ashakamihu.’ Nawa wukutiya nsonyi kushakama habula kulema.”—Luka 14:8, 9.

Kuhiñahu Yesu nahoshi nindi: “Neyi anakutambiki, yaku wushakami mwiluña dabula kulema, kulonda neyi muntu wunakutambiki enza, wukukuleja nindi, ‘Eyi ibwambu dami, yaku wushakami hana halema.’ Dichi wukwikala walema kumesu awakwenu enyi ejima anatambikiwu.” Kudi yuma yikwawu yitwatela kudizilaku bayi hakumwekesha hohu yilwilu yayiwahiku. Yesu nalumbululi nindi: “Muloña muntu wejima waditoheshaña, akamuzozesha, nawa muntu wejima wadizozaña, akamutohesha.” (Luka 14:10, 11) Eña nakukolesha antu anakumutiyilila kwikala adizoza.

Kuhiñahu, Yesu nashimuni cheñi chuma chatela kudizilaku kaFwarisi wamutambika, chakuloñesha yakuda yikwitejayi Nzambi. “Neyi wuloñesha kuda kwamwaana hela kwamelela, bayi wutambika amabwambu jeyi hela anakweyi hela antaña jeyi hela antuñi neyi ahetaku. Neyi nehi keña akakutambiki nineyi, nawa wukwikala hiwufwetu weyi. Ilaña neyi wuloñesha chawija, tambikaku atuzweñi, ayifwayi, akakubalakata, amputamesu; nawa eyi wakekala namuzañalu, muloña wena hiyakweti chuma chakukwinkaku.”—Luka 14:12-14.

Chekala chaswayi kutambika amabwambu, antaña hela antuñi neyi kwinza nakuda yakuda, ilaña Yesu nakuhosha wanyi nindi chatama kwila chumichi. Hela chochu, nakukonkomwena nindi kuyiloñeshela yakuda antu anakaankili, chidi neyi atuzweñi ayifwayi, hela amputamesu, mwafumaña muzañalu. Yesu namulumbulwili muntu wamutambika nindi: “Akakufweta hakasañulawu antu aloña.” Muntu mukwawu atambikawu neteji, nahoshi nindi: “Wudi namuzañalu yowu muntu wadaña muWanta waNzambi.” (Luka 14:15) Namoni nindi iku kwakekala hikukoleka nankashi. Hela chochu, bayi neyi ejima dichinakumonawuku, nawa Yesu nahani chakutalilahu nindi:

“Kwadiña muntu waloñesheli chawija cheneni, nawa watambikili antu amavulu. Watemesheli nduñu yindi . . . kulonda aleji antu atambikiliwu nindi, ‘Inzenu, muloña yuma yejima anayiloñeshi dehi.’ Ilaña wejima wawu atachikili kuleyaleya. Watachi wahosheli nindi, ‘Ñanakeniku, nalandi iha; dichi inakukeña niyi nakaditali.’ Nawa mukwawu wahosheli nindi, ‘Ñanakeniku, nalanda añombi 10 akumpaanda; dichi inakukeña niyi nakayeseki.’ Mukwawu niyena wahosheli nindi, ‘Nafumi tuhu nakusumbula, muloña wachumichi nukutwesha kwinza wanyi.’”—Luka 14:16-20.

Iyi diyi nyiloña yakukaaninahu wanyi! Muntu wasambilaña kutalatala mpata hela chimuna henohu kanda achilandi, dichi nateli kuyitala neyi chidika chinamani. Muntu wamuchisatu niyena nakudiloñesha kusumbula wanyi. Wasumbula dehi, dichi chumichi kwila chimukañesha kwiteja mutambi walema nehi. Hanyima yakutiya yuma yejima iyi, mwanta windi nahili nawa namuleji nduñu yindi nindi:

“Yaña swayi-swayi munyikwakwa yamaneni nimunjila jamumusumba, kulonda wuleti atuzweñi, ayifwayi, amputamesu niakakubalakata.” Antu achidi kukeñeka hanyima yakwila nduñu neli munamulejiwu. Mwanta windi namuleji nduñu nindi: “Yaña munyikwakwa nimumajila wushinjili antu enzi eñili kulonda itala dami dinzali. Muloña inakukuleja nami, ana antu ejima inatambika, hosi niwumu  wukuda kuda kwami kwamelelaku.”—Luka 14:21-24.

Chuma chinalumbululiyi Yesu chinamwekeshi chiwahi Yehova Nzambi kuhitila mudi Yesu Kristu chatambikañayi antu kulonda enzi muWanta wamumawulu. AYudeya, sweje-e akulumpi jakwitiya, diwu adiña akusambila kutambika. Akaanini mutambi wayitambikili Yesu hampinji yashimwinineñayi. Ilaña iwu mutambi wukukumina hohu kudi wenaku. Yesu nakuhosha nindi kumbidi mutambi wamuchiyedi mwakabombela antu akehelamu amumuza wawaYudeya niantu abula kwitiya. Kuhiñahu, kwakekala cheñi mutambi wamuchisatu nawa wakukumishaku wakutambika antu amweneñawu aYudeya nawu hiyatelela kumesu aNzambiku.—Yilwilu10:28-48.

Mwamweni, yuma yinakuhoshayi Yesu yinesekani namazu ahosheliyi mukwawu mwayitambikililiwu nindi: “Wudi namuzañalu yowu muntu wadaña muWanta waNzambi.”