Hadi mpinji yayilehi, Yesu wadiña “kwishinadi daYodani” mwiluña datenañawu nawu Pereya. (Yowanu 10:40) Ichi nayi kukabeta kachidiilu kuYerusalema.

Yesu hadi nkawindiku. Atumbanji twindi adi hamu nayena, kushilahu “nimazaza amaneni awantu,” akakutambula nyisonku niakanshidi. (Luka 14:25; 15:1) AFwarisi niansoneki, abula kukeña yuma yinakuhoshayi Yesu niyinakwilayi, niwena adi hohu. Anakutoñojokahu nankashi hanyima yakutiya Yesu nahani chakutalilahu chamukoku wajimbeli, mwana wajimbeli, nicheyala samaheta naLazaru.—Luka 15:2; 16:14.

Hadaha iku nakwanuka chinakumutwikawu nyiloña nikumutala chatama, Yesu nabalumukili kudi atumbanji twindi. Nahoshi hayikuma yimu yatañishiliyi muÑaliliya.

Chakutalilahu, Yesu nahoshi nindi: “Chakadi nikujina, yuma yakahukesha antu yakenza. Hela chochu, oyihuñu yakamonayi muntu muyakenjila! . . . Dichi babalenu. Neyi manakweyi nakoñi nshidi, muzuwili, nawa neyi nabalumuki mumuchima, mwanakeni. Hela chakwila yakuvulumuna mapampa 7 hefuku, nawa enza kudi eyi mapampa 7 nakuhosha nindi, ‘Nabalumuki mumuchima,’ watela kumwanakena.” (Luka 17:1-4) Awa mazu akukumishaku atela anamwanukishi Petulu lwihu lwehwiliyi hakwanakena mapampa 7.—Matewu 18:21.

Komana awa atumbanji akulondela mazu anahoshiyi Yesu? Chinamwiliwu Yesu awu “tuvulishili chikuhwelelu” yena nayileji nindi: “Neyi mwadiña nachikuhwelelu chesekana naluchacha lwamositadi, mwadi kuleja iwu mutondu wamalubeni nenu, ‘Bwitikaku wuditumbi mukaluñalwiji!’ niwena wadi kuyovwahila.” (Luka 17:5, 6) Eña, nichikuhwelelu chantesha chinateli kuzata mudimu weneni.

Yesu natwalekihu nakuyitañisha chichalemena kwikala adizoza, chatela kudimonawu aweni, nayileji apostolu indi nindi: “Hinyi hakachi kenu wukweti nduñu wunakudima nañombi hela wunakubiña wukwila neyi owu nduñu nafumi kumaha, yena hakumuleja nindi, ‘Twaya kunu swayi-swayi wudii yakuda kumesa’? Komana, hakumuleja nindi, ‘Nloñesheli kuda kwamelela, vwalaku ihina kulonda wunyinki yakuda sampu namanishi kuda nikunwa, kuhiñahu dinu nineyi wudi nikunwaku’? Komana yena wukumuhameka iwu nduñu hamuloña wakwila nazati mudimu wamwinkayi tahindi? Chochimu ninenu nawa, neyi muzata nyidimu yinayinkiwu, hoshenu nenu: ‘Tudi hohu anduñu amukunkulwayi. Chuma chituneli dichitwatela kwila.’”—Luka 17:7-10.

Kambuña Nzambi wejima watela kwiluka chichalemena kutwamijaku yuma yaNzambi hambidi. Kubombelahu, wejima watela kwanuka kukooleka kukwetiyi kwakudifukula kudi Nzambi mwitala dindi.

Chinamwekani neyi hanyima yachumichi, ntemesha anatemeshiwu kudi Mariya naMata nashiki. Hiyahela aLazaru, nawa ashakamaña muBetani yamuYudeya. Ntemesha nashimuni nindi: “Mwanta, tiyaña! Muntu iwakeña wakata.”—Yowanu 11:1-3.

Hela chakwila neluki nindi ibwambu dindi Lazaru nakati chikupu, Yesu hanasweji kuneñaku. Ilaña nahoshi nindi: “Iku kukata bayi neyi kwakufwaku, ilaña kwakumulemeshelamu Nzambi, kulonda niMwana kaNzambi niyena amulemeshelimu.” Natwalekihu mwiluña mudiyi hadi mafuku ayedi nawa nayileji atumbanji twindi nindi: “Tuyenu cheñi kuYudeya.” Kuchinka wena nawu: “Rabi, katataka tuhu aYudeya akeñaña kukwasa malola, ilaña eyi hiwukukeña kufuntaku cheñi?”—Yowanu 11:4, 7, 8.

Yesu nayakuli nindi: “Kwekala maora 12 amwaana, netu? Neyi muntu enda namwaana, hahukanaña kuchuma hela chimuku, muloña wamonaña chejeji chakanu kaayi. Ilaña neyi muntu yenda nawufuku,  wahukanaña, muloña mudi yena himudi chejejiku.” (Yowanu 11:9, 10) Watela nakuhosha nindi mpinji yamwinkawu Yesu kudi Nzambi kulonda amanishilimu mudimu wakushimwina kanda yimani. Yesu watela kutwalekahu kuzata mumpinji yantesha yinashaliku sampu yinamani.

Yesu nabombelihu nindi: “Ibwambu detu Lazaru nakaami mutulu, ilaña inakuya kwenoku nakumuhindwisha.” Hadaha atumbanji anakutoñojoka nawu Lazaru nakaami tulu nawa wukuhinduka, anamwihuli nawu: “Mwanta, neyi nakaami mutulu, dikwila nawu wukukola.” Yesu nayileji hatooka nindi: “Lazaru nafwi . . . Ilaña tuyenu kudi yena.”—Yowanu 11:11-15.

Neluki nindi Yesu akumujahila muYudeya, ilaña nakukeña kumukwasha, Tomasi nayileji akwawu atumbanji nindi: “Ninetu nawa tuyenu kulonda twakafwili hamu nindi.”—Yowanu 11:16.