Hampinji yinakufumayi kuPereya, Yesu nashiki kunsa yaBetani mukala hadi makilomita 3 kumusela waYerusalema. Mariya niMata ahela aLazaru, anakumudila manakwawu wunafwi. Antu amavulu anenzi nakuyikundeja.

Nkumininaku muntu wumu namuleji Mata nindi Yesu nakwinza nawa natemukiliku nakumukinkilila. Mata namuleji Yesu yena nimuhelindi yuma yatoñojokañawu hadi mafuku awana nindi: “Mwanta, neyi wadiña kunu, manakwami hadi kufwaku.” Hela chochu, hichinatalishi mukwila nawu hakweti kuchiñejaku. Mata nahoshi nindi: “Neluki nami chuma chejima chiwukumulomba Nzambi, wukukwinkachu.” (Yowanu 11:21, 22) Nakutoñojoka nindi Yesu wadi kukwasha manakwindi.

Yesu namwakuli nindi: “Manakweyi wukusañuka.” Mata nakunkululi nindi nakutena kusañuka kwakumbidi hanu hamaseki, kuchiñeja kwadiña naAbarahama niantu amakwawu. Nashimuni chuma chakuhwelelayi nindi chalala chumichi chakamwekana: “Neluki nami wakasañuka hikwakekala kusañuka hefuku dakukumishaku.”—Yowanu 11:23, 24.

Tahindi Yesu wukwila chuma swayi chikuyikundeja? Namuleji Mata nindi Nzambi wamwinka ñovu hadi kufwa, nahoshi nindi: “Muntu wejima wukunkuhwelela, hela chakwila afwa, wakekala nawumi cheñi; muntu wejima wukweti wumi nawa wukunkuhwelela, hamba kafwaku.”—Yowanu 11:25, 26.

Yesu hanakuhosha nindi atumbanji twindi amomi hiyakabula kufwaku. Hela tuhu yena watela kufwa, neyi chalejeliyi atumbanji twindi. (Matewu 16:21; 17:22, 23) Yesu nakukonkomwena nindi neyi muntu amukuhwelela wakekala nawumi wahaya nyaaka. Amavulu iwu wumi akuwutambwila kuhitila mukusañuka. Hela chochu, antu ashinshika akekalaku hakukuma kwanshakaminu yinu hiyakafwaku. Dichi, wejima wukumukuhwelela watela kwiluka nindi hakafwa haya nyaakaku.

Hanu dinu Yesu wunafumi nakuhosha nindi: “Yami kusañuka niwumi,” wukumukwasha Lazaru wunafwi munahiti mafuku? Yesu namwihuli Mata nindi: “Wunakuhweleli chumichi?” Yena namwakuli nindi: “Diimu Mwanta, nakuhweleli nami yeyi Kristu, Mwana kaNzambi, owu ashimwiniwu nawu wakenza mukaayi.” Chineli nakuhweleli nindi Yesu nateli kwila chuma chimu hadodenidi ifuku, Mata nayi nakumuleja muhelindi kwankawindi nindi: “Ntañishi nenzi nawa nakukutambika.” (Yowanu 11:25-28) Kufumahu, Mariya nanyamuki hetala nawa anamulondeli kudi antu amakwawu, anakutoñojoka nawu nayi kwijamu daLazaru.

Ilaña, Mariya nayi kudi Yesu, nadimbukili kunyendu yaYesu nakudila nawa nahoshi mazu wowamu ahosha muhelindi nindi: “Mwanta, neyi wadiña kunu, manakwami hadi kufwaku.” Chinamoniyi Mariya nimazaza anakudila, Yesu naneñi chikupu niyena nadili. Chumichi chinayikwati antu anakumonaku hamuchima. Ilaña amakwawu anehuli nawu: ‘Neyi Yesu wukutonesha muntu wavwalikili mputamesu, muloñadi chabulilayi kumukañesha iwu muntu kufwa?’—Yowanu 11:32, 37.