Kufuma kuÑaliliya, Yesu niatumbanji twindi anazambuki Kaloña Yodani nawa anayi kukabeta kakuchidilu muPereya. Yesu chadiñayi muPereya kakukumishaku, wayilejeli aFwarisi Nzambi chamonañayi kudiseña. (Luka 16:18) Dichi analeti iyi nsañu kulonda amweseki Yesu.

Mosi wasonekeli nindi mumbanda anateli kumuseña neyi “namonimu chuma chatama mudi” yena. (Kuhituluka 24:1) Antu adi nayitoñojoka yashiyashana kutalisha hakudiseña. Amakwawu akuhwelela nawu munadibombeli nitunsañu twanyanya. Dichi aFwarisi anehuli nawu: “Komana nshimbi yeteja iyala kuseña ñodindi hamuloña wudi wejima?”—Matewu 19:3.

Chatela ayakuli kwesekeja nachatoñojokañawu antu, Yesu nayileji chamonañayi Nzambi washiliku wulu. Nahoshi nindi: “Hamuloña wachumichi, iyala wakashiya tata yindi nimama yindi nakukakela kudi ñodindi, nawa wejima wawu ayedi akekala mujimba wumu.’ Kulonda abuli kwikala ayedi, ilaña ekali mujimba wumu. Dichi, chuma chinabombiyi Nzambi, bayi muntu achaambulaku.” (Matewu 19:4-6) Nzambi chatachikishiliyi wulu waAdama naEva, washiliku wanyi njila yakumanishilamu wulu wawu.

AFwarisi anamwihuli Yesu nawu: “Hanu dinu, muloñadi Mosi chahosheleliyi nindi iyala wejima wukuhaña ñodindi amwinki mukanda wakumuseña nachu wunakumwekesha nawu namuseñi?” (Matewu 19:7) Yesu nayileji nindi: “Hamuloña wakuchinchika kwanyichima yenu, dichaletesheli Mosi ayiteji kuseña añodi jenu, ilaña dichichadiña wanyi kufuma kutachi.” (Matewu 19:8) “Kutachi” kwadiñaku mumafuku aMosi wanyi, ilaña himpinji yatachikishiliyi Nzambi wulu muEdeni.

Kuhiñahu Yesu nashimuni chikuma chalala chalema nindi: “Inakuyileja nami muntu wejima wukuseña ñodindi hakadi muloña wawuvumbi [muchiGiriki, por·neiʹa], nakusumbula wacheñi, neli dehi wujila.” (Matewu 19:9) Wuvumbi dichuma chetejawu muBayibolu chakudiseñelahu.

Chinayileteshi atumbanji kuhosha nawu: “Neyi dichichekala kudi iyala nañodindi, chikuwaha kubula kusumbula.” (Matewu 19:10) Mwamweni, muntu wunakufwila kusumbula watela kutoñojoka nindi wulu wahaya nyaaka!

Kutalisha hawujiki, Yesu nalumbululi nindi amakwawu asemuka hiyantuñu, afwa mwitala. Amakwawu ayibalumuna kwikala antuñu, hiyatiyaña mpwila yawuvumbiku. Nawa, amakwawu akeheshañaku mpwila yakutiya wuvumbi. Elaña mwenimu kulonda ashi muchima chikupu haWanta. Yesu naleji antu anakumutiyilila nindi: “Dichi muntu wukutwesha kushakama chakadi kusumbula ashakami.”—Matewu 19:12.

Dichi antu anatachiki kuleta anyanawu anyanya kudi Yesu. Hela chochu, atumbanji anayihosholi antu, hadaha anakukeña abuli kumukabisha Yesu. Yesu chinamoniyi chumichi nazuwi nawa nahoshi nindi: “Yilekenu anyana anyanya enzi kudi ami; bayi muyikaanishaku, muloña Wanta waNzambi wawantu adi neyi awa. Inakuyileja chalala nami, muntu wejima wabulaña kwiteja Wanta waNzambi neyi mwana wanyanya hamba keñilamuku.”—Maku 10:14, 15; Luka 18:15.

Chumanyi chitunakudizilaku? Hakwila nawu twiteji Wanta waNzambi, twatela kwikala adikehesha nikwiteja kutudizisha, neyi nyana yanyanya. Yesu namwekeshi nindi wakeña anyana anyanya kuhitila mukuyisha mumakasa indi nikuyikiswila. Nawa namwekeshi cheñi kukeña kwindi kudi antu ejima “etejaña Wanta waNzambi neyi mwana wanyanya.”—Luka 18:17.