Hampinji yambokamboka yazatañayi mudimu windi, Yesu nakonkomweni chichalemena kwikala adizoza. (Luka 14:8-11) Nakufwila chikupu kukeña amayala niambanda anakukeña kumukalakela Nzambi namuchima wejima. Kushika tuhu niyinu mpinji, amakwawu hiyakanshidi nankashi.

AFwarisi niansoneki anakumona antu amuchidiwu, antu amonañawu nawu ashikilamu wanyi, anakutiyilila kunsañu yaYesu. Anakuhosha nawu: “Iwu iyala watambwilaña akanshidi nikudiila hamu nawu.” (Luka 15:2) Afwarisi niansoneki adimonaña nawu abadika nawa amonaña antu akehelamu nawu himajilu adi kunyendu yawu. Neyi kutoñojoka nachayimonañawu awa antu, anlomboli azatishaña izu dachiHeberu dakwila nawu amahaaretisi, “antu amwituña [Iseki] hakuyitena wena.

Kwambukaku, Yesu nakulemesha ejima, kuyitiyila luwi niwushona. Amavulu hadi awa akehelamu, munadibombeli antu amonañawu nawu akanshidi, diwu anakufwila chikupu kumutiyilila Yesu. Hanu dinu, Yesu nakutiya ñahi nawa wukwila ñahi namahosha anakutambwilayi muloña wakukwasha akehelamu?

Ñakwilu yinatiyakani chinahaniyi chakutalilahu chakushika hamuchima, chinadifwani nachahaniniyi muKaperinamu. (Matewu 18:12-14) Yesu nahoshi yuma neyi kwiji aFwarisi aloña nawa adi mwiyinda daNzambi. Kwambukaku, antu akehelamu anayishimuni neyi anafumi munjila nawa anajimbali. Yesu nahoshi nindi:

“Iyalanyi hakachi kenu wukweti anyikoku 100 nawa hajimbala wumu, wukubula kushiya anyikoku 99 mwisaña nakuya nakukeñakeña owu mukoku wunajimbali? Nawa neyi namuwani, wamushaña hamafwiji indi nawa wazañalalaña. Chashikayi kwitala, wapompeshaña amabwambu jindi niantuñi nindi nakuyileja nindi, ‘Zañalalenu hamu nanami, muloña nawani mukoku wami wajimbeli.’”—Luka 15:4-6.

Chumanyi chinakushimuna Yesu? Nalumbululi nindi; “Inakuyileja nami, mwiwulu nimwena mwekalaña muzañalu neyi mukanshidi wumu abalumuka mumuchima kubadika akakuloña 99 anakubula kukeñeka kubalumuka munyichima.”—Luka 15:7.

Yesu chinateniyi kubalumuka mumuchima chatela chinayishiki aFwarisi hamuchima. Adimonaña nawu aloña nawa atoñojokaña nawu hiyatela kubalumuka mumuchimaku. Hampinji yelili amakwawu hakachi kawu amwinki Yesu muloña nawu nakuda nawakakutambula nyisonku niakanshidi, wayakwili nindi: “Nenjili nakutambika akanshidi,  bayi aloñaku.” (Maku 2:15-17) Awa aFwarisi adimonaña kuloña anakañanyi kumona nawu atela kubalumuka mumuchima nawa mwiwulu aneñaña nachumichi. Ilaña mwekalaña muzañalu neyi akanshidi abalumuka mumuchima.

Hakukolesha chikuma chakwila nawu akanshidi neyi anabalumuki mwiwulu mwekalaña muzañalu, Yesu nashimuni cheñi chakutalilahu chikwawu, chamwekanaña mwitala: “Mumbandanyi wukweti mali amawayawaya amadirakima 10 nawa ajimbeshahu dirakima yimu, wukubula kwaambula inoñu nikukomba mwitala dindi nakukeñakeña chiwahi sampu nadiwani? Nawa neyi nadiwani, wapompeshaña amabwambu jindi niantuñi nindi nakuyileja nindi, ‘Zañalalenu hamu nanami, muloña nawani dali dewayawaya dadirakima dajimbala.’”—Luka 15:8, 9.

Chuma chakudizilaku chinahoshiyi Yesu chinesekani nachashimwiniyi muchakutalilahu chamukoku wunajimbali. Ichi nahoshi nindi: “Inakuyileja nami, añelu jaNzambi azañalalaña hadi mukanshidi wumu wunabalumuki mumuchima.”—Luka 15:10.

Toñojokenu hachumichi, añelu jaNzambi azañalalaña hakumona akanshidi anabalumuki. Chumichi chalema nankashi muloña akanshidi anabalumuki mumuchima nawa anetejiwu muWanta waNzambi wamwiwulu akekala namaluña alema kubadika añelu. (1 AKorinda 6:2, 3) Ilaña añelu atiyaña ichima wanyi. Hanu dinu twatela kutiya ñahi neyi mukanshidi abalumuka mumuchima nakufunta kudi Nzambi?