Yesu nadizishi yikuma yalema hampinji yadañayi yakuda kwitala danlomboli yawaAfwarisi. Yesu chinatwalekihu nalwendu lwakuya kuYerusalema, mazaza awantu anamulondeli. Muloñadi? Komana mwamweni anakukeña kwikala akakumulondela, hela chakwila kudi yuma yinakukeñeka kudi wena?

Chinakuyawu munjila, Yesu nahoshi chuma chikuyihayamisha, nindi: “Neyi muntu enza kudi ami nawa abula kuhela tata yindi hela mama yindi hela ñodindi hela anyanindi hela amanakwindi hela ahelindi hela wumi windi, hanateleli kwikala kambanji kamiku.” (Luka 14:26) Hanu natalishi mudihi chinahoshiyi awa mazu?

Yesu nakuhosha wanyi nindi ejima atela kwikala akakumulondela atela kuhela antaña jawu. Ilaña, natalishi mukwila nindi atela kuyihela munjila yakwila akeñi nankashi Yesu kubadika chayikeñawu, bayi neyi ona iyala wamuchakutalilahu chakuda kwamelela wakaanini mutambi walema muloña wakwila nafumi hohu hakusumbulaku. (Luka 14:20) Nkakulula yawaYudeya Yakoba amushimuna nawu “waheleli” Liya nawa wakeñeli Racheli, dikwila nawu wamukeñeli nankashi muhelindi Racheli kubadika Liya.—Kutachika 29:31; tumazu twaheshina.

Talenu Yesu nahoshi nindi kambanji watela kuhela “wumi windi,” hela kudihela yomweni. Chumichi chinatalishi mukwila nawu kambanji walala watela kumukeña Yesu kubadika chakeñayi wumi windi yomweni, watela nikufwila kujimbesha wumi windi neyi chinateleli. Mwamweni, kwikala kambanji kaKristu himudimu weneni. Muntu watela kutoñojokahu chikupu henohu kanda ekali kambanji.

Mukwikala kambanji mwabombela kumona yihuñu nimakabisha, muloña Yesu nahoshi nindi: “Muntu wejima wabulaña kusenda mutondu windi wakuyandishila nakunlondela, hanateleli kwikala kambanji kamiku.” (Luka 14:27) Eña, kambanji kaYesu walala watela kufwila kumona kukala kwamweni Yesu. Yesu nahoshi nikuhosha nindi nateli nikufwila kumakasa awayilumbu jindi.

Dichi mazaza anakuya naYesu atela kutoñojokahu chikupu mwatalisha kwikala kambanji kaKristu. Yesu nakonkomweni chumichi nachakutalilahu. Nahoshi nindi: “Chakutalilahu, hinyi hakachi kenu wukwila neyi nakukeña kutuña kaposhi wukubula kusambila kushakama hamaseki nakuchinda yuma yikuzatishayi kulonda eluki neyi wukweti yashikila yakukimanisha nachu? Neyi nehi, wukukumina dakwaala chikuku ilaña kumanisha nehi.” (Luka 14:28, 29) Dichi, henohu kanda ekali atumbanji twaYesu, awa anakuya nindi kuYerusalema atela kudikasa chikupu nawu mwamweni akuzataña iwu mudimu. Nakonkomweni cheñi ichi chikuma nachakutalilahu chikwawu:

“Indi kwiji mwantanyi wukweti mashidika 10,000 wukubula kusambila kushakama hamaseki kulonda amoni neyi wukutwesha kuzuña njita namukwawu mwanta wukweti mashidika 20,000? Kafwampi, neyi hakutwesha kwila mwenimuku,  wukutemesha izanvu dawañimeni atiyañani kulonda aleti kuwunda hachidiyi mukwawu kwakulehi.” Hakukolesha chikuma, Yesu nahoshi nindi: “Chochimu, mwatela kwiluka nenu kwosi niwumu hakachi kenu wunateli kwikala kambanji kami neyi abula kushiya yuma yindi yejimaku.”—Luka 14:31-33.

Hela chochu, Yesu nakutena hohu wanyi mazaza anakumulondela munjila. Ejima anakukeña kumulondela Kristu atela kufwila kwila yuma yinakuhoshayi. Chumichi chinatalishi mukwila nawu atela kudiloñesha kushiya yuma yejima yikwetiwu—yuma yawu, niwumi wawu—hakwila ekali atumbanji twindi. Hichuma chitwatela kutoñojokahu nikulombelahu chikupu.

Ilaña Yesu naleti cheñi nsañu yakunkiliku muMpanji yindi yahaMpidi hahosheliyi nindi atumbanji twindi diwu “muñwa wahamaseki.” (Matewu 5:13) Watela watalishili mukwila nindi neyi chekela muñwa chiwahembaña yuma, atumbanji twindi niwena atela kuhemba antu, kuyikiña kuchina akenda katoka kuspiritu nimuyilwilu. Dichi mudimu windi chiwunashiki mukamwihi, nahoshi nindi: “Kuhosha hohu chalala, muñwa wawuwahi. Ilaña neyi muñwa wusamunuka, akuwutoweja nankahi?” (Luka 14:34) Antu anakutiyilila aneluki nawu muñwa wukwawu hayina mpinji wadiña namajilu, wadibomba namalowa nawa awuzatishileña wanyi.

Dichi Yesu nakumwekesha nindi ninowu anekali atumbanji twindi hadi mpinji yayilehi bayi azeyaku. Neyi azeya, akwikala amukunkulwayi, neyi muñwa wasamunuka. Kaayi kakuyisehaña. Chikusweja kutama, akuyiteja wanyi kudi Nzambi nawa akuleta kasawuntu hejina dindi. Yesu nakonkomweni kulema kwakutondolwela chuma chamuchidiwu kufumamu, nahoshi nindi: “Dichi muntu wukweti matu akutiya, atiyi.”—Luka 14:35.