anyima yakusawula kafuta kanakukeña kumujahawu kudi akaSanihedirini, Yesu nayi kumusumba waEfuremu, kukabeta kaYerusalema kasumbwañesha musela nachimunswa. Nashakami kweniku nawatumbanji twindi, kwakulehi nawayilumbu jindi. (Yowanu 11:54) Hela chochu, mpinji yaChipandakenu chamu 33 C.E. hiyikuswina kwakwihi, dichi Yesu katataka anyamuki cheñi. Nayi kukabeta kakuchimunswa kuhita muSamariya ndo-o nimuÑaliliya, mpinji yindi yakukumishaku munidi iluña henohu kanda afwi.

Chinatachikiyi kuya hanilu lwendu, iku Yesu nakuhita mumukala nimumukala, nawani amayala 10 akata mbumba. Mutapu wukwawu wanichi chikatu, waleteshaña yiidi yamujimba yikwawu chidi neyi nyinu yakumakasa, yakunyendu hela matu kuzotoka-zotoka. (Kuchinda 12:10-12) Nshimbi jaNzambi jahoshaña nawu muntu wakata mbumba watela kubidika nindi: “Majilo, Majilo!” nawa watela kushakama kwakankawindi.—ALevi 13:45, 46.

Kwesekeja nanshimbi, amayala 10 akata mbumba anemani hahalehi naYesu. Dichi anabidiki nawu: “Ntañishi, tutiyili luwi!” Yesu chinamoniyi awa akata mbumba nayileji nindi: “Yenu mwakadimwekeshi kudi atupristu.” (Luka 17:13, 14) Dichi namwekeshi nindi walemesha Nshimbi jaNzambi, jahosha nawu atupristu diwu atela kuleja akambumba nawu anakoli. Kufumahu dinu anateli kushakama cheñi nawantu akola.—ALevi 13:9-17.

Awa amayala adiña nambumba akuhweleleli muñovu yaYesu yakuuka muchihayamisha. Anayi nakudimona nawatupristu henohu kanda ayuuki nikuyuuka. Hampinji yinakuyawu, chikuhwelelu chawu chinaleteshi ayuuki. Anatachiki kumona nikutiya nawu anokewi!

Akambumba 9 anatwalekihu kuya. Ilaña wumu nehi. Iwu iyala kaSamariya nafunti nakumukeñakeña Yesu. Muloñadi? Natiyi kuwaha nachuma chinamwililiwu kudi Yesu. Iwu iyala wadiña nambumba “naakumulemesha Nzambi nezu datiyakana,” neluki nindi Nzambi diyi wunamuuki. (Luka 17:15) Chinamuwaniyi Yesu, nadibuki kunyendu yindi nakumusakilila.

Yesu naleji antu adi mukamwihi nindi: “Komana antu ejima 10 hidiwu atookeshewaku? Hanu dinu amakwawu 9 adi kudihi? Komana kwosi muntu wunafunti nakumulemesha Nzambi chiña hohu iwu iyala wakumuza wacheñi tahindi?” Kuhiñahu Yesu namuleji kaSamariya nindi: “Nyamukaku wuyeña; chikuhwelelu cheyi chinakukoleshi.”—Luka 17:17-19.

Yesu namwekeshi nindi Yehova Nzambi diyi wunakumukwasha chinookiyi antu 10 akweti mbumba. Wumu hiyanamuuki hohu kudi Yesuku ilaña wudi cheñi munjila yakuwumi. Hitunakushakama mumpinji yinakumuzatishayi Nzambi Yesu kuuka antu munjila yamuchidiwuku. Hela chochu, neyi tumukuhwelela Yesu tukwikala munjila yakuwumi wahaya nyaaka. Komana twasakililaña neyi cheliliyi ona iyala kaSamariya?